Da la Bassa Veronese

Ortensie: la me passion!

“Ortensie: mon amour!...” la m’à dito me cugnà Poupette, francese de Annemasse, quando che l’è vegnùa a catarme ne la casa de canpagna. Ma anca mi so’ inamorà de sti fiori; on po’ parché la me i à lassà in consegna me zia Rita, prima de nar via par senpre da sto mondo e on po’ parché jè fiori che m’à senpre passionà da mati.
A casa vecia, vizin a on giavasco de lavanda blu, go dó, tre piante de ortensie de colore rosa, rosse e bianche. Me manca però quele de color blu, ma l’è question de poco tenpo par infornirme anca de quele.
El nome botanico de l’ortensia l’è Hydrangea, na pianta acidofila, originaria de l’Asia, ma anca da la Cina, el Giappone e la Corea.
El fiore de l’ortensia l’è fato da on muceto de fiori pìcoli, pìcoli. Le ortensie jè piante rustiche che se coltiva facilmente; le ama l’onbrìa, ma le cresse ben anca al sole; le preferisse na tera grassa, pitosto che na tera sabiosa e scarsa de humus. I materiali adati a le ortensie parché le cressa ben jè: torba acida, scorza masenà e tocheti de rami tolti sù dopo aver bruscà le sese.
A lore no ghe fa par gnente paura l’inverno; le resiste ben anca fin a 7 o 8 gradi soto zero.
Ghe n’è de varie spece e quele pi conossùe le se distingue co’ sti nomi:
Arborescens = l’è on arbusto de 1,5 metri de altezza; l’è na pianta rustica assè, co fiori che spanisse par longo tenpo, da l’istà fin a l’autuno.
Paniculata = l’è na qualità che ga fiori bianchi e rosa, unìi a strati, ciamà pannicoli; sto tipo de ortensie le deventa grande assè, anca da i 3 a i 5 metri; le riesse a ranpegarse parché le ga de le pìcole ventose.
Quercifolia = l’è na pianta originaria dal continente nord-american; la ga fiori color crema.
Serrata = la provien dal Giappone, la ga fiori eleganti assè e l’è decorativa al massimo; la ga colori bei forti, adata assè se se vole on giardin ben colorà, che risalta ben anca de autuno. Le pi bele ortensie de sta spece le ga sti nomi qua: blue bird, Mont Aso, blue billow e blue deckle.
De solito le ortensie le ama èssare bearà in modo abondante, spece d’istà. No bisogna però preocuparse massa se, ne le ore pi calde de la giornada, le pare strache o infiapìe: co ’l fresco de la sera le se mete subito in sesto e le torna in tuta la so belezza. Tajarle no l’è cussì inportante: se le se lassa créssare in modo naturale, se rivarà a ’verghe de giavaschi grandi e con fioriture in abondanza. Par quel che riguarda la concimazion, le ortensie le pretende na bona dose de fertilizante da distribuirghe ’torno la pianta, almanco prima de la fine de l’inverno; l’è ben anca zaparle a pian, cussì la tera ’torno via la deventa pi viva, siora de microorganismi.
Non tute le ortensie le ga modo de canbiare el color de i so fiori. De sicuro no pol farlo quele co el fiore bianco o rosa o qualcheduna de rossa. Se ghemo la fortuna de ’verghe tera acida, se pol otegner on color blu forte, meténdoghe on poco de solfato de aluminio che el ghe dà colore al fiore. In comercio el se cata co’ el nome de azzurrante opure se pol zontarghe a la tera de i ciodi o limaure de fero.
Par avere piante nove, basta piantare calche ramo vecio de l’ano indrìo. Anca l’ortensia, purtropo, la pol malarse a causa de funghi o bestioline che provoca: la botrite (che la ghe vien da ristagni de aqua), la maculatura fogliare e la malatia da marciumi radicali, quando se smarzisse le raise.
Anca se el posto giusto del fiore de le ortensie l’è quelo de restare so la pianta in giardin, ve confesso che son spesso tentà de fàrghene on mazzo par gòdarmele t’on vaso al centro tàvola in tinelo.

[torna sopra]