Da Adria (RO)

L’odore de le polpe

Par le strade jera un vàntene e vièntene de biétole che ’ndava al zucherificio e de polpe che tornava a casa.

Vasche piene de biétole al zucherificio.

Se scuminsiava verso la fine de Lujo. File de cariti tirà dal musso o dal cavalo intramesà da carete e qualche camio, le faseva coa prima del porton del zucherificio. Qualche minuto dopo le siè, el guardian tirava i cadenassi e i primi mèsi de trasporto i montava su la pesa. Fata la pesà, tirà zo el péso sporco, se podeva andare a i silos a descargare. Là jera pronti i fachini ch’i faseva el passagio dal veìcolo a le grande vasche che se ’ndava man man inpinéndose de biétole. Jera la prima operassion par far deventare le biétole, sto pressioso prodoto de la tera, del bon sùcaro bianco, pronto da zuntare inte ’l cafelate de la matina. Questa jera la canpagna de le biétole.
Int’i canpi òmeni e done col forcheto i cavava le biétole. Tajà le foje con na spece de brìtola grande, i faseva i muci. Rivava su la caresà cari, cariti e conpagnìa brìscola e se cargava tuto p’r andare al zucherificio. Inte la nostra zona gh’jera un zucherificio belo grande a Butrighe, ’nantro più pìcolo a Cavanela, più avanti è stà fata na bietolerìa in Arian e ani dopo a n’è nato ’nantro a Porto Viro, che ’l jera el più grande de tuti e ’l masenava na stramenara de quintài de biétole al giorno. E po’ gh’jera altri zucherifi più distanti: sia inte ’l Ferarese che inte la Bassa Padovana.
Press’a poco par du misi, fin a la metà de Setenbre, par le strade jera un vàntene e vièntene de biétole che ’ndava al zucherificio e de polpe che tornava a casa. Defati inte la lavorassion de la biétola gh’jera diversi passagi: lavà, netà, scartà i cuìti, trancià la polpa, ridota a strisse e tochetini, fata cusinare, cavà el sugo, trasformà questo in melassa, po’ in sùcaro scuro, sbianchesà e finalmente belo bianco ficà int’i sachi o adiritura in scàtola, pronto da doprare, o fato deventare cubeti, anca quisti finì in scàtole. E questo jera el prodoto, disemo cussì, bon. Però gh’jera anca el scarto, apunto le polpe, che no vegneva butà via. Dopo che jera stà ciucià par ben tuto el sugo, quelo che restava, co ’n nastro trasportatore finiva dentro serte vasche, fate aposta, o diretamete su cariti, carete, camion che se portava a casa sta roba ancora bona par dàrghela da magnare a le vache durante l’inverno, quando che le restava per parecio tenpo in stala.
Anca le polpe, però, na volta rivà a casa, le gheva el so posto indove ch’le vegneva descargà par fare el silò. Praticamente se partiva da na busa voda, che pian pian se inpiniva, rivava dessora a l’altessa del teren intorno, formando dopo, man man che ’l cresseva, un bel mucio alto, quadrato o retangolare, che vegneva coverto da de i teli, dove co la fermentassion deventava prodoto maduro, conpato cofà un budin belo fisso d’un color grigio maronsin. A sto punto i contadini alevatori tarava co la badila de le matonele ch’i portava diretamente inte le grupie par delissiare el palà de le bestie. Cussì ninte andava perso. Tuto ben, tuto bon, ma gh’jera el so inconveniente. Le polpe spussava: ’n odore caraterìstico, tra el dolse e l’agrin, che partendo dal zucherificio, da la banda contraria a quela indove che entrava le biétole, vegneva sparpajà in giro da i diversi mèsi de trasporto, anca parchè le polpe le jera moje e cari, cariti e camion segnava le strade co ’n spissorlin continuo come la sia lassà da Policino có ’l se sluntanava da casa. E po’, ch’a tiresse na bava de vento, o ch’a ghe fusse bonassa, l’odore se spandeva par chilometri e chilometri, inondando canpagna e paesi, deventando el tormento del naso fin che no rivava a scancelarlo l’odore bon del mosto, có i scuminsiava a vendemare. E che st’odore no ’l fusse de i più piasévoli ve l’assicuro mi, che ò fato raquante canpagne de le biétole, prima in pesa polpe e dopo in pesa biétole e chel’odore el me s’intrigava inte le canete del naso par tuti i du misi e ’l ghe restava p’r un altro bel tòco.

[torna sopra]