Da Adria (RO)

La brognara

La jera na casona granda, alta, squadrà come le case de canpagna de na serta inportansa.

La casa d’i mi noni a la Cala d’i Cati, soto l’àrzere de Po Pìcolo, inte la mi memoria la jera na casona granda, alta, squadrà come le case de canpagna de na serta inportansa. De drio la gheva un bel tòco de tera e anca s’a pareva che ninsun ghe badasse, a la fine de l’ano vegneva sù chel tanto de formenton, de patate, de fasòi che faseva giusto còmodo par tuto l’inverno.
Al vin provedeva mi nono che ’l s’jera riservà na fetela de tera pa ’l so vigneto, che ninsun podeva méteghe man: lu poava, lu sapava in meso a i filari, lu provedeva s-ciaresare pànpani e cai par lassar al sole i graspi de ua, lu ghe daseva regolarmente el so verderame, lu vendemava, faseva el vin, l’inpeniva le bote, el travasava e, senpre lu, provedeva che su la gran tavolona de cusina, propio sul meso, tronegiasse la bocalina blu e bianca, piena del so vin. Un goto de nero jera l’omagio a l’ospite e a l’amigo có ’l meteva piè in casa.
Ma se la vidara jera el punto de forsa de mi nono, par el resto de la fameja, da la primavera fin a la fine de l’autuno, gh’jera tranquilamente da pascolarse co’ difarenti tipi de frutari, sparsi in qua e in ’à lungo la caresà, tacà a i fossi de confine: amolari pa’ i primi de Magio insieme a i saresari, fighi fioroni bei grandi e grossi anca s’i saveva da poco, e po’ susine, armelini, pèrseghi e parfin nose ch’a se sbateva zo co’ na pèrtega bela lunga.
Ma la mi preferenza l’andava a na magnifica brognara che la se catava isolata propio in ore a la sponda del fosson de sinistra. Se tratava d’un bel alboron alto e grosso, co’ de le bele rame spanpanà, che có le jera carghe sgionfe de brogne, le se slungava fin squasi par tera. I fruti i jera pitosto picoleti, più de qualche volta tacà a dó a dó al picòlo, ma boni, dolsi e co’ tuto el so gusto e la so fragransa. Jera un piassere, có capitavo in stajon giusta, piassarme soto sta brognara e sgionfarme de fruti ’fà un porseleto, tirando zo quìi ch’i jera a man bona e sbaténdoli co’ na pèrtega s’a no ghe rivavo. E mi nona, naturalmente, me incoragiava:
“Magna, el me putin, ché questa l’è tuta fruta sana!” E mi no me lo fasevo ripètere, tanto che có se ’ndava a tola, chele volte ch’a se fermàvino a magnare, a protestavo subito:
“Mi, dàmene poco ch’a go poca fame.” E qualche volta me tocava insìstere, specialmente co’ mi nono che ’l gheva senpre paura ch’a no’ magnesse abastansa. Mi nona, invesse, la taseva parchè la saveva ben la rason de la mi inapetensa. E quando ch’a jera ora de tornare a casa mia la rivava co’ un sachetin sgionfo de brogne:
“E queste pòrtaghele a la to sorelina.”
De le volte la m’in daseva na bela quantità e alora a ghe tocava a mi nona Rusina – nona paterna – ch’a staseva in casa co mi, a ciaparle, lavarle, tore na pegnatona e cusinarle, che anca cote le jera tanto bone e no sucedeva mai che le ’ndesse da male. Se po’ la jera in vena la gheva el corajo de passarle par cavarghe i ossi e co ’l tocio la preparava i sùgoli, ch’i jera tanto boni anca se un tantin più acidi de quìi de ua.
Po’ è passà i ani, mi so’ cressù, i mi parenti i è ’ndà a stare de la da Po, sul Ferarese e, se gheva voja de brogne, bisognava ch’andesse dal frutarolo.

[torna sopra]