|
Editoriale
Par chi va e par chi resta… che l’istà la sia na festa!
Oncò se vive de parole, de auguri, de promesse e de prevision pi che de fati concreti. E ’lora, par no ciaparse fora, disemo la nostra so sta calda stajon estiva invià partire…
 | Auguri! Che la sia na bona istà par tuti!
|
Ormai ghe semo, anca se ossessionà da l’anticiclone Caronte: on giorno con “tanto sole, caldo al Nord e temporali violenti al Sud”, nantro giorno “violenti temporali in arrivo al Nord, grandine e trombe d’aria…” Cussì se presenta quela che na volta ciamàvino “la bona stajon”.
Gnente de novo, dunque, soto el sole, ma “novo” pole èssare el modo de nare incontro a i giorni segnà te ’l calendario de Lujo e Agosto. Metémose in testa, oltre al capelo par no ciapare la solana, che dovemo spèndare al mèjo possìbile sto nostro tenpo, magari sognando de navigare “per mari mai visti”, anca se dopo te te sveji becà da na sginzala e te te cati… t’on lago de sudore!
Co ’l caldo, sognare mari e monti no xe proibìo: xe fadiga pensare al laorare, studiare, magnare, caminare, respirare, dormire… Xe mèjo pensare al fresco, al riposo, al straviarse fora…
No sò parché, ma ogni istà che riva la te fa ricordare quela de l’ano prima, anca se ghe xe poco da confrontare: caldo tòrido, crisi incalzante, prezi a le stele, anziani a ris-cio… No se presenta grandi canbiamenti e senpre preciso xe l’òbligo de èssare felici.
Disemo subito che no xe fàssile, ma ’l xe necessario, parché la roa del molin del tenpo la gira, la gira senza mai fermarse e la màsena tuto e tuti. No se pol scaparghe, no se pole ciamarse fora: el giro l’è quelo, sia par l’omo che pa ’l musso, sia par la dona che par la galina… La mèjo roba da fare, quindi, la xe quela de stare nel giro de la roa, acetando quelo che Dio te manda, conpreso el caldo de l’istà.
Che ’l scravaza o che s-cioca el sole, xe mèjo, dunque, ciaparse on posto in prima fila in riva a sti du mesi de Lujo e Agosto, ma non solo par riposarse e par canbiare el colore de la pèle, rosténdose al mare o scarpinando su sentieri de montagna. El ponsarse no ’l ga da deventare el tenpo insulso del non far gnente, ma el tenpo del fare de tuto… quelo del créssare drento, ’ndó no riva el sole, ma indove riva ben la parola scoltà, leta o scrita, quelo ’ndó riva l’arte, la poesia e la beleza de la natura, mai vardà abastanza.
Dovemo pensare anca che l’istà, purtropo, no la riva par tuti te la stessa maniera. Ghe xe chi xe blocà in casa, sarà sù te la morsa de na tremenda solitudine e no cata la forza, la voja e l’aiuto par rónpare la bariera che lo separa dal mondo in corsa…; ghe xe chi fa parte de i “nuovi poveri” e fasendo i conti del mese no ghe resta un sisin par permétarse na vacanza…; ghe xe chi che xe stà colpìo da na malatìa e anca se el xe fora de l’ospedale no ‘l xe ne le condizion de nare in mezo a la gente…; ghe xe chi inveze el xe condanà te on leto, circondà da òmani e done in càmise bianco ma no i xe camerieri de albergo a quatro stele…; ghe xe chi ga infranto le règole del vìvare civile e el se cata al fresco te na bojosa; e ghe xe tute chele categorìe de persone che vìgila su le vacanze e sul riposo de i altri.
Insoma anca in sta stajon… el mondo el xe come on careto de fen, dove xe inportante che el carico el sia ben spartìo tra davanti e dedrìo, senò el fa caolieva. Cussì xe la vita: chi pole, chi ga, chi va in vacanza ga da fare equilibrio con chi no pole, chi no ga e no va in vacanza.
Volemo on’istà felice? Tegnemo soto controlo el peso so ’l careto de l’istà nostra e de i altri.
A volte, se pol fare vacanza anca stando fermi (vacanza interiore!), riorganizando i propi pensieri, rispolvarando veci sogni o… dàndoghe da bévare a i fiori o a l’orto de i vizini de casa.
Volemo che l’istà la sia na festa? Contentémose anca del poco che gavemo, no desmentegando mai che l’istà xola e l’inverno el camina a passo lento.
Ghe auguremo a chi va e a chi resta, che l’istà la sia na festa!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Par chi va e par chi resta… che l’istà la sia na festa!
Oncò se vive de parole, de auguri, de promesse e de prevision pi che de fati concreti. E ’lora, par no ciaparse fora, disemo la nostra so sta calda stajon estiva invià partire…
de Mario Sileno Klein
|
