Da Lendinara (RO)

Prima de parlare…

Prima de parlare…

Dama con l’ermellino (1488-1490) de Leonardo da Vinci, che te tòle la parola… e cossì te tasi e te pensi… prima de parlare.

“Prima de parlare… tasi!” El monito, ben distante da l΄èssare na contradizion, el xe un prezioso sugerimento par scongiurare el pericolo de capèle o “gaffes” de ogni sorta. Mèjo ’ncora sarìa "inveze de parlare… tasi!" ma savemo ben come che i raporti sociali i sia fondà su la comunicazion verbale, visto che a tante creature “ghe manca solo la parola” par èssare come l΄omo. Riussire a dire senpre le robe giuste al momento giusto no’ xe par gnente fàzile; ghe vòle equilibrio e sensibilità par capire se l’interlocutore de turno o el contesto i ne permete o no da dire tuto quelo ca ne passa par la testa e da cavarse qualche gòsso. O, senplicemente, da esprìmare le nostre opinion, condivìdare le nostre conossenze, contare le nostre storie senza aprofitare de la pazienza de chi ca scolta.
In quanto al parlare, in mezo a le dó categorie oposte, mutrioni e ciacoloni, ghe xe tuta na serie de gradazion ca dipende dal caràtere, da l’educazion, da stati d’animo momentanei o, adiritura da vère e propie patologie. S’a xe vero che chi ca no’ fa no’ sbaja, xe altretanto sicuro che la possibilità da fare figuraze la xe inversamente proporzionale al tenpo ca se passa a boca sarà. Ma l’è un ris-cio ca bisogna córare… magari co’ l’aiuto de qualche regola (par i casi più ostinà) da tignerse in mente. Forse, però, la stragrande magioranza de la zente la va a periodi e anca a fase de la vita; forse tuti semo stà, almanco in qualche circostanza, musoni, ciacoloni o sbabaroni o gavemo perso tante bone ocasion par stare ziti, magari solo par inpinire momenti de inbarazo. Anca i comenti superflui, inutili, se no’ i xe richiesti e senza la confidenza necessaria i pole deventare fastidiosi.
S’a ghe pensemo, a ghemo tuti qualche anèdoto su le capèle personali, più o meno ridicolo che qualche volta a fasemo ’ncora fadiga a digerire. A sto proposito vorìa contàrghene uno capità soratuto a causa de la me quasi incontrolàbile manìa da catarghe le somejanze tra le me frequentazion, anca ocasionali, cedendo qualche volta a la tentazion da esprìmerle co’ convinzion. Fago na premessa. Na volta vista, a xe difìzile ca me desmentega un viso e l’espression de na persona e, pur no’ essendo in grado de ricordare i particolari, a la riconossarìa anca a distanza de tenpo. No’ c’entra beleza, bruteza, età o sesso; son atrata da la fisionomia e incuriosìa da la fisiognomica.
Tanto tenpo fà (a jero a le prime esperienze de lavoro), la matina ca xe rivà a scuola na mama co’ la fioleta de un ano, mi e la me colega a la gavemo acolta presentàndose, anca s’a se conossévino de vista, insieme a i putini presenti. La signora no la jera massa espansiva, senz’altro preocupà e in ansia a l’idea de lassare la pìcola inte un anbiente novo, anca se par poche ore al giorno e mi, un fià inbarazà, a me son rivolta a la putìna co’ fare materno e parole afetuose. Intel tentativo de rónpare el giazo, a go interpelà la colega, spetando conferma: “Che bela moretina! Vèro che la xe identica a M. (un putin ca gavévino ’vù dó ani prima)?” Vedendo l΄espression un poco stravanìa de la signora, a tento un “In bèlo, an!” Inte chel mentre passava, co’ la biancheria lavà e stirà par el canbio de i pìcoli, la dona de le pulizie, cussì genericamente e inpropiamente ciamà la persona insostituìbile e preziosa ca ne dava na man su tuto. La ferma el carelo e la me fùlmina co’ i oci. Intanto, finìa l’oreta e mèza prevista par el primo giorno de inserimento, a saludemo la mama, forse più “ingessà” de prima, e la fiola, dàndose apuntamento par el giorno dopo.
Riva el momento ca me ciapo le mie da la signora de le pulizie. Come, no’ sò che quela ca xe ’pena ’ndà via la xe l’amante storica del tale S.? Che po’ el sarìa el papà del putìn ca go dito che el ghe someja a so fiola? Ma se i lo sa tuti in paese! Naturalmente a son cascà dal pero e gavevo el terore ca se pensasse ca lo go dito de proposito. A me son sentìa propio male chela volta. Però no’ ghe xe mai stà nessun problema; la putina la ga continuà a frequentare regolarmente e volentieri. No’ vorìa insìstare, disendo che più passava i mesi e più ela e M. i pareva dó joze de aqua, ma stavolta lo digo solo qua.

[torna sopra]