|
Da Verona
Adelchi
 | | Adelchi, re de i Longobardi, dal Codex Legum Langobardorum, XI secolo. |
Verona nel corso de i secoli la ga dà rifugio a tanti personagi importanti. La so posission ne l’incrocio tra la via che vien zo dal Brennero con la via Postumia, che traversa la Valpadana, unì al fato che, essendo nata in un’ansa de l’Adese, l’è sempre stà facilmente difendibile, l’à fato sì che, fin dal tempo de l’imperatore Massenzio a quel più recente de i asutriaci, la fusse senpre stà el posto giusto dove serarse sù a spetar la batalia. Uno de questi l’è stà el principe Adelchi. Se vedendo el so nome v’è vegnù in mente el Manzoni, l’è parché al grande autor de I promessi sposi l’à scrito ’na tragedia dedicà a ’sto principe longobardo. Visto che ormai i sarà in pochi a conóssarla, ve conto come l’è andà.
S’èrimo a metà de l’otavo secolo. L’impero romano el s’avéa sfregolà quatroçento ani prima con le invasioni barbariche e ormai in Europa (a parte Bisanzio) restava solo una serie de regni “gotici” che i çercava de soportarse in qualche modo. Uno de questi, su nel nord, l’era quel de i Franchi. El so re el se ciamava Pipino e l’era fiol de quel Carlo Martello che “tornava da la guera” ne la famosa canson de Fabrizio De Andrè.
Pipino, ciamà anca “il Breve” probabilmente parché l’era picenin, el gavéa du fiòi: Carlo (che al contrario de so papà l’era un marcantonio alto dó metri) e Carlomanno. Nel 768, sul leto de morte, el bon Pipino l’à diviso el regno tra i dó fiòi: a Carlo, el primogenito, el ga dà la parte principale e a Carlomanno tuto el resto. I du fradèi, anca se i se detestava, a l’inissio i à çercà de no farse la guera… ’na fadiga che però è durà poco parché dopo solo tri ani anca Carlomanno l’è ’ndà al Creator. Le malelengue de l’epoca le à subito pensà che el fusse stà ’sassinà dal fradel, ma probabilmente a coparlo l’è stà solo ’na malatìa. Çerto che così Carlo l’à podù riunir de novo ne le so mane tuto el regno e ’vérghe la via libera par realizar ’n’idea che ghe girava ne la testa za da ani: quela de crear un impero grande come tuta Europa: el Sacro Romano Impero. Visto che Carlo (che po’ el passarà a la storia come Carlomagno) l’era brào sia come politico, sia come militar e organizator, tra guere e aleanse el ghe stava anca riussendo. Ma el so impero par èssar ciamà veramente “sacro” e “romano” el gavéa bisogno de Roma: de Roma... e de la benedission del Papa. Ma su la strada par Roma ghera un problema: i Longobardi.
Come i Franchi, anca i Logobardi i era ’na tribù germanica… Dó secoli prima soto la guida del re Alboino i era entrà in Valpadana e con poca fadiga i se l’avéa conquistà tuta... dal Friuli fin al Piemonte.
A l’epoca de Carlomagno el re de i Longobardi el se ciamava Desiderio e i raporti con i Franchi a l’inissio i era stà anca passàbili... tanto che Carlomanno (el fradel de Carlo) l’avea sposà ’na principessa longobarda, Gherberga, metendo al mondo anca du fiòi… ma quando s’à tratà de far decìdar al Papa ci gavesse el dirito a la corona (ferrea) de l’Italia i du re, inevitabilmente, i è rivà a farse la guera.
Così nel 771 Carlomagno, l’à passà le Alpi col so esercito. A spetarlo in Val de Susa ghera el fiol de Desiderio, el principe Adelchi, con insieme i du fiòi che la sorela Gherberga la gavéa ’vù da Carlomanno e che i s’avéa rifugià da lu… no fidàndose mia massa de chel’altro zio. El scontro el passarà a la storia come “battaglia delle Chiuse” e el sarà vinto da i Franchi, stritolando l’esercito longobardo con la classica mossa “a tenaja”. Adelchi con i du neodi e pochi fedelissimi l’è riussì però a scapar. Inseguì da Carlomagno l’à traversà tuta la Valpadana fin a rivar a le porte de Verona. La çità l’era fedele a i longobardi fin da i tempi de Alboino e l’era anca ben fortificà, così a l’inissio l’à dà volentieri ospitalità al principe… ma quando davanti s’à presentà anca el potente esercito Franco, Verona l’à dovù cédar.
Qua esiste du versioni: secondo el Manzoni, Adelchi l’à fato ’na bruta fine... secondo i storici, finché Carlomagno l’entrava da la porta principale, Adelchi el scapava da quela de servissio e dopo varie peregrinassioni l’è ’ndà a finir i so giorni a Bisanzio. Comunque el re franco no el ga ’vù cor de copar anca i du neodi e el s’à limità a serarli sù in un convento par el resto de la so vita.
Come savemo ben, po’ la storia la continua con Carlomagno incoronà dal Papa “Re del Sacro Romano Impero” el 25 Diçembre de l’ano 800, in San Pietro a Roma. Quel Sacro Romano Impero che tra ’na roba e l’altra el ghe sopravivarà par quasi mile ani. De Adelchi e de i Longobardi invesse se perdarà quasi el ricordo.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Che bruta roba l’indifarenza!
“Quela che me spaventa de pi no xe la violenza de i cativi, ma l’indifarenza de i boni” ga dito Martin Luther King. In realtà, el mondo no ’l xe bruto par tute le cativerie fate da i malvagi, ma par la mancanza de quelo che no vien fato da chi varda e vede senza fare gnente.
de Mario Sileno Klein
|
