|
Da Verona
Le giassare
 | La giassara de Griez: costruida intorno al 1870, l’à funsionà fin al 1935-36.
|
Girando par la Lessinia ogni tanto se pol incontrar de le strane casete circolari. De solito le ga ’na diesina de metri de diametro, un querto spiovente de lastre de piera e, sul davanti, ’na porta streta e squadrà. ’Na alga? Un puinar? Un fienil? Cosa èle? Ve lo digo mi: i è giassare!
Pochi ormai i ghe pensa, ma, fin a quando no’ s’à inventà el frigo col motor elètrico, conservar el magnar l’è senpre stà ’n problema… e un problema antico come el mondo! La carne te pol salarla, i formài te pol stagionarli… tuti sistemi che pol ’ndar ben in canpagna, ma no’ ne le çità, specialmente da quando che le à scominçià a créssar de dimensioni. Cusì i veci frigo i funsionava diretamente a giasso. Un bel lastron de giasso sul fondo el te garantiva el fresco anca par ’na setimana!
Qua a Verona, par esenpio, le lastre de giasso le rivava da la Lessinia. Za fin dal ’700, par far fronte a la richiesta senpre più grande da parte de la gente, era nata su i nostri monti ’na vera e propria industria del giasso. Eco alora come la funsionava: vissin a ogni giassara ghèra un lagheto (ciamà “pozza”) scavà a man nel teren fin a ’na profondità de ’n metro. Durante l’inverno ne la “pozza” ogni giorno entrava un po’ de aqua de fusion de la neve e regolarmente ogni note el strato el se ingiassava. Suparzó ’na òlta a la setimana i “giassarói” i scominçiava el so laoro: ghe voléa ’na diesina de montanari bei forti… con de le seghe (ciamà “segure”) el giasso del lagheto el vegnéa tajà in lastre longhe un metro par 10 cm de spessor… po’ le lastre le vegnéa fate scórar su de le asse fin a la giassara dove pian pian le vegnéa calè zo!
Eh sì… parché soto la caseta circolare se verzéa un pósso fondo anca 15 metri e ogni nóva lastra la vegnéa comodà insieme a le altre fin a far un strato uniforme (el “solaro”). Ogni solaro finì el vegnéa separà da quel dopo con paja e foje parché le lastre no le se incolasse tra de lore. Proè a pensar cosa ga da èssar stà laorar d’inverno in fondo a ’n pósso pien de giasso. ’Na òlta piena, la giassara la vegnéa serà e lassà star fin a l’inissio del caldo. Alora scominçiava la seconda parte del laoro de i “giassarói”: portar el giasso da i 1000 metri de la Lessinia fin a la çità. Vegnéa usà de i careti speciali fati de fero: le “carete”. Con de i àrgani (i fusèi) se tirava su le lastre e se le comodava “a cortel” (cioè de tajo) su la “careta”, usando paja e strasse par isolarle ben. Dopo se partiva. De solito la strada la vegnéa fata de note e ’l caval el le conosséa talmente ben che el giassaról intanto el podéa ris-ciar de farse ’n sonelin. ’Na particolarità de la “careta” l’era la “macànica”, cioè el fren! Tegnemo presente che la strada da far l’era tuta in dissesa (e anca ripida) e se no’ ghe fusse stà de i boni freni, giasso, careto e caval i sarìa rivà a Verona diretamente in volo!
Quando ne la strada rivava el “giassaról” l’era ’na festa, e de solito i bocia i coréa drio a la “careta” par béar co’ le mane l’aqua fresca che colava zo e portarse a casa tochetini de giasso da ciuciar. De solito prima de métar la lastra ne la giassara se ghe dava ’na rifilada co’ la “gratacheca” e quel che vansava se se lo magnava in amarena!
Contemo che ’ste robe le sucedeva d’istà, e che a l’epoca de gelati no’ se ghe ne vedéa mia tanti. El periodo d’oro de i giassarói l’è sta l’800… Verona in quei ani l’era piena de austriaci e tra caserme e gente che ormai podéa permétarse la bisteca, el consumo de giasso d’istà el cresséa ogni ano senpre de più.
Co ’l ’900 finalmente è rivà ne le case la corente elètrica e dopo è tacà a spuntar come fonghi i frigoriferi. I primi (come quel che gavéa in casa da me nono) i era “bivalenti”: elètrici sì, ma un bel tòco de giasso te ghe lo infilavi istesso. Ne i ani ’60 ormai i frigo grandi o pìcoli i era tuti de tipo moderno… e le giassare alora i è stà ’bandonà, deventando el più de le òlte de le patumiere dove butarghe dentro de tuto e de più. Çerte i è crolà. Çerte i è stà smantelà, lassando solo un lagheto orfano. Ma çerte i è stà restaurà… come quela de Griez, trasformà con amor in un vero e proprio museo, par no far morir nel desmentegon l’epopea de i giassarói… e el ricordo de quando i nostri frigo i funsionava a giasso!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Par chi va e par chi resta… che l’istà la sia na festa!
Oncò se vive de parole, de auguri, de promesse e de prevision pi che de fati concreti. E ’lora, par no ciaparse fora, disemo la nostra so sta calda stajon estiva invià partire…
de Mario Sileno Klein
|
