|
Da San Giorgio in Bosco (PD)
Fredo
 | | ’E poche caruare de veture passàe jera drio coèrdarse. |
Jera on vénare, el dì vanti ’a Pifanìa, na jornada crua co 'l céo in late che prometéa neve. Mi e me pare jèrimo drio segare ’e legne, tuti scaldonài. Suìto dopomeodì da Zhitadèa ze rivà Bressa in màchina a domandarme se, par piassere, chea note là sarìa ’ndato far pan da lu parché ghe jera lavoro triplo co 'a storia de 'e dó feste tacàe. Naturalmente mi ghe go dito suìto de sì parché me fazéa comodo i schei e po' come garìa podesto dirghe de no a Medeo, serio e onesto, che da ani, parché podesse conprarme i libri, el me fazéa laorare inte ’l so forno durante ’e vacanze estive al posto d’i so coatro operai che ’ndava in ferie a turno?
<< Se névega, ti no state mòare né in bicicreta né in moto che mando Bepi torte co ’l furgon!>>
<<Va ben, ma Bepi no sa indove che stao mi e, co 'a neve, in medo i canpi sta casa coà no la catarà mai. ’Lora el ghe diga che ’o speto mi a 'e ùndase, soto el canpanìe che davanti ga na luce.>>
Co ’l scuro de 'e zhincoe ga tacà nevegare: fissa e fina de coéa che taca suìto. Difati poco prima de 'e ùndase ghin'éo pestà pi de na spana pa on chiòmetro, prima de rivare a radosso del canpanìe e ’desso, in controluce del lanpion, ’a vegnéa basso a tòchi, ma on poco pi grossa però. ’A Valsugana jera voda, el paese morto e ’e poche caruare de veture passàe jera drio coèrdarse. Intanto che spetava, pensavo al laoro bestia che me spetava da poco prima de medanote fin al dopomeodì del dì dopo ché no jera coestion de orari ma de 13 quintài de pan da far-sù. Bressa rifornìa ospedàe, casa-ricovero, bar, ristoranti e tante rivendite
drento e fora Zhitadèa, oltre che 'l so negozhio. El ghea du furni e ’a jera dura tegnirli in òpara tuti du co ’e màchine de ’lora. (No jera mia come ’desso che te buti drento al "grupo", regoeà, el paston ciindrà (gramoeà) e gnen fora 'e ciopete za fate da destirare so 'l teo prima che ’e vaga in stua levare e po’ in forno senzha pi bisogno de 'a steca da infornare.)
Intanto che pensavo ste robe, me ga iluminà du ciari alti e suìto dopo no go visto pi gnente parché ’a onbrèa me se ga incoatà torno ’a testa in medo on spolvaron mojo. Cò me go tirà via sto capucio e me go rapenà na s-cianta in medo on mucio de neve, el furgon de Bepi vegnéa ’vanti a zighezaghe, slitando, e l'è ’ndà podarse co ’n fianco e co deicatessa su pa 'l paeo de 'a luce. Fin che lu faséa manovra, mi go tacà rìdare e cò go verto ’a portèa destra, on poco macà, Bepi se sugava i oci ridendo a tuta boca.
<<Cossa garèto da rìdare! Parché te si ’ndato sbàtare? Cossa ghe dito al paron doman?>>
<< Rido parché mi no ghea mai visto on quintàe de neve destacarse a cascata dal cornison del canpanìe e intabarare soto un poro can come ti. Come se fa no rìdare? Cussì me go desmentegà de scaeàre ’e marce, cu i oci inlagrimài go frenà e me ze partìo el furgon, ma a ocio no se ga roto gnente.>>
Dopo on poco che semo partìi, ’a neve ga canbià crivèo. ’Desso ’a vegnéa basso fissa e grossa come farfàe, segno che presto ’a se garìa voltà in piova, ma intanto i tergicristài no ghe 'a faséa snetare el vero davanti e i ciari iluminava on muro bianco.
<<Sbassa el finestrin e tèndame i plàtani da 'a to parte!>> me fa Bepi e mi suìto: <<Sta’ in là, càncaro, sta’ in là! Curi in medo ’a strada no! Vuto che se copemo su pa on platano?>>
<<E coàeo zeo el centro de ’a strada?>>
El furgon 850 Fiat, vecio de suo e scarico, el trazéa el cùeo de coà e de là da far paura, ma pianeto insoma se ’ndava, parché ’a neve jera manco fissa, ma ’a me vegnéa dosso a boae pa 'l finestrin che no ghea tracia de defletore e romai jero tuto bianco e ingeà.
<<Sara!>>
Ma el mànego girava a vodo e ’l véro no vegnéa-sù: segno che ’a bòta so 'a portéa ghea ’assà el segno.
<< Come faròi doman fare ’e consegne co 'l finestrin sbassà?>>
Mi romai no rajonavo pi pa 'l fredo.
(Frase deventà on mantra pa rìdare in tute ’e zhene che ghemo fato dopo tra fornari, indove che i me ciamava senpre, anca cò jero za laureà.)
Dio ga fato che semo rivài inte 'l garaje del forno e, cò so’ desmontà, tuto duro come on bacaeà, so ’ndà podarme cu i brazhi verti, come on inamorà, su pa 'l rivestimento caldo del forno pa scongearme. Cò so’ vegnesto in sì, ghe jera na spaciarina de acoa in tera. Ma ’l fredo me jera rivà fin su i ossi e no jero pi bon de scaldarme. ’Lora inte ’l laboratorio caldo me so’ messo de anda. Co na pressa mata cavavo ’a pasta da l'inpastatrice, faséo i pisi so 'a baeanzha a seconda di i formati, ciindravo (gramoeavo) fin che ’a pasta tacava e no tacava su i dìi (punto justo), metéo in trancia, butavo sti dadi in formatrice e 'i paravo-su, cu i dii che sfiorava i ciindri che girava, senzha mai farme cucare. Al secondo giro inpiravo-su ste pastèe come carote co l'inclinazhion justa pa fare mantovane e mantovanèe, fiùni, monta-sù, corni e altro.
<<Te me pari indemonià oncò! − me fa Piero, el capo, che ordinava ’e forme inte ’a tòea pa traverso, sora ’a formatrice, davanti de mi.
<<Tasi, Piero, che so’ drio scaldarme!>>
’A matina dopo, co ’l ciaro, ’a strada del centro de Zhitadèa che mi vedéa traverso ’a vetrina del negozhio, ’a jera tuta na paciarèa de neve marzha soto ’a piova.
<<Varda! − pensavo – ’Desso piove, no stanote! Ghe fusse na volta che a mi el tenpo me ’a fa bona cò so’ a ’e intenperie!>>
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
No basta piànzare…
No digo che xe inùtile, ma che no basta comóvarse par la tragedia de la discoteca de Corinaldo, durante la festa de le zinque scole superiori de Senigallia e del concerto del rapper Sfera Ebbasta. Le xe tante le riflession da fare, co calma e a… boce ferme: partendo dal 1° de GENAR a ghemo a disposizion on ANO INTIERO. Ma fémolo!
de Mario Sileno Klein
Da Verona
Ocio a i colori
de Giacinta Dall’Ora
|
