|
Editoriale
No basta piànzare…
No digo che xe inùtile, ma che no basta comóvarse par la tragedia de la discoteca de Corinaldo, durante la festa de le zinque scole superiori de Senigallia e del concerto del rapper Sfera Ebbasta. Le xe tante le riflession da fare, co calma e a… boce ferme: partendo dal 1° de GENAR a ghemo a disposizion on ANO INTIERO. Ma fémolo!
No ne speta a noantri discùtare so le cause de la tragedia de la discoteca “Lanterna Azzurra”: i zinque toseti de 14-16 ani e na mama de 39 che conpagnava la so putina de 11 ani, una de i so quatro fiòi. Provemo dolore, tristeza, partecipazion e tanta delusion.
No xe possibile pèrdare la vita par ’ndare a scoltare musica e l’aria inprovisamente deventa irespiràbile: la calca par scapare fora da la sala, le ringhiere de fero che no tiene e la marea umana che se roversa come na valanga zo dal ponteselo. Se no fusse sucesso gnente… a le 2, a le 4, a le 6 de matina tuti sarìa nà a casa soa. Inveze, xe sucesso de tuto: morti, feriti, paura, confusion, caos, locale soto sequestro e la procura che indaga par “omicidio colposo plurimo”.
’Desso, dopo le làgrime, ocore passare a i tanti interogativi che ga bisogno de risposte.
Le siè vìtime de la tragedia del 7 dissenbre passà, le jera ’ndà a la discoteca par scoltare el cantante Sfera Ebbasta, oci spirità, denti d’oro, gran fame de schei e su la boca parole de rabia par na vita passà ne la disperazion de le periferìe: on vero profeta de la droga libera, del sesso libero e de la dona che no val gnente.
E come lu ghin’è tanti altri e tuti i xe deventà i idoli de i nostri tosi e toseti. Conpagnare i propi fiòi ch’i xe ’ncora in créssare a scoltare na tale bestialità ne mete tanta tristeza: par lori e par i genitori che no i se ga inacorto a che scola che i xe drio portarli.
“Hey troia! Vieni in camera con la tua amica porca. Quale? Quella dell’altra volta...” Xe par scoltare sta poesia qua che xe morti 5 toseti minoreni e na mama ne la tragedia de Corinaldo?
Se pol morire anca a on concerto de Mozart, de Bocelli o de Gianni Morandi. Ma ne colpisse la paura che l’ultimo pensiero de sti toseti prima de pèrdare la vita sia stà quelo de scoltare el vangelo musicale del trapper de Sesto San Giovanni, rapresentante del “vuoto assoluto”, ma che no ga nessuna colpa in quelo che xe sucesso a Corinaldo.
De sicuro i genitori no i savéa che sto tipo de cantanti i invita a disobedire: “Tu sei un babbo di minchia…”, no i savéa che so fiòi dovéa scoltare “inni alla droga libera”, al “sfruttamento della donna”… No i savéa… ma ’desso lo savemo e no se pole pi far finta de gnente.
E anca la lege dovarìa fare la so parte, parché in te on regime dove tuto xe permesso e dove manca on fondamento morale, no ghe xe pi democrazìa.
Adesso che taca l’ano novo, cari genitori,… bisogna fare l’inventario de i modèi de vita che ofre sto mondo e fare de le selte ben precise, recuperando el corajo de dire de nò, de avere prudenza, de avere paura de na parte de socetà che no ga valori morali. Eco parcossa de le volte dovemo voltarse indrìo, dovemo zercare de conóssare el nostro passato o quelo de i nostri genitori, non par tornare a quelo che se jera na volta, ma par vardare con corajo al futuro.
Stemo atenti al male che sta andando de moda: l’ingordisia. Se in chela discoteca, al posto de pensare a i intaressi, radopiando el nùmaro de i bilieti, i gavesse pensà a la sicureza, no ghe sarìa stà sta tragedia. Quando el valore de la vita el vien dopo del valore de i schei, pol capitare de tuto.
Soto sto punto de vista, prima de i tosi, ghemo da canbiare noantri adulti. Prima de i zóvani ga da canbiare mentalità e conportamento i genitori che i ga da èssare na proposta positiva par i fiòi.
L’augurio che se femo xe quelo che sti toseti e sta mama no i sia morti par gnente. Pensémoghe sora e… l’ano novo sarà mèjo de quelo vecio!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
No basta piànzare…
No digo che xe inùtile, ma che no basta comóvarse par la tragedia de la discoteca de Corinaldo, durante la festa de le zinque scole superiori de Senigallia e del concerto del rapper Sfera Ebbasta. Le xe tante le riflession da fare, co calma e a… boce ferme: partendo dal 1° de GENAR a ghemo a disposizion on ANO INTIERO. Ma fémolo!
de Mario Sileno Klein
Da Verona
Ocio a i colori
de Giacinta Dall’Ora
|
