Da San Giorgio in Bosco (PD)

El schèetro

Anca Ivano so ’l so studio-anbuea­torio el ga, picài su i muri, tanti carteuni col corpo umano

E dopo ’l ga anca on schèetro, beo grando.

Come ogni massajadore che se ri­speta, anca Ivano so ’l so studio-anbuea­torio el ga, picài su i muri, tanti carteuni col corpo umano speà e sbre­gà in tute ’e maniere. E dopo ’l ga anca on schèetro, beo grando, rigorosa­mente de plastica. Da coalche mese el ga assunto come aiutante na dotoressa rumena, bea fiòea che, pa rìdare, ’a ghe ga messo in testa a Juri (el schèetro) na peruca ceéste-ciaro che ’a ’o fa, se pos­sìbie, ’ncora pi orendo: pare che ’l gapia so ’l zhucato na mufa cu i fìi lunghi.
A mi el me ga fato rìdare de gusto l’ultima volta che so’ ’ndato là farme el taliando de ’a schina, ma no ga ridesto par gnente Bepi M., madegoto romai senzha speranzha, se mai la ga bia, e trato al càncaro, che vedéa Juri pa ’a prima volta parché pa ’a prima volta el ghéa ciapà el corajo de spéndare schei da Ivano pa farse métare a rejime el so ossario descunìo da i doeuri.
’Pena rivà drento, dopo ’ver ilustrà i so dani, el ga spaeancà i oci vardando Juri, e ’l ghe ga dito a Ivano:
− Ciò, sacranon, no sarìa mia mèjo che te scundissi na s-cianta chea “morte” là? ’A me varda mae. No ze che ’a me parèce de ’e brute maedission, fin che so’ coà?
Ivano, ridendo soto i bafi, ché ’l ghea capìo ’l bèrgamo e ’l ghea voja de torlo in giro, el ghe ga podà on traverson bianco su ’e spàe de Juri che ’desso, so l’intravédare i spuncioti di i ossi da soto ’a téa, el paréa ncora pi terìbie:
− Vàeo ben cussì? ’Ndemo, ’ndemo! Sta’ chieto! Coesto ’l ze on schèetro bon fa ’l pan. El jera de Toni Zanèa, el mèjo omo de ’a tera! ’Desso però despòjate, bùtate coà co ’a panzha par basso che te lavoro!
Senzha pi parlare, Bepi el ga ubidìo ma, fin che ’l trafegava pa pareciarse, el ghea na facia che fazéa capire come che ghe girasse in pressa i rochèi in te­sta pa rapetarse co ’a so logica e dopo ’l ga tacà:
− Toni Zanèa da… Varda che mi, da pì­coeo, ’o conossìa. Ma coéo ’l jera senzha dinti!
− Difati no l’è lu, ma naltro. A ghin’è in volta on mucio de Toni Zanèa!
− Ma ti come gheto fato ’verlo?
− Me ’o go fato dare dal bechin. Có ’l tira sù da ’a busa i schèetri, quìi mèjo con­servài e co tuti i so tòchi justi, el ghi ’i vende a chi che i ghe ocore pa studiare, pa fare ’e messe nere, pa aredare ’a ta­verna e tante altre robe insoma! Basta pagare e te cati coéo che te vui! A propo­sito: ti che te si senzha dinti e senzha den­tiera, no ti ghin vurissi mia una de se­conda man, coasi nova?
− Bruto lazaron ti e anca lu! ’Desso go capìo ’ndove che ’l ga catà i schei pa con­prarse ’a Mercede nova, sto fegura porca!
− Ma parcossa t’intavànito tanto, pro­prio ti che te ghe cavarissi ’a pèe a i peoci se ’a vaesse schei? Te par justo trar via ’a roba che poe servire?
− Bruto sassin de on porcon! A sarà mèjo che ghe fazha vèrdare i lòcui di i me veci pa saère se i ghe ze ’ncora drento. Che no me càpite de conprarghe i fiuri e de pagarghe ’a corente de ’e lumiere a du bussoeoti udi!
’Lora Ivano ga capìo che ’e so ciàcoe màcabre e sureài garìa tacà saer da bru­sin, se ’e ghesse fato raisa inte ’a zhuca de on madegoto bauco e sparla­cion: co sti ciari de luna de privacy, de ULS e de tute chealtre rogne che podéa capitarghe so 'a copa. Jera mèjo par lu de darghe on tajo co ste siochesse e de convìnzhare Bepi che ’l ghe ghea contà sòeo on poche de bàe tanto pa rìdare.
Ma Bepi el ghéa senpre visto i schei come l’unica cucagna de ’a vita e tuto coéo che garìa podesto farghe far schei a lu e a chealtri, in coalsiasi modo, el jera vangèo da no métare gnanca in discussion:
− Zherca, zherca de scòndare, ti, ’desso! E magari si anca soci inte 'l traficon in­dove che ti te ghe cati i massajaduri che conpra!
− Ma sito mato! Varda che ze fora leje tegnere schèetri veri. E po’ ’l mio el ze de plastica. Vàrdeo puìto!
− Che ’o varde puìto anca! Parché l’è poco bruto, dio-te-benedissa! Comunque sta’ tranquìo! Mi no go visto gnente par­ché mi so’ jente che no parla!
Difati, dopo du dì, ’o saéa tuto ’l paese.

[torna sopra]