Da la Lessinia Centrale (VR)

Na scarselá de castagne

Coesto l'è ’l pi vecio castagnar che ghè ’n Lessinia: l'è al Ponte de Veja e, i dise, che ’l ga sincoesento ani.

Eco i boni maroni de la Lessinia, tera speciale par ’sti fruti.

Uno de i ortagi più doparà inte sto periodo el xe forse el più pitoresco e sinbòlico, che ga conossù na grande popolarità, sia dal punto de vista artistico che come ogeto de uso comune. Parlemo de la zuca la cui polpa, oltre a èssare l΄ingrediente base de na infinità de rizete, piena de gusto e de virtù, la ga un ruolo da protagonista inte una de le feste più inportanti de l΄ano e de la so vizilia: Ognissanti e Halloween.
A sto proposito podemo dire che, siben che le dó ricorenze le pare in contradizion, le ga origine e finalità comuni ca se spiega, tornando indrìo intel tenpo.
L΄antico popolo de i Celti festegiava el capodano, Samahin, el 1° novenbre e atraverso sta celebrazion i ringraziava i dèi par el racolto, invocando protezion par l’ano ca scominziava. Inte l’eterno ciclo de rinàssita a jera conpresi anca i cari morti e proprio, faséndoli "tornare" in vita co’ rituali pieni de alegrìa a se tentava de superare la paura de la morte. Durante el periodo de l΄Alto Medioevo, a opera de Gregorio Magno, la festa de Ognissanti la xe stà spostà al 1° novenbre, cristianizando, inte sto modo, le tradizion pagane e perpetuando el culto de i Celti.
Intel X secolo la Cesa, no΄ a caso, la ga zontà la festa de i morti, dedicà a la memoria de i Defunti, co΄ l΄idea de l΄intercession da parte de i Santi. La tradizion de lassare fòghi e magnare e bévare fora da la porta de casa, in modo che i spiriti i podesse servìrsene e non fare dispeti, la xe a l΄origine de l΄ormai famosa espression "dolcetto o scherzetto?"
Più avanti, in America, xe deventà de moda festegiare la note del 31 otobre co΄ manifestazion ca xe ’ndà via via perdendo el senso de la solidarietà co ΄l mondo de "i più" a vantajo del gusto màcabro de far baldoria. Una de le usanze più comuni la xe quela de preparare le "lumaze", grosse zuche intajà co΄ dentro la candela al posto de le originarie rape de la legenda irlandese de Jack-o’-lantern. L΄antenata de la zuca de Halloween la xe stà portà da l΄America, ma za da i tenpi antichi la zuca la jera conossù, in varietà difarenti, da Egizi, Romani, Arabi e Greci; par qualche studioso pare che Hallowen la sia adiritura na contaminazion de na tradizion de l΄Italia meridionale. La beleza de ste zuche americane, grande e piene de semi, la ga atirà artisti da i quali la xe stà rapresentà come sìnbolo de abondanza e fertilità. Una de le forme più famose de la Cucurbitacea la xe la "bottiglia del pellegrino" cioè la Lagenaria che, grazie a la forma de fiascheta, la vegneva tacà al baston de santi e pelegrini e inpinìa, specialmente de aqua. Ma la fiascheta de zuca, la serviva anca come portalànpada e portazera e, soratuto, par conservare el prezioso sale al riparo da l΄umidità, proteto da na scorza che co ΄l tenpo la deventava senpre più dura.
Da le maracas de l΄Amazzonia al coredo funerario de i Egizi, i riferimenti de la zuca co΄ la magìa i xe presenti in tante culture. La zuca la xe associà a l΄inteligenza, come ca se capisse da l΄etimologia "cocutia" trasformà in cocuzza: avere sale in zuca, zuca dura o zucon, zuca voda; co ΄l tenpo se fa anca le zuche (un deto ca ne invoja a no΄ pèrdare la speranza).
Tante le xe le spece e le varietà, che oltre a quelo sientìfico, le ga nomi da favola: Grigia di Bologna, Mammoth, Turbante di Aladino, di Napoli, Zucchina trombetta di Albenga, Zucca dei sette anni, Zucca serpente, Violina, Cappello di prete, Dieci Comandamenti (par via de le diese ponte verso l΄alto), Spaghetti Squash e la nostra zuca baruca, la Marina de Chioggia.
Par Hallowen se dòpara quele grande, arancioni, de la spece "Cucurbita pepo"; co΄ un cortelo e un lumin xe presto pronta la nostra "lumaza" che insieme a qualche travestimento spaventoso e infernale la conpleta la dotazion par i festegiamenti. Senza voler demonizare a tuti i costi ste usanze, seguìe el più de le volte par puro spirito de imitazion, a sarìa ben recuperare el senso originario de la festa e farlo conóssare a le nòve generazion, zercando de salvaguardare la sacralità de la ricorenza. In conclusion dirìa che, se propio fusse in vena da butarme intel "clima" de la Festa, me piasarìa che la me zuca, almanco par na note, la deventesse na caroza e no΄ el famoso personajo de la legenda irlandese, n΄ànema in pena ca speta el giorno del giudizio…

[torna sopra]