Le scoperte de Nando

Cristian Lanza
nevodo del famoso tenore Mario

El tenore Cristian Lanza.

El soprano Silvia Rampazzo.

Cristian e Silvia… insieme.

Col desiderio de rinovare i fasti de la lirica de uno tra i pi grandi tenori del ’900, co na grande eco ne la ribalta canora, se fa ’vanti el nevodo de Mario Lanza, Cristian, che dal so avo el ga eredità na vosse tonale e estesa che in pochi ani el xe drio inporse ne i pi grandi teatri lirici europei.
A sostegno de Cristian ghe xe vissin la conpagna Silvia Rampazzo che, a deta de i critici, la xe paragonabile a le pi grande vossi de la lirica e con Cristian i xe drio riscuòtare sinpatìe e ovassion ne i teatri dove i se esibisse.
Cristian Lanza xe nato a Roma, ma el vive in Germania e ne sto periodo el xe drio pareciarse (con la conpagna) par na tournée che li vedarà in Germania, Danimarca, Austria e Polonia, dove da diversi ani i canta con gran sucesso de pùblico.
La conpagna de Cristian, Silvia Rampazzo, la xe nata a Ravenna e la ricorda che ne i so primi passi, par scominsiare a entrare nel mondo de la lirica, la se gaveva fato sentire da on adeto a i lavori che la gaveva scoragià de continuare a studiare el canto lirico, ma grassie a la so forsa de volontà e passion, la ga vudo rason. La giustissia canora non se ga fato spetare e, presentàndose al famoso concorso "Voci Verdiane” de Busseto (paese nativo de Verdi), in provincia de Parma, la ga vinto el primo premio, che da siè ani non vegniva consegnà. Dopo, la ga partecipà a tanti altri concorsi lirici dove ghe vegniva senpre riconossùo on so istinto naturale par el canto lirico.
Anca Cristian, el ga vudo na nota negativa ne la so cariera, e xe fadiga desmentegare coela volta che on sindaco de na sità tedesca el se gaveva dimostrà ostile ne i so confronti, ma dopo na marea de bis vossudi da on pùbblico entusiasta, ga dovudo ricrèdarse co tanto de scuse.
L’ùgola lirica ne la fameja Lanza el xe on fatore ereditario; dopo el grande e famoso Mario, anca so fiolo Rico, (ilegìtimo), popà de Cristian, gavarìa possudo calcare le sène del teatro melodramàtico, invesse ne i ani ’70 el se ga messo par on breve periodo so la strada de la musica Pop, deventando però na star in Germania.
El nevodo Cristian invesse, forte de la so passion tramandà da so nono Mario, el ga scuminsià fin da putèo a cantare so on coro de vossi bianche ne la cesa de la so parochia. Dopo le so prime esperienze co le band del momento, el ga capìo che el xera pi portà par la lirica e cussì el ga scominsià a ’ndare a lession private, e fra i so maestri ghe xe stà el famoso tenore Alfredo Kraus che el se ga dimostrà entusiasta par la so vosse.
Cristian Lanza el ga scominsià la so cariera come tenore lirico in tante tournée, girando l’Europa e anche in Cina, dove l’opera lirica la ga un gran seguito. So coleghi i xe stà le vossi pi famose soratuto in Germania: Eva Lind, Anna Maria Kaufman, Gunther Emmerich, Vincenzo Sanso, Eduardo Villa, ecc., pi el maestro Yuri Gilbo.
Silvia, ancora zóvane la ga vudo eà fortuna de studiare con la famosa cantante lirica Iris Adami Corradetti, storica maestra de tante vossi liriche, tra queste Katia Ricciarelli.
Tra l’altro la famosa cantante, Rita Lantieri, la ’a ga ajutà a plasmare la vosse e rafinare la preparassion interpretativa.
Cristian e Silvia i se ga conossùo, fasendo le prove durante na tournée che se ciamava “Verdi nacht” (notte di Verdi), dove i cantava le arie pi famose del maestro Bussetano: sto tour li vede a tutancò inpegnà in teatri come la Filarmonica de Berlino, Monaco, Francoforte e Dresda, senpre con tanta sodisfassion de pùblico e de critica.
A Cristian despiase che tanti zóvani cantanti italiani, par podere fare cariera, ghe toca ’ndare a l’estero dove la lirica la xe ’ncora tanto amà.
Fra le opere che Silvia ga in repertorio ghe xe: El Trovatore, Nabucco, Messa da Requiem, La Traviata, Aida, I Lombardi de Verdi; Tosca, Turandot, La Boheme, Manon Lescaut de Puccini, e anca la Cavalleria Rusticana de Mascagni, I Pagliacci de Leoncavallo e Adriana Lecouvreur de Cilea.
Cristian el ga nel so repertorio el Nabucco, Il Trovatore, Rigoletto de Verdi e Tosca, La Boheme, Madama Butterfly de Puccini e opere de tanti altri conpositori. Ne i so concerti, propone anca tante bele canzon napoletane come “O sole mio” che la xe senpre la pi richiesta, cussì el xe sicuro de portare avanti eà tradizion de fameja; difati se sa che so nono Mario, el ghe tegniva pi a i concerti che le opere intiere.
Al momento, Cristian e Silvia, xe drio a pareciarse par nove tournée, dove sicuramente i entusiasmarà i amanti de la lirica.

[torna sopra]