Da Mestre-Venezia

Orassion da gita

Palasso Canossa a Verona.

L’Arcangelo Rafaele aconpagna Tobia.

Có vado a Verona, me xe caro passar par Corso Cavour a védar el Palasso Canossa che se specia su l'Adese; pusada sul parapeto me fermo a ricor­dar... Ogni ano in april le Suore Canos­siane de Mestre, dove studiavo, organisava la gita par tute le scolare, se ’ndava ogni volta a Verona, parché là gera nata la Maddalena di Canossa, fondatrice de l'Ordine; anca ’desso che la xe deventada Santa, se ghe fa festa el giorno diese. Le suore ne portava a visitar el Palasso dove la Madalena gaveva verto i oci e la gaveva passà i so primi ani. ’Sto palasso, opera de l'architeto Mi­chele Sanmicheli, gera considerà el più belo de i palassi privati de Verona: là gera stai ospitài òmeni inportanti come Napoleon, Zar Alesan­dro, Francesco Giusepe...
El fermento in classe par ’sta gita gera grando e pareva che el giorno no rivasse mai, po’ finalmente ècone tute ne l'atrio de la scola a spetar el pulman; prima de montar la Madre Concetta la controlava che la nostra divisa fusse in ordine e che ne la borsetina gavèssimo tuto queo che doveva servirne. Se gera tute vestìe co ’na cotoleta ble plisse­tada, longa soto el zenocio, ’na cami­seta celestina co nerveti sul davanti e sora un majonsin grigeto co sul brasso sinistro el stema de la fameja Canossa che gera anca el stema de l'Istituto, calsetoni bianchi e scarpete nere, solo la borsetina gera come se voleva, ma drento gaveva da èssarghe oltre a la marenda, el libreto da Messa e anca el velo bianco da métarse in testa.
In fila par dó se montava in pulman, davanti se sentava la Reverenda Madre Superiora co da rente le tosete che ga­veva mal de pulman; in meso Madre Valnerina e dadrìo Madre Conceta: in ’sta maniera gèrimo tute soto controlo. Poco dopo la partensa, la Madre Supe­riora diseva che bisognava scumissiar la gita co ’na preghiera par domandar al Signor e a la Madona la protession; dopo ’ver paternostrà un tòco, la feniva co ’sta invocassion a l'Arcangelo Rafaele: “Arcangelo Raffaele che accom­pa­gnaste il giovane Tobia, siateci di guida e di buona compagnia”, po’ la ne faseva dono de un santin proprio co l'Arcangelo e Tobia; ’sto santin lo go ancora. Có se gera verso Padova, ne vegneva ricordà Sant'Antonio e raco­mandà de inparar i Sequeri; intanto se ’ndava verso Vicensa e có se intrave­deva sul col la Basilica de Monte Berico, la Madre Valnerina ne faseva dir el Rosario, prometendo che a magio, se fùssimo stae brave, la ne gavarìa portà co ’naltra gita a trovar ’sta Madona.
Le tosete sentàe su le poltrone a destra del pulman diseva la prima parte de le Ave Maria, quele sentàe a sinistra ghe rispondeva co la seconda parte: ne pareva che el viagio e anca el rosario no finisse mai. Gèrimo tute sustàe de tante orassion, ma el pèso xe capità ’na volta che a ’na scolara rivà da poco ghe xe vegnùo in mente de domandar chi che fusse Tobia.
Cussì ne ga tocà scoltar tuta la so storia: de come el gavesse da ’ndar da un parente a farse tornar indrìo schei, a i pericoli del viagio, del pesse ciapà, de i tòchi de ’sta bestia messi via, de come el gavesse catà Sara, ’na dona rabiosa, e po’ sposada, ma sensa dir i particolari de la note de nosse. E tuto co l'Arcangelo Rafaele senpre tacà e pron­to a giutarlo.
Eco, però, in lontanansa Verona, gera el momento de la Madre Concetta: vi­sto che la gaveva ’na bela vose, la ne faseva cantar l'Ino a la Beata Madalena; anca se stavo sita, parché gero stonada, me ricordo ancora l'aria e le parole:
“Da le sponde che l'Adige bagna delle figlie la nobile schiera / da le torri larghe e vetuste, giubilando si leva fremente, sorge l'Inno novel che accompagna leva al sole la santa bandiera / Maddalena Beata nel ciel, della Fede e del fervido amor.” ’Sto Ino no i lo canta più e par quanto me sia informada nessun lo ricorda, gnanca le Suore de ’desso, che quando go domandà le me ga vardà co i oci fora da la testa.
Finalmente gèrimo a Verona, tute in fila ordinata, se ’ndava verso el Palasso Canossa; longo el percorso ne vegneva mostrada l'Arena e i vari tesori de ’sta cità; l'Adese ne faseva inpression, lo vedévimo grando e gajardo. In ponta de pìe ’ndàvimo drento al palasso e vegnévimo portàe su’na stanseta picenina, co muri tapessài, piena de quadri e reliquie; in meso drento ’na urna de vero ghe gera ’na putèa pice­nina de cera, tuta vestìa de bianco e infassada co merli pressiosi, la gaveva i oceti verti e pareva che la ne vardasse tute soridendo, in testa la gaveva ’na scufieta che gera un capolavoro de belessa; ma ’sta putèa de cera, che rafegurava la Madalena ’pena nata, proprio nel posto dove so mama la gaveva messa al mondo, più che a una de noaltre putèe la faseva inpression. Dopo che le Suore ne gaveva fato dir dó-tre giaculatorie, ’ndàvimo via.
Le suore de la Casa Madre ne spe­tava, ’lora se magnava e po’ se zogava un poco, ma a le tre se ’ndava su ’na cesa, ogni ano in una diversa, parché el scopo de la gita gera anca quelo de farne conóssar e apressar l'arte e le belesse de Verona: là vegneva dita la Messa.
Feniva cussì la giornada a Verona, se montava sul pulman e par premio po­dévimo ciacolar; mi penso che le Suore fusse talmente strache che no le ga­veva più forsa de farne pregar.
Solo có se gera vissin Mestre, la Su­pe­riora la ne faseva far a mente un pensiero de ringrassiamento par la bela esperiensa e la feniva sborbotando ’na invocassion a la Beata che vegneva esal­tada par el so amor par i picenini, par le zovanete e i puareti, ma nessuna la scoltava o ghe ’ndava drio; piene de stanchessa e de contentessa se tornava casa e scumissiava el conto a la roversa par la gita a Monte Berico de magio.

[torna sopra]