Da Adria (RO)

I buratini

La matina de la Vecia a m’ò catà so ’l bufeto un teatrin de carton e siè-sete buratini de cartonsin tuti ben ritajà con la forbice.

Scolari e maestro davanti al “teatro” co relativi sochi.

Fin da fiolo so’ senpre ’ndà a brasseto co’ la passion d’i buratini. A gheva sinque ani quando par la Befana mi mama la m’à regalà el primo teatrin de buratini. I jera i ani che par i fiòi no se spendeva tante palanche a conprar zugàtoli; la calsa del siè de Genaro la vegneva inpenì a forsa de carate, bagige, stracaganasse, raquanti mandarini, qualche ròdolo de curissia, un spugnoto de caramele e qualche altro sfurisso da pochi schei. Se la mare éva capìo che ’l bocia l’avrìa ’vù piassere de catare qualche robeta particolare, la s’insegnava de farla sù in qualche maniera.
L’è stà cussì che mi madre, lavorando co matita, forbice e filo, de scondon dopo le nove de sera, quando che la n’éva parà in ’eto, la m’à fato catare sul bufeto, la matina de la Vecia, un teatrin de carton grande cofà na scatola da scarpe, co ’l so sipario de tela, el fondale disegnà come na foresta, el so buso par dessora par far lavorare i buratini e, apunto, siè-sete buratini de cartonsin tuti ben ritajà con la forbice. Naturalmente i jera tute figurine rigide che no moveva né brassi né ganbe, ma par mi i è stà na gran sorpresa e par raquanti giorni so’ ’ndà ’vanti a far rapresentassion inventà sul momento, sia ch’a ghesse un pùblico, sia ch’a no ghe fusse ninsun.
Passando i ani e avendo legno e cortelin a disposission a so’ rivà a fàrmene sete-oto, co i so brassi e le so ganbe snodà, co’ tanto de fili par farli mòvere. Naturalmente brassi e ganbe ’ndava solo in sù e in zo ma no i gheva el movimento conpleto de brasso-avanbrasso, né de cuosse, zenoci e stinchi, cussì i jera un tantin inbachetà. I vestiti a gh’jeva fati mi sorela co strassete rancurà in casa, dove mama, nona, zia e nono tajava e cusiva da dosena par uno che vendeva inte na banca al marcà. Co legneti e carton m’ò inconzegnà sù el teatrin e ò scuminsià a fare le mi rapresentassion che de solito, spetatrice mi nona, se concludeva co na bela barufa inte quelo ch’a se serava el sipario.
Baraca e buratini i ga avù vita curta: ’n istà e l’autuno ch’a ga tegnù drio. D’inverno i buratini i è fenì inte ’l serajo d’i ochi, che no savendo cossa fàrsene, i li à spissocà, cavàndoghe le strasse da ’dosso, e ’i à scagassà pistàndoli par ben soto le so sate larghe.
Par un pochi de ani i buratini i è andà in desmentegansa. L’ocasion par tornare al teatro l’è rivà el primo ano de ruolo inte le scuole de Rotanova de Cavàrzere. Mi e la me squadra de malabiati emo scuminsià co ’l prepararse la cartapesta. Suna sù giornài veci, sbregà a tòchi, fìcà inte na secia, zuntàndoghe aqua e cola da parati, smissià ben tuto, strucà sù fasendo de le bale molegate che se lavorava ben come la crea, emo scuminsià a fare le teste; co del conpensato emo ritajà le manine e ghemo afidà a le mame la confession de i vestiti. Messo insieme teste, ormai seche e piturà, vestiti e man emo preparà i nostri sochi. Pa ’l teatro se semo rangià co du banchi (gh’jera ancora quìi de legno), de la carta lucida par le quinte e carta da pachi bianca pa ’l fondale, naturalmente dopo averla inpiturà co cielo e àlbari. E l’è stà na festa parchè i fiòi, dopo la rapresentassion fata a tuta la scuola, i à, par conto suo, fato el giro del paese, co gran sodifassion de bocia, mame e parenti tuti.
È passà trent’ani, ò canbià raquante scuole, so’ rivà in Adria inte le scuole a du passi da casa mia e chì, par l’ultima volta, è nato ancora un teatro co relativi sochi. Sta volta no jero più mi solo; el mi amigo Gigio l’à fato socetà e in dó classe emo preparà buratini, atori e teatro: questo belo grande, opera artistica del mi colega, che ’l gheva familiarità e abilità co la falegnameria, l’è andà perfin sul palco del Teatro Comunale. Na rapresentassion stòrica, l’ultima de la mi cariera, che l’à visto la partecipassion de tuta la scuola, Diretore, segretarie, bidele e genitori conpresi, per un Carnevale che l’è restà inte la memoria in secula seculorum.

[torna sopra]