|
Da Lendinara (RO)
Anca sta volta la ne xe andà sbusa
 | | Qua la ne xe andà ben, ma chela volta là… la ne xe andà sbusa! |
Semo ciamà a sonare a ora de disnare, in un matrimonio in quel de Treviso. A la fine de le nostre fadighe, ghemo i conplimenti da tuti i presenti e, soratuto da ’na siora, che la se presenta come organizatrice de feste in tuto el Veneto. De bota calda, ciapemo l’ocasion par dirghe che savemo anche cantare ande vèce e gavemo a disposizion un spetàcolo de cabarè musicale. “S’a entremo nel giro de i so concerti” pensemo, “sarìa come vìnzare un terno al loto.”
Partanto, ghe disemo che a Adria, in un dì de la setimana ca vien, fasemo del cabarè e, ghe infiochemo zento e più rason parchè la possa èssare presente al nostro spetàcolo serale. Ela, la ne promete de vegnere in conpagnìa de ’na so amiga.
Qualche ora prima de scuminziare la messa in sèna, tolemo acordi co i organizatori, i quai ne dise che, par el sonoro e la luse i provede lori. Partanto, noantri gavemo solo da métare sù el telon ca ne fa da sfondo. Lo ghemo fato belo grande sto telo blu, co piturà sù ’na meza luna zala, che la ga, sentà su la so ponta più bassa, ’na bela tosa. “El deve fare s-cioco a i oci de i presenti”, se disemo tra nantri.
Provemo intanto a métarlo in sèsto, ma el telo el sta tuto inberlà parchè manca de i pali necessari a tegnerlo sù. Alora qualcun del posto, ne dà de le scóe che le lighemo a la manco pezo e, dopo, sistemà el tuto, ghe demo ’na ociada al lavoro fato. De colpo me casca i brazi a védare ste scóe in bela mostra che le ghe ruba tuta la poesia. La pare più ’na befanada che ’na roba romantica. Intanto che l’ora del spetàcolo se ’vizina, riva la zente e, intel giro de poco tenpo, la inpinisse tuto el bel cortile alborà.
Davanti al palco, ’na stropelà de fiòi i core come scalmanà avanti e indrìo, tirando sù da par tera un gran spolvaron. “Speremo che i la smeta” disemo tra nantri, parchè no solo i se move ma i ziga, come de sòito i fa i pìcoi quando i zoga a córarse drio. Riva intanto l’ora de scuminziare, che xe ormai scuro, tuta la luse del posto la xe stuà, manca anca la luna e le stele, insoma un scuro totale da no védarghe proprio più. Se sente solo i fiòi, che senza rispeto i continua a zigare e córare davanti al palco.
A vèrzare la serata a toca a mi che, convinto de avere luse al momento giusto, vago de corsa in sèna. Scapuzo quasi par tera, parchè no ghe vedo e, penso che l’inprecazion ca me xe vegnù fora da la boca, la gabia sentià tuto el pùblico. Me fazo carajo e tento de lèzare dal me legìo quel ca devo cantare e sonare ma, la chitara nel scapuzo la perde el cavo e, pien de vergona, ghe lo inpiro drento, lì davanti a tuti. “Che figura!”
De bruto me trovo piantà inte i oci un faro che me orba e, no riesso par quanto ca me sforza, de védare la musica. Alora tuto sudà, a taco a cantare e sonare a memoria e, solo grazie a i àngei ca invoco co tuto el cuore, riesso a finire. La luse del faro se sfanta e subito se inpiza quela del palco; zo, su le prime file, vedo la siora de Treviso e me vien fredo da la vita a i piè. E, me domando: “Chissà cossa che la pensa.”
Comunque el spetàcolo el va ’vanti e, intervien el tronbetista che, ciapà da la paura de far bruta figura anca lu, inveze de sonar − e ve sicuro che ’l xe veramente bravo − el ghe mola da la tronba raquante scorezete da farme vegner i penoti su i brazi. Poro can, lu el continua a sonare ne i so dubi musicài, tra la confusion de i boceta che no la smete de rónpare. A sto punto me vien voja de scapare via e, vardando la luse che a sbalzi rossi, viola e celesti ’lùmina la platea, vedo dó careghe vode e capisso che xe la fine de un sogno. La siora e la so amiga se ga stomegà de nantri.
Ma el spetàcolo xe longo e, se anca el ga el sangiuto, el va ’vanti istesso. A sto punto ghe toca saltar fora el fisarmonicista insieme a so mojere e al sonadore de tronbon. Tuti zinque in sèna, co la tremarola che ne ciapa le ganbe, se metemo a sonare ’na gran bela anda che in altre ocasion, ne ga dà tanta sodisfazion.
E, intanto che la fisarmonica vèrze e sara el màntese, la fémena pianze de bruto e, no capisso el motivo del parchè; difati, la roba no xe prevista dal copion. Pora fémena che delusion!
No stago chi a contarve tuto quelo ca xe sucesso dopo, ma ghemo zercà comunque de recuperare al più presto la nostra dignità de sonadori-atori.
’Na roba ghemo capìo, che, quando se tole acordi co la zente del servis, bisogna che questi i conossa ben el copion e le esigenze de nantri artisti. Anca sta volta la ne xe andà sbusa.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Pensare a la morte
Pi che na sagra… sto argomento el xe on pugno ’nte ’l stómego, però… se uno no ’l se mete in testa che tuto a sto mondo ga on prinzipio e na fine, o ’l podarà mai pensare che in coalsiasi momento el pole nare in catinora. Tegnere distante sto pensiero vol dire avere paura de vìvare.
de Mario Sileno Klein
|
