|
Da San Giorgio in Bosco (PD)
Justizhia somaria
I amizhi uno si ’i sèlie e se sa che i ga diverse gradazhion inte ’a to anima fin che i dura, come l'amore. Quìi che te lauri insieme, te ti ’i cati tacài, gumio a gumio, e magari co luri no te ghè gnente da spartire, ma te toca adatarte e zhercare de ’ndar d'acordo pa tirare sera e pa no vìvare rabià par gnente, se te ghè bisogno de goadagnarte ’l pan. No tuti però ga sta fiosofia e i se beca tra de luri come i famusi capuni de Renzo inte i Promessi sposi.
Jera da ’l Setanta e, pa' diversi misi de l'ano, laoravo inte on mobiificio come vernisadore pa ciaparme i schei pa l'università. On dì, poco prima de 'a sirena de meodì, fin che Berto, in copia co mi, lavava ’a pistòea co l'acetone, mi so’ partìo co 'l carèo a ’ndar tore pa 'l dopomeodì ’e sòite late de vernise e de cataizatore in magazin e, come senpre, ghe so’ passà rente a i banchi de 'e lustrine che pajetava tòchi de mòbii: pore tose, senpre piene de pòlvare. Una de lore, conossùa pa 'a pi bataliera, ’a me fa:
<<Te si ti che da coatro dì te ne cuchi i panini, vero?>>
<<Mi? Coài panini! Ma de cossa sìo drio parlare!>>
<<Sì, proprio ti che co 'l carèo pa 'a vernise te vè indò che te vui!>>
No go bio gnanca 'a forzha de inrabiarme, tanto l'acusa jera cussì ebete!
<<Dài, tose. Cossa zéo, on scherso?>>
<<Ciàmeo scherso! Co sto scherso coà ze coatro dì che a meodì restarìssimo senzha magnare se i amizhi in mensa non m’in desse del suo, porco... e fora!>>
<<E ’lora poche ciàcoe! Se vuì saere chi che ve ciava i panini, fé presto! Doman metighe ’a purga so 'l pan e vedarì che prima de sera da coalche parte el gàeo cantarà.>>
<<E cossa ghe metìmui so 'l pan?>>
<<Racoante josse de gutalax che l'é trasparente e senzha odore!>>
Sto pensiero dopo me conpagnava ’ndando casa in bicicreta: - Pore tose. ’E gnen da distante laorare, nò che a meodì ghe tocarìa stare a boca suta se chealtri operai in mensa no ghe inpienasse ’l piato co racoante spironàe del suo. Ma sta storia no poe durare! Chi saràeo chel bruto animàe!
El dì dopo passo da novo tacà i so banchi co 'l carèo:
<<Varda che ghemo fato come che te me ghè dito ti e i panini ze za sparìi.>>
<<Anca oncò? E coanto ghin'ìo messo?>>
<<So sìe panini? Co chea rabia che ghemo? Tuta ’a butilieta!>>
<<Ma, cristo-dio, voaltre si mate ’a testa! No saì mia che 'l podarìa 'assarghe ’e strazhe!>>
<<Mèjo! Sto maledeto!>>
<<Sentì coà! Vardé de tasère co tuti e, se sucede calcossa, almanco zherché de no fare ’l me nome, senò i me para via a peàe, visto che so’ aventizhio!>>
Altro che tasère! Cò so tornà in fàbrica, poco prima de 'a sirena de on boto e medo, ’o saèa tuti. Tuti ridèa e spetava co ansia ’a novità-evento. Dopo, laorando, co 'a coa de l'ocio tuti controeava tuti drento i sie capanuni, I cessi jera tendùi cu i oci da film western e se coalchedun ghea bisogno, el tegnéa duro pa no èssare ’l primo ciapà de mira. Dopo on'ora, pa on porton dadrìo d’i capanuni ze vegnesto drento Checo C. menando i brazhi come on muìn a vento e zhigando:-Spandicòncime!- ’Lora tuti ga capìo e 150 persone ga tacà rìdare co a boca da na recia a chealtra, senzha na paròea, inùtie in medo el bordéo de 'e màchine. ’E tose d’i panini paréa che ’e ghesse ’pena vinto na lotarìa e mi me so’ vergognà che tuti fusse cussì continti. El jera uno che lavorava co Checo so ’a sega da taje: grando e grosso che se dava arie da gradasso, ma mi ghea parlà co lu e ghea catà na anima gentìe che se coerdìa co na màscara brutàe pa no parere déboe. Verso sera, poco prima de ’a sirena de 'e sìe e meda, so’ ’ndà tòre on bidon de diluente da i fusti tacà ’e cataste de toeuni. Checo jera so ’l so posto, tacà ’a sega e ghe fazho:
<<Indoe zèo?>>
E lu, inalbarà come on gaeo da semenzha:
<<Vàrdeo là! Diciotto volte!>>
Giro ’a testa, vardo so 'l passajo in medo ’e cataste e vedo in fondo sto poro can, in pìe e piegà a scoàra, co' ’e braghe su i danoci e, in contro-soe, culpi de spray, trasparenti come l'acoa.
Dopo, ’ndando casa, ghea indosso sòeo on senso de disilusion verso tuti i bei conceti de tute ’e fiosofìe del liceo che coà ’e jera fantasmi inte ’l homo homini lupus! ’Lora go capìo che jera ora che me svejasse.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Pensare a la morte
Pi che na sagra… sto argomento el xe on pugno ’nte ’l stómego, però… se uno no ’l se mete in testa che tuto a sto mondo ga on prinzipio e na fine, o ’l podarà mai pensare che in coalsiasi momento el pole nare in catinora. Tegnere distante sto pensiero vol dire avere paura de vìvare.
de Mario Sileno Klein
|
