Da Vicenza

L'Angeina

Có rivava la brentana, me popà el se infilava i stiva­loni alti de goma par ’ndare ’vanti indrìo.

Ani che fu, có stàimo drio el canàe, a ne stava, sora de casa, na veciota de nobile casato, poarèta ancora de più de nialtri, ma che a ne voleva on ben mato. La se ciamava Angeina e la jera me sàntola de batezo.
A queo che me ricordo, la go senpre vista griza patoca, co ’a facia rinsechìa, i oci boni ma lustri, dó calamari scu­ri che la paréa na morta. La vestìa senpre de nero, co ’n coletin de smerlo bianco che ghe ris'ciarava la facia. Le so man le jera lunghe, co i dèi sechi e pieni de gnochi par colpa de l'artrite, squasi senpre giassà ma, có la me strenzéa a ela, la sentìo parfin molesina e calda, tanto ghe volevo ben.
Có la parlava a nialtri toseti, no la sigava mai, la dizeva le robe sotovosse, dasio co ’1 fare de ’a maestra.
Casa sua la jera freda, ma freda, che có ’ndavo sù me paréa da èssare fora, soto l'aqua o la neve. Parò la so por­ta la jera senpre verta par tuti. Anca se la magnava, de ’e volte, ’pena on tòco de pan discalso, a no sò come, có gavevo fame, la rancurava senpre calcossa anca par mi.
Có rivava la brentana e me popà el se infilava i stiva­loni alti de goma par ’ndare ’vanti indrìo, ela la ne trovava on postezin par tuti, par dormire e par magnare.
Parfin có la dormiva, la ’o fazeva sensa bordelo, ansi, a no me ricordo gnanca se la gavéa tenpo par dormire, có la ne gaveva sù.
Fato sta che par mi la jera na festa có casa mia rivava l'aqua, anca parché l'Angeina la me faséa lession sentà in gaja, sensa mandarme scola e, co ’l paletò indosso, a no sentìo gnanca el fredo.
’Ntanto, zo dabasso, me fradèi più grandi co me mama e me popà, i sercava de rancurare el più possìbile le robe 'ndà in aqua. Quanti libri de scola, co i foji zali e roinà, a gavemo sugà te ’l fogolaro!
Tante carte le sparìa, anca drìo el canàe e la me paréa, sta qua, squasi on'aventura che me tegnéa sveja a imaginare ’ndove che le gavarìa possudo ’ndar finire.
Passando ’1 tenpo, go capìo che na lession granda che me ga dà i mìi e me sàntola Angeina, xe stà quela de ’nparare a èssar poarèti sensa pèrdare la dignità.
Se se gaveva manco, bon, se magnava manco e, ansi, se dava istesso calcosseta a chealtri che ghin’avéa biso­gno.
Có ’ndàimo sù da me sàntola, ela la ne trovava senpre on bòcon da rosegare.
Me mama, poarèta, par conto suo, có ’1 mestiero de lavandara ghe ’o permeteva, la metéa senpre da parte on pignatin de brodo o supa de fasòi par chèa pora dona che ne stava dessora.
Mi ’ndavo sù, zolando da la contentessa, co la me teceta de roba calda in man e l'Angeina no la gavéa serto bisogno de rengrassiare: i so oci me vardava boni e le so man sute le me caressava la testa, co tenaressa. A jera bastansa!
La xe morta na sera, pora Angeina, tuta sola, ingramegnà cofà on muceto de stras­se, sensa scomodare nissun.

[torna sopra]