Da Vicenza

El riso de le Badesse

El claustro (chiostro) del monastero de S. Piero a Vicensa.

Par farse un’idea del risoto…

Piante de riso de Grumolo de le Badesse.

A credo che i sia puchi quei che sa che le prime risare, qua in tel Veneto, le xe stà òpara de le móneghe benedetine de San Piero a Vicensa. El riso xe stà portà da i Àrabi in Sicilia in tel IX sècolo e la seconda tera bonificà par sta coltivassion la xe stà propio, ’tel Veneto, la nostra Pianura Padana.
A Grumolo (da “grumulus” in latinorum: piccola altura) ghe jera, fin a i ani 1000, on deghèjo de erbe mate e de boschi che faséa da difesa a on castèo postà sora on “grumo”. El paese, goernà da on Conte, el vegnéa difati ciamà “Grumolo delle Contesse”.
’Te i sècoli, el ga conossudo el dominio de i Romani e quelo de le popolassion barbare franche e longobarde. ’Tel 1004 goernava Vicensa, co l’aprovassion de i sassoni, el Vescovo Liudigerio I; sto santo omo, considerà che i Benedetini tanto ghe dava a la preghiera quanto al laoro de i brassi, el ga pensà ben de far rancurare la Contea de Grumolo al Monastero de San Piero a Vicensa. La Superiora de l’ordine la vegnéa ciamà “Badessa”: da sto fato vien el canbio de nome del paese che, da “Grumolo delle Contesse”, el deventa “Grumolo delle Abbadesse”.
Ghe ga vossudo ani par bonificare e desboscar par ben tuto ’torno, ma le móneghe ghe la ga fata a ricavar la tera adata a le coltivassion e a slevar le bestie. El canàe de ’a Moneghina xe deventà el lógo pi ’nportante par l’economia del feudo, dato che ’l gavarìa portà l’aqua del Tesina a le risare e trasportà (co barconi tirà da cavài) el riso tolto sù, fin a i magasini de le Benedetine in sentro del paese.
In te on par de sècoli Grumolo ga canbià conpletamente: pi de 900 canpi visentini deventa tera bona par diverse coltivassion e, nel ’500, altri 200 canpi vien destinà a la coltivassion del riso. Maman che ’l tenpo passava, drìo le risare xe stà tirà sù vile da la splèndida architetura, destinà a residensa estiva par tante fameje nòbii.
Pecà che ’tel 1200 e supia, el castèo de le móneghe sia stà distruto da Ezzelino III da Romano, tanto che, ’tel 1220, no ’l vien gnanca nominà ’te i Ati che Federico II ghe dà al vescovo Zilberto, co la nota de quel che ghe speta.
A Vicensa, el Monastero de le Benedetine se cata drìo la strada che da Ponte de i Àngei porta a Borgo Casale; dopo el 1806 el xe stà cronpà dal Conte Ottavio Trento e ’l xe oncò propietà de l'IPAB che la ghin à fato on Istituto par Ansiani.
A me ricordo che, fasendo lession de storia, la Mestra Bertacco la ne ga portà a védarlo, parlàndone de le dominassion foreste che ghéa vudo Vicensa e de le Badesse che gavéa, a i tenpi de i Monasteri, on serto prestijo so nòbili e goernanti. La Badessa, o Madre Superiora, la traversava a cavalo la sità, fasendo el bon e ’l cativo tenpo, sia co le so móneghe che co le autorità sitadine. Me vien anca inamente le ciàcole che girava (sotovosse par no èssar sentìi da la Mestra Lussia): i tosati pi grandi contava che, de note, le suorete le ’ndasesse farghe vìsita a i frati de Monte e che no le fusse tute preghiere, quele che insieme i ressitava...
Tornando al riso, a Grumolo vien coltivà dó quaità, quela del Vialone Nano e quela del Carnaroli, che le fa parte de le sìe varietà “storiche” italiane. Propio a setenbre, la tersa doménega del mese, Grumolo ne dà la possibilità de gustare el famoso Risoto de la Badessa, parecià co na risseta segreta che tanti vorìa inbastir sù, indoinando quel che serve par darghe el gusto dal bon particolare che ’l piato ga. I dise che ghe vol carote, sióle (tante!), sèano, carne masenà de sìe quaità, brodo de carne, formajo gratà. Sarala vera? Boh, mi sò che che go dimandà a na cognà de me sorèa Ivana, de Grumolo, che la faséa propio el risoto a la Festa del paese, ma... anca ela ga fato “Muci zaba”.
Bon, setenbre, tenpo de spose e tenpo de riso anca se, co ’n fià de sale in pi ’tel sarvèo, i sposeti de oncò i ga pi caro che se ghe buta pètai de fiori quando che, soridenti e co i oci lustri, i vien fora da la cesa, unìi ’te l'Amore ’vanti de Dio e de i òmeni. Xe mèjo che ’l riso vègna sparagnà par el pranso co parenti e amissi o che ’l vègna mandà in chéi paesi indove i boce crepa par fame, dì dopo dì. Feisse setenbre, amissi, e, se podì, vè a Grumolo e gusteve el Risoto de la Badessa!

[torna sopra]