|
Editoriale
Vìvare el tenpo
La pare na roba da gnente. Inveze la xe dura èssar boni de inpegnarse a vìvare la parte de tenpo che ne xe stà stabilìa dal Padreterno el dì che semo vegnù al mondo, anca se no capìvino gnente. Adesso la responsabilità la xe tuta e solamente nostra.
Vien spontaneo domandarse: quala xela la roba pi longa e pi curta, la pi svelta e quela che va pi pian, la pi pìcola e la pi grossa, la pi ’bandonà int’on canto e la pi zercà che, se no te la ghè, no te pol fare gnente? “El tenpo”, xe la risposta. Gnente xe pi longo de lu che ’l xe eterno; gnente xe pi curto, parché no te ghe n’è mai ’bastanza par realizare i to progeti; se te si lì che te speti, no ’l passa mai; el zola via chela volta che te si contento…
Tuti lo ignora, no i ghe fa caso, par dopo rinpiànzare de averlo perso. Senza de lu no se fa gnente: el fa desmentegare quelo che no vale la pena de ricordare e el fa deventare storia quelo che ritegnemo inportante.
Se vardemo ben, noantri a semo fati de tenpo e drento a sto tenpo a ghe fichemo tuto quelo che semo: le paure e le gioie, le vitorie e le sconfite, le conquiste e le pèrdite, i sogni e le ilusion, i inamoramenti e le crisi, la voja de vìvare e la depression, el lavoro e la pension, la salute e la malatìa: insoma tuto quelo che xe el nostro esìstare.
Tuto fa parte del nostro “vìvare el tenpo”: una de le robe pi difìssili che incontremo tuti i giorni. El tenpo deventa el nemico da conbàtare o el fantasma da zercar de blocare, ma el tenpo ne scapa via, perdemo tenpo, rivemo in ritardo, senpre pi tardi de quelo che se pensava, no ghemo tenpo, xe massa tardi. Xe massa tardi soratuto quando se rendemo conto de zerte robe che no dovévimo fare, o quando càpita on inprevisto, on incidente, na malatìa grave che ne fa cascare i brazi, parché quelo che ne parèa eterno, a l’inproviso, deventa on susio, on supio.
Ma pole capitare anca el contrario: sentire la scossa che rimete in corpo la voja de vìvare in modo difarente el tenpo, deventando protagonisti al posto de vìtime, e rèndarse conto che ghe xe ’ncora tante strade da inbocare par rivare a spèndare i “talenti” che se ga ricevù.
Par fare questo, però, bisogna cavarse fora dal sistema de vita che ne vien inculcà da la socetà de i consumi e che ne fa córare come na tròtola tuto el giorno, senza mai fermarse on minuto e cussì no se pol dire de aver fato calcossa che valeva la pena de èssare fato. El nostro zarvelo el xe deventà pigro, el preferisse fare senpre le stesse robe, parché xe piassè facile e ghè manco fadiga a farlo (tipo el clicare “mi piace” par chi ama vìvare el tenpo de i “amici” su Facebook). Guài lassare che el tenpo el ne passa sora come l’aqua de on torente su i sassi.
Bisogna che ogni feta de la nostra torta giornaliera la sia condìa co ’l struto de on tenpo inteligente, on tenpo de qualità, fato de riflession, de ripensamenti, ma soratuto de incontro con le altre persone.
Xe ben riciapare in man calcossa che xe stà messo da parte parché prima non ghe jera tenpo: el calto de la memoria xe pien de sogni sofegà e de pìcoli progeti sarà sù. Magari faremo manco robe de prima, ma gavaremo qualche sodisfazion in più, anca parché ghemo piassè tenpo par gustare e ricordare.
Riussire a desmentegarse de dire “no go tenpo”, la xe za na bela vitoria, parché vol dire che ghemo ciapà in man danovo el controlo de la nostra vita e se ghemo finalmente messi a scoltarla e a sentire la so fame de tenpo. Questo ne jutarà a capire chi semo, cossa podemo dare de nostro a i altri e, soratuto, inparare a difèndarse dal stare co le man in man.
Eco che no la xe pi solo question de tenpo, ma de volontà, se volemo rivare a la fine senza sentire el bisogno de dire: “a gavarìa volesto laorare manco” opure: “me gavarìa piasso passare pi tenpo co la me fameja.”
Insoma, se “volere è potere”, femo pure i salti mortài, ma, fin che semo in vita, sforzémose de vivare el tenpo.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Vìvare el tenpo
La pare na roba da gnente. Inveze la xe dura èssar boni de inpegnarse a vìvare la parte de tenpo che ne xe stà stabilìa dal Padreterno el dì che semo vegnù al mondo, anca se no capìvino gnente. Adesso la responsabilità la xe tuta e solamente nostra.
de Mario Sileno Klein
|
