|
Su la strada de le spessie
La canela
… un profumo che te fa ’ndare in dóe!
 | | Se pol fare anca un bel presentin da regalare par Nadale… |
Nel nostro viajo de le spessie, se inbatemo su una che la xe tuta particolare. Ghemo visto fin ’desso che le spessie, nel mondo de i aromi, le se presenta soto forma de semeti, bache, fruti, foje, tegoine… La canela no la se pole confóndare: come dize el nome, la xe na caneta profumà. Vardarla ben, se vede che la xe come un folio fin rodolà sù, incrosà co altri de conpagni che, insieme, i ciapa la forma de un bastonsin de un colore tuto particolare ("canela in cana" la ciamemo!). El xe el famoso colore canela, dove el zalo, el rosso e el maronsin, smissiàndose insieme, i parla de sole, de tera e de luce de i Paesi da dove che riva sta spessia. Chel tubeto, rodolà sù, la xe la scòrsa secà de ’na pianta, el Cinnamomum verum, un àlbaro senpreverde che ’l nasse nel Sri Lanka, na spece de cespulio che se trova ne l’isola de Ceylon. Infati sta spessia se ciama: "Cannella di Ceylon" o anca "Cannella Regina", par no confóndarla co ’n’altra manco profumà e da i colori manco caldi, che la xe la "Cannella cinese". Orca, anca qua la Cina la vien rónpare i bisti.
La canela la ga ’na storia longa pi de mile ani; la vigneva doparà ancora al tenpo de i antichi egissi par inbalsamare i faraoni, e la xe nominà anca ne la Bibia: la vien proprio mensionà nel libro de l’Esodo. Ghi ne parlava anca i greci e i latini e nel medioevo la vegneva portà in Europa da le carovane. A fare da inportadori uficiài, e cussì ’vérghene el monopolio, i xe i olandesi che i mandava le so navi nel Sry Lanka.
La canela la ga un profumo forte e seco, che fa ricordare le broche de garòfano co’ un spissegorin de pévaro. Sta spessia, la se trova ne i negossi soto forma de bastonseli de legno che se sfrégola al momento de dopararla. Da nialtri la vien usà in cusina par preparare i dolsi, anca se ghe xe chi che la mete ne i magnari salà. Dito fra nialtri, messa sul radicio coto, come che me la ga propinà la me amiga Luciana, la fa veramente schifo, tanto xe vero che no so’ stà bon de pararla zo gnanca co i sforsi, par no védare la Luciana dispiasùa.
Se dise che ne i tenpi antichi, quando se diseva de métare un spìssego de spessie, se intendeva un smissioto de pévare, noce moscata, ciodi de garòfano e canela: i quatro grandi de le spessie.
La canela, se pol cronparla anca in pólvare, ma xe mèjo se te la ghè in cana, de sfregolàrghene un tocheto. Xe da dire però che la xe senpre la regina par preparare i dolsi: basta pensare a i biscoti de i Paesi nordici, come i "panspessiati", da nialtri invesse trovemo el "Panforte de Siena" o el "Certosino de Bologna"; la xe inmancàbile ne i budini stile inglese fin a le rafinate creme francesi, o ancora ne i "Strudel" austriaci.
Ghemo dito che la canela la ga un aroma forte e delicato nel stesso momento, ecitante e avolgente; bonissimo el gusto che la ghe dà a la selvagina in salmì e a i brasati in genere, tanto da far vignere l’aqua in boca solo sentire el profumo. E po’, chi xe che pol desmentegarse el famoso vin brulè, profumatissimo e cussì bon: vin rosso de bojo co dentro raquanta canela in cana, qualche broca de garòfano, un par de sculieri de sùcaro, na scorseta de limon o de naransa. Sto bevarajo el riciama la tradission de le feste de Nadale o, a genaro, la festa de la Befana. Xe proprio el caso de dire che no sia da spetare de ’vere el rafredore par preparàrselo, gustarlo co passion e sicuri del risanamento! Ne le cusine orientài, la canela xe tanto doparà, in particolare par pareciare la carne, anca par confóndarghe el gusto che la ciapava par la mancansa de frigorìfari o giassarole par la conservassion. Ne i dolsi in genere se pole usare sta spessia dopo averla pestà nel pestelo co cura e atension.
Voìo provare ’na sensassion particolare? Spolvarè un s'ciantin de canela sora al gelato de crema o sora la pana montata: ve pararà de sognare!
Invesse, par dare più gusto a i ùmidi, a i stracoti o a i stufati (come el famoso stufato al barolo) xe mèjo métarghe qualche tocheto de bastonsin de canela; ricordeve però de métarla senpre prima de scuminsiare a cusinare, parché cussì la ghe lassa tuto el so aroma.
Fasendo bójare la canela in aqua marina e filtràndola, se ricava l’ojo essensiale come principio medicamentoso: par fare rimedi par el rafredore e l’influensa; la fassìlita la circolassion del sangue e la xe utile par tanti dolori e magagne varie. La vien doparà anca par fare profumi e deodoranti de anbiente par coèrsare le spusse che a volte inpregna ’e nostre case.
Par conservarla ben, la canela, xe da sararla sù su bussoloti col quercio ben sarà; se po’ la xe in pólvare, la dura de manco, cussì xe mèjo no tignerla par tanto tenpo e rinovare la scorta de tanto in tanto.
Come se vede ne la foto, se pol fare anca un bel presentin da regalare par Nadale, come che ga fato i nostri amici Carla e Marco qualche ano fà.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Che bruta roba l’indifarenza!
“Quela che me spaventa de pi no xe la violenza de i cativi, ma l’indifarenza de i boni” ga dito Martin Luther King. In realtà, el mondo no ’l xe bruto par tute le cativerie fate da i malvagi, ma par la mancanza de quelo che no vien fato da chi varda e vede senza fare gnente.
de Mario Sileno Klein
|
