Xe finìa un’epoca…

Mureri a Venessia

No i se rendeva conto che i gera de i artisti.

Portar sù ’a malta e i coarèi pa ’e scae…

Èssar stai fin a na diesina de ani fà mureri a Venessia gera, par mi, come èssar stai de i artisti. I architeti progetava, ma gera sti mureri che faseva vegner ben i lavori, anca parché bisognava che ’e man ’e fusse forti e al stesso tenpo legere par serti tipi de lavoro. El murer el gera anca ferajoeo, faegname, marmista e el saveva ’ésar i disegni. Mi ghe ne go conossùo tanti de sti òmani e me ’i ricordo ben. I faseva un lavoro fadigoso, tante volte mal pagài, i ris-ciava de farse mal ogni giorno parché no ghe gera possibiità de star massa atenti. I lavorava su i copi come coeonbi e zo fin a ’e fondassion dove i doveva scavar co ’a soea paea fin a eà platèa de antico legno posada da i venessiani che gaveva lavorà eà sècoi prima.
Anca se i gera boni far muro, cantoni e intonaci speciài, tante volte i ’jutava i manovài a scaricar ’e barche, a portar via ’e cariòe de rovinassi e prima che i inventasse i cassoni ne i ani ’80 del ’900, i ’ndava via in barca insieme al barcaro che li portava a Muran dove che ghe gera in Saca Serenea ’a discarica e tuto el material che provegneva da ’e demoission el vegneva scaricà co ’e pae co qualsiasi tenpo, parché ’a barca no ’a podeva star co ’l carico, parché ’a podeva ’ndar a fondo quando che ’a vegneva ormegiada carica.
De istà soto el sol, de inverno al fredo i restaurava i tanti bei monumenti de Venessia, ma anca tute ’e case de ’a cità più bea del mondo. Tuti i gaveva a so cassioea personàe, perché, i diseva, che ormai el mànego gaveva l’inpronta de ’e so man e cussì i riussiva a dopararla ben. I comissiava a eà matina verso ’e sete, i faseva pausa da mezogiorno a un boto, e i continuava fin a ’e quatro, sinque del pomerigio e i tornava casa co naltro viagio de un’ora e meza, dó ore come queo de ’a matina, parché i vegneva in tanti da ’a canpagna.
Secondo mi no i se rendeva conto che i gera de i artisti. I go visti rifar camini a eà vaesana prorio come quei che gera cascà, àngoi tondi perfeti, tuti fati a man. Na parte de eori i gera anca boni de far el terasso a eà venessiana co ’a calce cussì ben che quando che el gera finìo, te pareva de caminar su un tapéo persian.
Qualchedun el beveva un fià massa, ma no el perdeva ’a bravura e no el moeava mai el lavoro prima del tenpo.
Prima de ’a fine de i ani Otanta, quando che finalmente i podeva ’ndar a magnar ne ’e ostarìe convensionàe co ’e inprese, i se scaldava el magnar portà da casa, fato da ’e mare o da ’e muier a l’alba prima che i famejari partisse, co quatro tocheti de ’egno de cantier, e ne i casi più fortunài co el fogo de na bónboea de gas e i magnava sentài su na riva o in qualsiasi posto dove che i podeva sentarse par tera o su un scain.
I go visti lavorar soto ’a volta de antichi ponti e sostituir piera a piera tuta ’a volta, smontar i scaini de piera d’Istria e rimontarli tuto co ’a soea forsa de ’e man o, a farla granda, co l’aiuto de qualche caretin o de un tòco de tubo inocente, dove che i faseva rodoear sora sti pesanti tòchi de piera. I faseva i conti e i disegni co ’a matita da mureri su i muri; spesso quando ch’i finiva un geto de cemento co un ciodo i scriveva ’e inissiali del so nome e cognome o na frase de poche paròe par ’assar un segno del so lavoro. Quando che rivava el paron de l’inpresa o i tecnici i se moveva ancora più veoci par paura de ciapar paròe. No i saveva che, se i voeva, i podeva dirghe che “se te còmoda cussì ben, senò vien ti qua”.
Quasi nessun paron o ingegner el sarìa stà bon de far calcossa co ’e man. Ma i mureri de chei ani i gaveva paura che el paron li licensiasse e i considerava de far un lavoro poco inportante. Me dispiase che no i gavesse intuìo che i gera eori ’a vera richessa del paron, che i gera eori i artisti. Nonostante tuta ’a fadiga che i faseva, i diseva che quea che i gaveva fato quando che i gera contadini ’a gera na fadiga ancora più granda e i gaveva paura de dover tornar a lavorar i canpi.
Par mi ’e inprese venessiane de chei ani i gaveva sul libro paga un esercito de scultori e de pitori, ma anca eori no i ’o saveva. Sti òmeni i gaveva ingegno e i inventava qualsiasi roba che ghe servisse par far queo che i doveva far e che l’inpresa no ghe gaveva messo a disposission. Go visto inventar congegni de vari materiài par tirar sù pesi enormi, métar i canpanèi da bicicleta su i maneghi de ’e cariòe par far spostar i tanti turisti che raentava el passagio co ’e cariòe par rivar su ’a riva e caricar o scaricar materiàe. Par uso personàe i gera maestri a tirar fora da i sachi de cemento ’a carta più neta, de i tanti strati del saco, e farse un capèo cussì legero e indistrutìbie al stesso tenpo che i go senpre benevolmente invidiài.
Nissun se preocupava de farse vegner fora l’ezema o altre maeatìe professionài, forse parché i se sentiva imortài. I faseva i intonaci de i muri tuti a man, oto ore al giorno. Roba che me vien i grisoeoni soeo a pensarghe. Na gran parte de eori i se iscriveva al sindacato de scondon, parché i gaveva paura che el paron li ’assasse casa, e in qualche caso gera vero.
A eà matina presto Piassàe Roma ’a gera piena de mureri co ’a borsa del magnar, co el coeo de na botilia de vin che se vedeva végnar fora da un canton de ’a borsa, che i rivava da tuta ’a provincia de Venessia e gera beo védarli.
’Desso tante robe ’e xe canbiàe. I mureri no i se riconosse più a vista e no soeo parché i xe pochi ormai. Xe finìa un’epoca che brevemente, in sta pagina, go voesto ricordar, provando un poca de nostalgia.

[torna sopra]