|
Da Tombazosana (VR)
Cari ricordi
 | | Me mama “Berti”. |
Cari ricordi de me mama Berti, sinpaticona e stranfugnona, che, se la fusse ancora al mondo ancó, la gavarìa zentosedes’ani. L’era na dona sinpàtica assè; ela l’avéa fato solo la seconda elementare, ma l’era na dona brava da far i so conti con i botegheri e ghe piaséa lézar qualche giornale. Ela la parlava senpre in pressia e, tante olte, la vegnéa fora con qualche spropòsito, che la te faséa morir dal rìdare. La laorava assè, co na famejona de oto fiói e l’era senpre de corsa.
Na sera de otobre èrimo soto al pòrtego che desgarbujàino le panoce de la polenta. Fora no se sentéa gnanca un can; la gente l’era serà sù in casa. Scominziava a far frescheto, cussì noantri buteleti e me zia con me mama se faséa filò. Salta fora la Berti, disendo:
“Senti che silenzio, se sente che i tani i va ne la rata”. Ma ela la voléa dire che i rati i va ne la tana.
Nantra olta, mi che gavéa oto ani, a ghe digo:
“Mama, posso netàrme le scarpe bianche co la biaca?” La biaca l’era un liquido bianco che i vendéa par netar le scarpe bianche. Ela la me risponde: “Nò, parché te te inpasti tuta, lassa stare che le to biache te jé incorpo mi.” Ma la voléa dire: “Lassa star che le scarpe te jé sbianco mi.”
Mi, quando ò conpìo sedes’ani, me opà, Tano, el m’à regalà na màchina da cusir che faséa i miracoli, parfin la tacava i botoni e la faséa le busete. Me mama l’à catà le so amiche e la ghe conta sto fato, tuta contenta e la ghe dise:
“La Carolina l’à ricevù un bel regalo da so opà: na màchina da cusir nova, ma pensè che la fa i botoni e la taca le busete, inveze de dir: “la fa le busete e la taca i botoni.”
A noantri fiói la ne racomandava de tegner la cardenza serà parché “el cicio el magna el gato.” Ghera propio da rìdar; el belo l’è che, quando la se ne incorzéa de i sbali, la ridéa anca ela. Na sera de un sabo, me sorela Dorina l’era fora davanti al portel de casa co ’l so moroseto; oramai l’era mezanote inoltrà; me mama l’è nà fora un par de olte par ciamarla e racomandarghe de vegner in leto, parché la domìnica matina la naséa a messa de le sié, cussì la Dorina la dovéa svejarse presto par darghe da magnar a le galine; in chei ani, par prepararghe da magnar a i mas-ci, se ghe metéa le sémole su un seciar e se ghe butava de sora l’aqua de bojo; cussì vegnéa fora un inpaston e questo l’era el magnar de i mas-ci.
Cussì la Berti l’è nà fora par l’ultima olta, rabià, a ciamar de novo la Dorina e la ghe dise:
“Guarda che doman, quando vegno a casa da messa, voi catar le galine magnà e i mas-ci broè.” La voléa dirghe che la ghe desse da magnar a le galine e broarghe el magnar del mas-cio. Cussì la Berti la s’à incorto del discorso balordo; la s’à vergognà e l’è nà in casa co le man su la boca. Quanto rìdar che emo fato con me mama Berti!
Ghe n’avarìa da contar tante altre, cussì vegnarìa fora un bel libro de barzelete.
Ciao, cara mama stranfugnona! T’emo volù tanto ben!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Pensare a la morte
Pi che na sagra… sto argomento el xe on pugno ’nte ’l stómego, però… se uno no ’l se mete in testa che tuto a sto mondo ga on prinzipio e na fine, o ’l podarà mai pensare che in coalsiasi momento el pole nare in catinora. Tegnere distante sto pensiero vol dire avere paura de vìvare.
de Mario Sileno Klein
|
