|
Da Adria (RO)
El moleta
L’altro giorno a gheva da farghe la punta a un carasso pa’ i pomodori del mi orto. Vago in garaz, togo el paleto, suno sù el manarin, porto fora el tapo e me meto in zan zan par farghe un fià de punta a la mi pertegheta. Primo colpo: el manarin sbrissa via senza gnanca cavare na s-cépola. Seconda bòta: riesso solo a darghe na speladina. Insuma, par farla curta, el manarin no ’l gheva un filin de tajo e el gheva bisogno de na bela ugà. Ò piantà lì tuto e m’è vegnù in mente el tenpo andato, quando par le strade coreva la vose: “Moleta , moleta! Ghè chì el moleta! Chi ga cortèi, forfe, ronche e ronchete, falsine e messure vegna chì da mi!” E pedalando pian pianelo su la so bicicleta, atressà con la mola davanti al manubrio, vegneva avanti par la strada el moleta.
El passava con regolarità ogni dó setimane. Al so sigalare qualche siora se faseva su la porta par fermarlo parchè la gheva chelcossa da ugare. Alora el moleta el se fermava, smontava da la bicicleta. El la piassava sul cavaleto, po’ el meteva in moto ’n andamento che col pedalare de la bicicleta faseva girare, ne me ricordo ben se con na sengia o con na cadena, la mola fissà davanti al manubrio. Conpletava el macchinario un bussoloto che spissorlava pian pianin, na gossa a la volta, l’aqua che mentegneva el dessora de la mola senpre mojo. Jera a sto punto che ’l moleta scuminsiava el so lavoro. Ciapà in man el cortelo, la cortelina, el falsinoto, insuma quel che jera, e ’l scuminsiava a strussiarlo na volta a destra e nantra a sinistra fin che a lu ghe pareva d’averghe dà el filo giusto. A sto punto el girava la lama e ’l gh’in daseva da st’altra banda. Quando che ’l se fermava el ciapava un tòco de carta de giornale e zac! el ghe dava un tajo. Se tuto el ghe pareva a posto el ghe faseva dar nantra licadina a la mola par ripètere dopo l’operassion del tajo de la carta e solo alora, tuto sodisfato el ghe sporzeva l’arnese ’penà ugà a la siora, diséndoghe: “El so cortelo (o la so falsina, quelo che ’l jera) l’è propio a posto. El taja cofà un rasuro. La staga atenta, siora, a no farse male. El salame l’è bon tajà, ma el cristian mina tanto.” E co sta batuta el liquidava la siora. El tirava le so palanchine e se no gh’jera altre clienti, el smontava el so marchingegno, andando via, sigando: “Moleta, moleta. Done, ghè chì el moleta!” A un serto punto no ’l s’à più visto, né sentìo. È passà più de qualche ano prima che tornasse a vegnère un furgonsin, che co tanto de altoparlante el se faseva sentire. “Done, ghè chì el moleta, moleta! Moleta! Giusto anca le onbrele.” Se capisse che par far quadrare el so bilancio l’eva zuntà a l’atività del moleta quela de l’onbrelaro, anca se pa ’l profano no jera fàssile capire come ste dó profession le podesse andar insieme e d’acordo. Ma queste i è le evolussion del progresso.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
La guera de le brute notizie
Quela atuale xe stà definìa “la società della comunicazione”, ma sarìa pi giusto ciamarla “società delle brutte notizie”. Tuti i giorni semo bonbardà da fati che ne disorienta. Xe proprio necessario vegnerli a savere?
de Mario Sileno Klein
Da Vicenza
Farse bèi a Primavera
de Ines Scarparolo
|
