|
Editoriale
Come se fa a parlare de pace?
Eco na domanda che fa fare na riflession profonda, parché la pace inpone de partire da tanto vizin. Ocore strénzare el cerchio e tirare in balo el conportamento del singolo individuo, par dopo vardare distante, fin al mondo intiero.
 | | Par fortuna da qualche parte del mondo se leva on reciamo de Pace. |
Come se fa a parlare de pace se, quando se entra te on bar, no se dise bongiorno prima de ordinare on cafè?
Come se fa a parlare de pace quando te na fameja le xe continue discussion, barufe o anca pezo tra marìo e mojere, tra genitori e fiòi?
Come se pole parlare de pace, finché continua la strage de le done e la violenza su le done? Basta vardare i nùmari de i ultimi tri ani: nel 2013 = 179, nel 2014 = 136, nel 2015 = 128 done copà.
No se pole parlare de pace, se prima no se inpara a rispetare i altri, a scoltare el parere de i altri, a zercare de vegnerse incontro, sia pure rinunciando a na parte de la propia “verità”.
Se pole parlare de pace, pace nel mondo, se par liberarse dal fastidio del can del vizin, che l’è senpre drio bajare, a se ghe buta de là de la rete i boconi de velen par i sorzi? Opure se spanpana la riseta velenà par el canpo, in modo che le galine del confinante no vègna pi a ruspare so la to tera?
De quala pace se pole parlare se, quando ca te si fermo al semaforo rosso e no te si pronto a scatare col verde, quelo dedrìo de ti el taca a stronbazare e el te insaca de parole?
Se i piroloti zali de l’àlbaro de là de la rete de casa toa, i te intapeta tuta la corte che te toca pèrdare ore par rastelarli sù e butàrgheli de là, e el paron de l’àlbaro gnanca el se degna de dirte: “can, scusa, s’a lo savéa a te jutavo…”: se pole parlare de pace?
Se i aghi del pin de st’altro vizin de casa i te intasa le grondaie, e ti bison ca te paghi uno che vaga sora el coerto a liberarle, quanto te costa far finta de gnente, par quieto vìvare e stare in pace con tuti?
Eco, questi i sarìa on pochi de roeji da desbrojare, s’a se vole scominziare a parlare pi in grando de pace, ne la piena convinzion che, co on fià de bona volontà, se pole e se ga da vìvare in armonia. Xe solo partendo da le pìcole question personali che se pole fare un passo ’vanti par tentare de parlare de pace.
Certo che, cavàndose da i oci i ociài scuri, a se vede nel mondo de chele robe che fa scareze. Xe fadiga poder parlare de pace quando al dì de oncò ghe xe in guera: in Africa 29 Stati e 214 grupi de guerilieri; in Asia 16 Stati e 159 grupi de milizie-guerilieri, in Europa 9 Stati e 80 grupi teroristi, in Medio Oriente 7 Stati e 244 grupi guerilieri-milizie-anarchici, ne le Americhe 7 Stati e 26 grupi separatisti. In totale ghe xe 68 Stati in guera con 723 grupi de guerilieri-milizie-teroristi-separatisti… No ghe xe zona del nostro pianeta che no sia interessà da confliti: tute guere de potere, de risorse, de separazion, de autonomie…
Tuti sa che le guere se paga con vite umane, e che le guere porta solo tristeza, miserie, distruzion, confusion, fame e soferenze. Epure anca noantri, te ’l secolo passà, ghemo afrontà dó guere. Dó guere che massa presto xe stà desmentegà o ridote a poche cerimonie de ricordo: el 4 novenbre e el 25 aprile.
Massa poco par conbàtare la guera e par stare in pace. Ghe vole piassè inpegno.
Sto “Giubileo della Misericordia” dovarìa averne insegnà calcossa par vìnzare la guera. Dovarìssimo ciapare esenpio da persone come Gandhi, come Madre Teresa di Calcutta, come Papa Francesco e prima de lori Gesù Cristo, par portare e permétarne de parlare de pace ne la fameja, nel posto de lavoro, ne la scola, nel condominio, col vizin de casa… E a colpi de pico butare zo muri par costruire ponti.
Toleranza e rispeto xe a la base de tuto questo, anca se le nostre TV ne sporca de guere e de sangue quasi tute le nostre sere. Ottieni Link
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Come se fa a parlare de pace?
Eco na domanda che fa fare na riflession profonda, parché la pace inpone de partire da tanto vizin. Ocore strénzare el cerchio e tirare in balo el conportamento del singolo individuo, par dopo vardare distante, fin al mondo intiero.
de Mario Sileno Klein
Da la Bassa Padovana
La graspa fata in casa
El jera uno de i pecati “veniali” del contadin. E adesso?
de Roberto Soliman
|
