|
Editoriale
Mai dire “ormai”…
Se xe vero che le parole le xe piere, eco na piera da lassare indove che la xe par tera, eco na parola che xe mèjo non dire, parché la xe nemica del vardare ’vanti e la ne inpedisse de progetare e de realizare quelo che serve pa ’l presente e pa ’l futuro
 | | Inparemo da sto fiore che ’l xe el primo a rónpare la grosta del fredo e a regalarne la speranza de na nova stajon. |
A ghe xe on proverbio nostran che ’l dise: “Prima de parlare, tasi!” che ’l vorìa dire che prima de vèrzare boca xe ben pensare a quelo che se dise, parché ogni parola la ga el so peso e quando le parole se posa su la bassacuna del discorso a te poi catarte incatejà in situazion ca no te te spetavi e che fa pi dano che altro.
Quando gnente va pa ’l verso giusto, anzi el va storto, se se cata davanti a na sconfita che la te porta fora dal mondo, la te invita a isolarte, a sararte te ’l bòzolo come fa i cavalieri quando i deventa farfale che se sara drento la galeta, che po’ se sa che fine che la fa… Eco el momento de no dire “tanto, ormai!” e de canbiare tàtica, magari zercando de fare robe che te piase, che te stìmola; eco el momento de fare de tuto par realizarle, come se la fusse na corsa a chi riva prima, o na partìa a carte o a trèa molinelo.
A tute le età, a vint’ani come a novanta, la vita te mostra che te ghè de le qualità che gnanca te te sognavi de ’vere. Anzi le xe propio le dificoltà e la forza de no dire “ormai” che fa nàssare idee, mestieri, profession e inclinazion artistiche de tuto rispeto. La vita te ofre senpre nove oportunità, nove ocasion de entusiasmo e sodisfazion.
Forse xe ben farse vegnere in mente i casi “disperati” che ghemo savesto de persone che, nonostante tuto, le xe riussìe a canbiare la so situazion da la note al giorno, propio come s’i fusse tornà a vìvare na seconda volta, parché xe vero che quando la porta de la bona sorte la se sara, se ne vèrze nantra: solo che a vardemo cussì tanto la porta sarà che quasi quasi ris-cemo de no védare quela che se ga verto par noantri.
On zerto Lorenzo, pensionato de 69 ani, no soportava l’idea de restare co le man in man, na volta ’bandonà el mondo del lavoro: contro tuti e contro i soi de casa el ga fondà na pìcola casa editrice che, ancora oncò, nonostante la crisi, la continua a darghe sodisfazion. Francesco, ’pena finìa l’università el ga passà inutilmente ani a zercare on posto de lavoro in Italia: inveze de pèrdare tute le speranze e de consolarse disendo “ormai”, el ga deciso de emigrare e afrontare l’aventura; apena el ga inparà la lingua che ghe mancava, el xe tornà in patria e subito el ga catà on posto de lavoro so na dita de esportazion.
Ghemo savesto de un omo sposà, poareto, che ’l xe restà da solo in poco tenpo e che el s’à catà co le buele in man e no ’l savéa pi a che acoa trarse, parché no ’l jera gnanca bon de farse du ovi de fritaja rognosa. Ben, có ’l se ga visto ridoto tristo da far scareze, par via de grissini e formajo de quasi ogni giorno, inveze de dire “tanto, ormai!” el s’à armà de corajo e dài oncò e dài doman, el ga inparà a farse da magnare che ’desso el podarìa vèrzare na tratorìa da quanto bravo che ’l xe deventà.
On giorno, su sta question, ghemo sentìo on prete dire che la parola “ormai” la xe na biastema, la xe na forma de pecato sociale che bisogna evitare a tuti i costi, parché la xe na ofesa contro el dono misterioso de la vita, la xe na rinuncia a sognare e a crédare de poder realizare quelo indo’ che se crede. Podemo dire che sto prete no ’l ga tuti i torti parché, vardando pi in largo e in longo, se disemo “basta” e metemo in pràtica l’”ormai”, se ferma tuto nel mondo, no canbia pi gnente, soratuto no se riesse a indrizare gnente de quelo che xe storto: i soprusi, le ingiustizie, la violenza, l’aroganza, la delinquenza… i gavarìa lìbara circolazion par mandare in balon ogni tentativo de salvare na civile convivenza, par el ben de tuti.
Al contrario, anca se no l’è on balar da carnevale, montando la peagnara de la bona volontà, a costo de dire i sequeri, se pole catarghe l’anzin e rimétare in sèsto anca na vita desperiolà.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Mai dire “ormai”…
Se xe vero che le parole le xe piere, eco na piera da lassare indove che la xe par tera, eco na parola che xe mèjo non dire, parché la xe nemica del vardare ’vanti e la ne inpedisse de progetare e de realizare quelo che serve pa ’l presente e pa ’l futuro
de Mario Sileno Klein
Da Verona
Paolo Caliari… el Veronese
de Wanda Girardi Castellani e Mirco Castellani
|
