Da Verona

Ocio a i colori

Alora go spiegà che avéa visto in vetrina na borseta a tracola de un color cavà da i sòliti…

Alora mi, inte na pressia, go dito a la comessa che la borseta che me piaséa l’era quela giala…

Mi e la me amiga ne catemo in piassa Bra propio ’ndo scominsia via Massini. Ghè un tràfico pedonale da bolin rosso perciò la ga anca la scusa par rivar in ritardo come senpre. La me se presenta denansi straca, despetenà e col rosseto fora… percorso.
“Ciao, bela!” la me siga, sventolando i brassi: soliti tri basi con s-cioco e stanpo mostacià. Ne salvemo da quel mar de gente inte un bareto dedrìo a l’Arena.
“L’è pezo de la procission del Corpus Domini! Mai viste tante persone così inmucè. Se te te incanti un pel, te te trovi in mezo a i forestieri de un qualche pulman o adiritura de’n Boeing e te toca girar come un guìndolo tuto el dì dedrìo a la guida con l’onbreleta rosa.”
“Te me pari un fiantin derenà” ghe digo mi che no go ricordi de averla vista così descarmejà.
“Se te savessi! ’Desso te conto” e la parte con n’altra de le so storie.
“Donca, stamatina gavéa i gemeleti e me i ò tolti sù finché naséa a conprarme na borseta che avéa visto ne na vetrina del centro. L’è vera che i è brai, ma te i dòmini solo se te meti in funsion quatro oci e altretante mane oltre al fià de un fachin che descarga camio. I fa tuti du le idèntiche robe, nel bon e nel tristo, inte ’l stesso secondo. L’era presto ora de marenda perciò avéa ficà in borsa du fruti e du pacheti de crecher e, tegnendo un fiol par man, me son fiondà dentro nel negossio ’ndo ghera meza Verona, un s-ciapo de oceti a màndola che i faséa un ciasso che no te digo e la musica sbarà a buso. S’era za invià a scapar fora quando na comessa la m’à blocà con la scusa de farghe i conplimenti a i me du maramani che… guai a darghe confidensa. I picinela i s’à cavà de boto piumin, sierpa e guanti e i à tacà a ropetar. Nel giro de tri minuti i à fato destriga de borse, tacuìni, portaciave, arbinàndoli sul bancon de la cassa e messiando cosita i artìcoli za vendùi con quei in esposission. Par fortuna la signorina l’à ciamà na so colega un fià prima che i du àscari i rivesse a métarghe man a i folari e le ga avùo la pensata de sentarli su na bancheta e de darghe un balonsin a testa, inpontelà davanti a lori parché no i se moesse e ’ntanto n’altra àgata la me servéa mi. Alora go spiegà che avéa visto in vetrina na borseta a tracola de un color cavà da i sòliti e ela:
− Marron terracotta, arancio becco d’anatra, verde marcio, verde pino, verde bottiglia, grigio fango, grigio topo, grigio fumo di Londra, blu inchiostro, azzurro ìndaco, turchese, celeste fiordaliso, rosa cipria, rosa confetto, fucsia?…
’Ntanto i me tesori i tacàa a agitarse de novo par via che ghera s-ciopà i balonsini e i gavéa fame. Go rifilà i crecher ma i l’à fulminè inte un fià e i s’à alsè in pié come na s-ciopetà, ansi dó, pessatando via la tata inprovisata. Alora mi, inte na pressia, go dito a la comessa che la borseta che me piaséa l’era quela giala e ela:
− Giallo canarino, giallo ocra, giallo ambra, giallo miele, giallo zafferano, giallo vaniglia?…
Inbriaga de colori e abastansa inbilà, son nà verso la vetrina e ò tira fora quela benedeta borsa che voléa conprar. In quel momento Giovanni e Francesco i m’à vardà prima mi, po’ la borseta che gavéa in man, i à fato i so colegamenti e, reclamando el resto de la marenda, i à anca palesà el tipo de gialo, sigando:
− Banana, banana!−”

[torna sopra]