Tesori venessiani

Tra storia e fantasia

L’ìsoea de San Michele.

Eà tonba de Igor Stravinskij.

Santa Maria Valverde e ’l pìcoeo canpo. (foto A. Mondin)

Trovar ’a Corte Sconta a Venessia, no xe fàssie. Se parlemo de quea de Corto Maltese, forse, in qualche maniera riussimo almanco a avissinarse, ma se serchemo el mistero intiero, no! Nissun gavarà mai sta possibiità.
Venessia ’a xe un intrigo no soeo de ìsoe, canài, ghebi. Sta cità ’a apartien a eà magia de l’Universo che no se pol svear tuta quanta. Soeo qualche raro alchimista, qualche ancora più raro poeta el pol sercar e trovar calcossa parché ’a so anima ’a xe restada pura, tra ’e fiame del materiaismo de ’a vita moderna.
Mi ghe ne go conossùo dó de anime pure, uno xe un alchimista e st’altro xe un poeta. L’alchimista el se ciama Bepi e el poeta Mario.
Na note de Primavera gavevo ’pena ’assà ’a Strada Nova e gero rivà in Fondamenta de ’a Misericordia, uno de i posti più bei quando che vojo parlar co Venessia. Me gero sentà su ’a riva del Rio de Noal, co’ a ’e spae l’Abassìa de ’a Misericordia, e vardavo de fronte traverso un pòrtego, Cae Racheta. Come tante volte capita, dal vecio simitero, ’desso giardin, del canpo dentro l’Abassìa vien fora ’e anime de i morti che ga voja de parlarme. Ma anca da eà vissina ìsoea de San Michele, formada dal 1835 al 1870 co l’union de ’a vissina ìsoea de San Cristoforo de ’a Pase, el simitero conossùo da tuti, vien a trovarme Ezra Pound, Igor Stravinskij, Olga Rudge, Cesco Baseggio, Franco Basaglia, soeo par dìrghene qualchedun, ma anca tanti altri venessiani sensa arte né parte, almanco in aparensa, parché tuti fa calcossa de inportante ne ’a vita, e spesso xe i tanti nomi del pòpoeo a far ’a vera storia, come a Venessia dove gnanca el più bravo amiralio podeva vìnsar el mar, o na batalia sensa i marinai.
Insoma, tra na ciàcoea e ’n’altra, Bepi e Mario i trovo senpre, ma ogni volta i xe diversi. Ora statue, come quée nel vissin Canpo de i Mori, ora vera da posso del Tresento, come quea in Canpo de l’Abassìa, ora góndoe tra ’e tante che qua se trova. A volte i me parla da ’a luna che se riflete sul canal, a volte i me parla da na finestra veneto-bisantina de qualche paeasso, a volte sconti dentro el caigo. A volte ancora i me parla da ’i copi de ’a cesa sconsacrada de Santa Maria Valverde, senpre in sto pìcoeo canpo da dove se pol intuir dove se trova ’a Corte Sconta, o queo che nialtri credemo sia sta Corte.
Ne i sècoi, in sto posto ga abità tante persone e, segreto, nessuna ’a xe mai ’ndada via, al massimo ste anime ’e se ga spostà a San Michele, gnanca un metro più in là. Eco parché qua se pol trovar de ’e risposte, de ’e indicassion, de i sugerimenti, come quei che me conta l’alchimista e el poeta.
L’ultima volta che so’ stà là go parlà anca co Italico Brass, pitor venessian che gaveva studio proprio dentro l’Abassìa. Tuti inamorài de sta cità cussì bea che te te perdi come in mezo a ’e stee, tuti che te parla soeo se ti xe anca ti un amante de Venessia. El pavimento a spina de pesse del pìcoeo canpo, uno de i pochi restài, el ga posàe un numero de piere in cortèo che ’e pol ’ver un significato se saremo boni a contarle e ’a capir cossa che voeva dir chel nùmaro, magari gnente, magari el ze na mapa, chi sa?
Venessia ’a ga tanti segreti ancora da scoprir, e ognuno de nialtri el pol èssar l’alchimista o el poeta che li pol trovar.
Insoma ’a vera Corte Sconta non se sa dove trovarla a Venessia, mi so’ drio provarghe tra storia e fantasia, ’jutà da Bepi e Mario, che però i me ga za dito che devo ’ver passiensa.

[torna sopra]