“La Sguaratà” - Ciàcole adriote

Dó rode e tanto verde

Cara bicicleta… La ne va mai zo de moda, ansi! Có se sente le rece intronbà dal bacan de le moto, e de le motorele col motore trucà, se manda subito maledission a chi ne molesta e se benedisse chi ha inventà le dó rode silenziose, oneste e amiche.
Le ne disturba nessun, le te porta dove ca te le comandi, le te rispeta co fedeltà e amicissia in t’i to programi e traguardi.
L’istà la core e sta opression fora regola, portà dal caldo african e dal nostro poco rispeto per el creato che à fato aumentare l’ozono e i gradi del termometro, la ne invita a sercare un fià de aria e de fresco, verzendo le finestre, spece soto sera, perché passa chel bìgolo d’aria ca caressa la giornata. Mah!
Ma fora core moto e motorele fracassone per métere in mostra la spavalderia e l’ignoransa spece de chi, sensa personalità, vol farse notare come canpion pur essendo fora pista e, comunque, restando solo meza cassola ca se tira drio fis-ci e maledission da tuti.
Che bela la gioventù! Serto, ma se l’è vissù co inteligensa e nel rispeto de chi te sta atorno. E qua, in presensa de tanto stupido bacan, se valoriza e se benedisse più volentiera le dó rode, cuntando de gustàrsele quanto prima possibile.
Un bel giro tranquilo in canpagna, su le strade ca costegia i àrzeri de i canài silenziose, tranquile, verdegianti.
Eco ca se gusta senpre de più sti progeti de formassion de le “piste ciclabili” e se richiama magiormente la necessità de slargare el “verde” co alberi e piante e, se in cità, co fioriere e fontane.
Se lamentemo del cemento che invade e avansa. Giusto, perché el ne cava el fià, rovinando paesagio e quadri canpestri. Ghè esigense de fàbriche e
case, ma ghè anca necessità de giudissio, da parte de chi comanda, nel concédere permessi ca rispeta l’anbiente. “La to libertà la finisse dove ca scominsia la mia” e, se a ghè l’esigensa de costruire, ghè anca quela de lassare respirare la gente.
Vien giusta la “Festa de l’albero” e la sapiensa de chi mestri ca insegna a i so aluni a volerghe ben a la natura magari faséndoghe piantare de i fiori e insegnàndoghe anca a curarli.
L’albero l’è sovrano perché, co i ani el cresse, el se alsa e el rinova le so foie onbregianti co puntualità, regalando fresco, pace e tranquilità.
Có tira aria l’albero se move e el parla co un sussuro poetico ca riva al cuore. L’è discreto e el scolta le to pene quando ca te ghe le cunti sentà soto de lu. L’è un amico sincero.
E, dunque, a la luce de tute ste bone doti, perché no ripensare, come paesi e cità, a colocare novi alberi, dove che qualche spassio lo conceda, miliorando la vita a tuti quei ca pole e podarà beneficiàrghene in tel tenpo?
Le dó rode trovarà più amici sui so sentieri e, noialtri, tornaremo a respirare un fià mèio, rendéndose conto che la vita l’è bela anca sensa automobili, sensa moto fracassone e sensa muri ca cava el respiro e, spesso, anca… la vita!

[torna sopra]