Da la Bassa Veronese

Francesco Favalli

El professor Francesco Favalli.

El prof. Francesco Favalli insieme a la so Dina e a i fiói Maria Concetta e Paolo.

L’amore par la so tera e la passion par la cultura ga fato de Francesco Favalli
un benefatore de la storia de San Piero de Morubio
Quando torno a San Piero, iè tante le persone che go nel cor e che senpre vedo volentieri, soratuto quele vizine a la canonica, de quando mi era buteleta. Con quele ghè ’n’amicizia de fondo che no se scancela mai. No ve fao l’elenco, me fermo a parlare solo de una de queste che l’è el professor Francesco Favalli, co’ la so fameja.
Anca se se vedemo ciare olte, l’è come s’avéssimo lassà solo da on’ora. Oltre al saludo e a na streta de man, la prima roba che Fran­cesco el te ofre l’è el so soriso largo, sereno. Distinto ne la figura, co ’l so parlare calmo e sotooze co tante pause, on po’ svagà in te i oci da “pensatore”, el te coinvolge in pieno co la so comunicativa, par la dote che ghe vien da i so studi in pedagogia e da l’esperienza de pi de quarant’ani de insegnamento.
Francesco Favalli no ’l ga avù na vita facile: orfano del papà da l’età de tri ani, da studente l’è stà ospite a l’Istituto de San Giovanni Calabria e anca al dì de ancó el ga on legame speciale co sto anbiente che l’è stà a la base de la so formazion spirituale e culturale.
Da zóeno studente, d’istà l’andava a laorar al zucherificio de Legnago, po’el s’à dedicà a l’insegnamento, prima ne la scola media e, dopo la laurea in pedagogia, a le scole superiori.
L’è senpre stà on generoso d’animo e, ’pena che l’è stà lìbero da i inpegni de la so profession, el s’à dedicà co’ entusiasmo e passion a opere de volontariato e de ricerca, passando giorni intieri tra l’archivio de Stato de Verona, l’archivio de la Diocesi e i archivi parochiali locali.
Dopo tanto laoro el prof. Favalli l’à cussì fato dono al Comune e a tuta la comunità de San Piero de ben tre libri: el primo, nel 1994, sul filosofo morubiese Alberto Caracciolo (1918-1990), “Alberto Caracciolo: una vita all’insegna della ricerca”, libro integrà pi tardi, nel 2000, a diese ani da la sconparsa de Caracciolo, nel tentativo de rèndare pi capìbile el so pensiero filosofico: “L’orizzonte umano e filosofico di Alberto Caracciolo. Testimonianze”.
El secondo libro, edito nel 1995, l’è pieno de notizie storiche locali, con abondanza de citazioni: “Ricerche del passato di San Pietro di Morubio e di Bonavicina” con la copertina del pitore Charlie.
El terzo libro, del 1997, su richiesta del pàroco don Bruno Zuccari, l’è stà fato par i 200 ani da la consacrazion de la cesa: “La chiesa parrocchiale di San Pietro di Morubio – Sua origine e descrizione”.
Ste opere le vien consultà in continuazion da tanti studiosi.
Anca adesso, sostegnù da l’amorevole cura de la moier Dina Menini, senpre al so fianco, el prof. Favalli, ligà come l’è al “Don Calabria” l’è inpegnà a scrìvare articoli e “saggi” su varie persone.
Cussì i nostri ricordi pi cari i resta vivi e pieni de gratitudine par ci n’à fato del ben e iè stà i nostri veri educatori, come el pàroco don Luigi Mozzambani, i maestri e le maestre de scola, el dotor Ferdinando Caracciolo che n’à curà la salute e so fiol Alberto, filosofo.
Disemo grazie al prof. Francesco Favalli par la so cultura, par l’amore che ’l ga par la nostra parlata e par quel che’l m’à dito, saludandome: “El dialeto l’è el fondamento de la nostra civiltà. La parola in dialeto l’è fresca e ciara pi de l’italian.”

[torna sopra]