Da la Bassa Padovana

Sposi de jeri

Cortèo de nozze… direto in cesa.

Foto ricordo in corte… tra on pasto e l’altro.

Speranze, fantasie, apostamenti, ocià cònplici fora de la cesa, longo fidanzamento e finalmente noizzi e po’ el matrimonio, saendo, la sposa, che la sarìa nà a vìvare con: suoceri, cognà, polame, stala, mas-cio, canpi… “fin che morte non vi dividerà!”
L’inamoramento el rapresenta on momento indimenticabile: el ga sconvolto i sentimenti, el ga creà canbiamenti sociali de pi de le guere, el ga dà speranze a l’intera umanità, el ga ispirà artisti de tuto el mondo! Ma insieme a la trepidazion de coéi momenti, a jera senpre in aguato el rifiuto, la lontananza, o la sorda ostinazion de genitori che i vardava la classe sociale de la fameja de uno de i dó morosi.
Tuto a scominziava so ’l sagrato de la cesa, dopo le Funzion de la doménega: le prime ocià che le sfugìa a i genitori e che le deventava senpre pi cònplici, fin che i amizzi i se ne acorzéa e cossì la roba la deventava uficiale, anca se i genitori non i savéa gnancora gnente. I incontri i vegnéa dal lataro o dal casolin o a la ponpa de l’acoa, ma senpre dàndose del “Lei” o del “Vu”. E coando che el toso el gavéa deciso de nare avanti con la storia, el se presentava a i genitori de éla, domandando el permesso de parlarghe, ma senpre in giorni fissi, so ’l meale de la porta, co on fradeleto de la tosa a farghe ciaro.
Dopo on periodo pi o meno longo de fidanzamento, i tosi i se pareciava a le nozze; la tosa la conpletava la dota e el toso el dovéa farse fare la càmara da leto da on marangon e spetare che ’na sorela la se sposesse par liberare ’na càmara de la casa de i veci. Decisa la data, che de solito la jera prima del scomizio de i grossi laori de i canpi, se faséa le publicazion e el prete el lo anunziava par tre volte in cesa, a la doménega. Uficialmente i morosi i deventava “noizzi” e vegnéa tolta la sorvelianza del fradeleto, cossì i incontri i deventava piassè intimi, ma seza nare oltre, con tanta fadiga par el noizzo. On deto el recitava, parlando de on omo lento in te i movimenti: “A l’è duro come la coa del noizzo!”
’Na zena co i parenti streti, a casa de la morosa, la consacrava sto avanzamento sociale, con scanbio de doni come pegno. Ne la setimana prima del matrimonio vegnéa trasportà, co ’l careto, la dota in casa del sposo, e magari anca ’na damigiana de vin bon par el pranzo de nozze. In te i giorni dopo, i promessi sposi i passava par le case de parenti e amizzi co i confeti e l’invito; poco dopo a rivava a casa de i sposi i regài che i vegnéa esposti el dì de la cerimonia.
I parenti pi streti i valutava sti regài, anca con risentimento, come al matrimonio de ’na copia de on paese vizin, indove che el conpare el ga regalà a la sposa ’na colanina de oro, ma cossì fina che el papà de la sposa al pranzo de nozze, dopo che ’sto conpare el gavéa magnà el risoto, el ghe ga dito: “Par el regalo ca te ghe ghè fato a me fiola a te ghè magnà anca massa!”
In cesa i invità i ghe naséa a piè, in procession, prima coéi del sposo, conpagnà da so mama, par spetare la sposa, conpagnà da so opà e precedùa da dó toseti ben vestìi. Intanto l’organista el sonava la marcia nunziale, creando on’atmosfera de solenità che investìa i sposi de responsabilità.
Altra roba xe el matrimonio civile tra i muri de on municipio. Dopo la cerimonia, poche fotografie in bianco e nero, gnente lancio de riso, ma coalche caramela butà verso i toseti de la piazza che i spetava fora de cesa. El pranzo in casa, parecià da on cogo anbulante, el concludéa la festa, che par i sposi continuava el giorno dopo con el viagio de noze a Venezia, e co ’l “rabalto” al ritorno, par finire, co i parenti pi streti, i avanzi del pranzo de noze.
Dopo scominziava ’na nova vita, non par “due cuori e una capanna”, ma con suoceri, cognà, fiòi, neodi, galine, stala, canpi, cesa e laoro.

[torna sopra]