|
Da la Bassa Padovana
La graspa fata in casa
El jera uno de i pecati “veniali” del contadin. E adesso?
 | | Eco qua, come ca ve diséa, l’inpianto de la graspa fata in casa |
A difarenza del “bracconiere” che ’l ciapava descondon bestie e pessi non sui, che non i ghe jera costà fadiga e laoro par farli nàssare e créssare e che al massimo i ghe li sequestrava, el contadin el provava ’na naturale ribelion verso la lege che ghe tassava el fruto del proprio laoro. El jera el caso del Dazio so ’l trasporto de le piègore o de i mas-ci morti (da vivi i podéa nare indove che i voléa, anca in piaza!), so ’l spostare robe da magnare da on paese a l’altro, par vèndarle, a la “secela” o “frasca”, indove che se vendéa el vin “al minuto”, par finire con la graspa fata in casa.
Tuto vegnéa tassà, e alora jera naturale par el contadin inventarse coalche furbizia, propria de chi che ga le scarpe grosse ma el zervelo fìn.
Par la graspa fata in casa le storie le xe tante, tanti i xe i ani e i secoli che dura sta pratica de distilazion de prodoti de la tera, fermentà. Nel medioevo i ghe ciamava aqua-vitae, ma el nome graspa el xe nato nel Triveneto, come derivazion dal graspo e da le graspe, le vinacce in italian. La xe deventà grappa, coando che el Veneto el xe passà soto al Regno d’Italia, ma par tuti noantri la resta la graspa.
Adesso a credo che el fare la graspa in casa el sia pi on passatenpo che on mestiere come che el jera ’na volta in inverno, in canpagna, ma de pi in montagna, saendo che se frodava el Dazio, parché bona parte del distilato el vegnéa vendù. La base de partenza la jera le graspe, le sgusse de l’ua, che dopo averle torcià le vegnéa mucià, coerte co ’on grosso telo con de sora tera par non farghe ciapare aria e luce, parché non le pontesse de asedo!
Con l’arivo del fredo, de sera in magazin o fora, sconti da ’na passaja, se pareciava el bidon in fero so on trepiè, se ghe faséa el leto in te ’l fondo del bidon con rami de noselaro e ’on par de seci de acoa o de vin mato, ma no acido; dopo a se inpinava coasi el bidon de graspe e se ghe metéa el coercio fissà co i morseti, meténdoghe in mezo ’na goarnizion fata de farina bianca, acoa, zénare e a volte anca luame. Al coercio se ghe tacava in mezo on tubeto de rame che ’l continuava con ’na serpentina, senpre in rame, messa dentro a on mastelo de legno pien de acoa. La serpentina finìa, nando fora da on buso so ’l mastelo, so on botilion indove che se rancurava la graspa. Se inpizzava el fogo soto al bidon e se spetava che i vapori de alcol aromatizà e acoa, partìi da le graspe i se condensasse ne la serpentina rafredà da l’acoa, e i nesse dentro al botilion gozza a gozza. La prima graspa la se butava via, e anca l’ultima che ormai la jera sporca e anacoà. Coela in mezo la se tastava ogni tanto e se la jera za bona cossì la se metéa so on caratelo o in damigiana e la se scondéa, anca soto tera. Se la gavéa de i cativi odori la se “retificava”, cioè le se faséa bojire de novo e condensare, metendo in te ’l bidon, insieme a la graspa, oncora rami de noselaro, pan vecio, pomi, sgusse de naranze e altre robe segrete, par tirarghe via odori e aromatizarla.
A vegnéa fora de i capolavori che de le volte i vegnéa sequestrà da le Guardie de Finanza (anca alora a ghe jera le spie!), che sequestrava graspa e bidon, tacava la multa e mandava a processo el contadin, che vegnéa condanà con la condizionale. A casa mia a se ga ciapà la colpa me zio, che el jera astemio! A la damigiana sequestrà i ghe metéa el sigilo de le Finanze e i la depositava in tel magazzin comunale. A volte la graspa pi bona la evaporava parché i operai del Comune i girava la damigiana, i ghe faséa on buseto so ’l vero da dove i travasava la graspa, e dopo i metéa tuto a posto!
Ghe xe da precisare che la graspa la vegnéa doparà, ne le case contadine, anca come medizina naturale par le bestie e par i òmani, oltre che par inbriagare la cioca. A la vaca la se ghe daséa co on secio de cafè de orzo dopo on parto difìcile, al cavalo dopo che el gavéa suà soto la piova par rivare a casa de corsa, tirando el careto. Adesso el cavalo se lo tiene solo par sport, ben coerto e curà dal veterinario, inveze el contadin el lo ga sostituìo con i cavài del motore del tratore, cavài che par funzionare i ga bisogno de on altro distilato, tassà arcoanto: coelo del petrolio!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Come se fa a parlare de pace?
Eco na domanda che fa fare na riflession profonda, parché la pace inpone de partire da tanto vizin. Ocore strénzare el cerchio e tirare in balo el conportamento del singolo individuo, par dopo vardare distante, fin al mondo intiero.
de Mario Sileno Klein
Da la Bassa Padovana
La graspa fata in casa
El jera uno de i pecati “veniali” del contadin. E adesso?
de Roberto Soliman
|
