Da Venezia

El specio venessian

Fazendo visita in qualche paeasso che ga conservà sti speci…

Speci tacài fin a inpinir i muri de na stansa de vendita.

Tra ’e tante meravege fate ne ’e fornase de Muran ghe ze el specio che el se ga sviupà ne ’a so beessa a partir da ’a puressa par rivar fin a eà beessa artistica, come in nissun’altra parte del mondo.
’A produssion de speci a Venessia ’a se pol datar za prima dal XIV sècoeo che a chel tenpo i se faseva, metendo insieme na lastra de vero lucidà co foji de stagno e mercurio. Sti foji i vegniva tacài al vero co un bagno de mercurio, fasendo na pression tra tuti sti elementi ’pena diti.
Sento ani dopo Angelo Barovier el perfessiona el specio, inventando el cristaeo, un vero lìnpido, trasparente, che el te faseva speciar mèjo de prima, ma sarà Vincenzo Redor nel 1540 a meritar de èssar considerà l’inventor del specio venessian ne ’a so conpletessa come che ’o conossemo ancùo.
L’arte de i speceri, riunìi in corporassion, ’a fa deventar el specio un ogeto da aredo, ’ndando a inpinir senpre de più, paeassi, castèi e case de i siori, a Venessia e nel resto de l’Europa.
Ne ’e fornase, se cominciava e sostituiva ’e cornise in legno, faséndoe in vero, co fiori, foje, incision, e se considera Giuseppe Briati l’ideator de sti speci davero bei e unici.
’A Repùblica Serenissima ’a gaveva proibìo a i maestri muranesi de far conóssar i segreti de ’a produssion de tuti i veri, fasendo un albo ciamà de oro co i nomi de chi che doveva tegner el segreto, ’pena gravi conseguense par i traditori.
Nonostante sta inposission, da tuta Europa se ga senpre sercà de convìnsar e far ’ndar a lavorar i maestri del vero in Spagna, Francia, Germania, Olanda, Belgio, Danimarca. In particoear Luigi XIV de Francia el gaveva na poìtica fata par far finir ’a supremassìa venessiana ne ’a produssion de i speci, inpegnàndose a portar nel so Paese i maestri del vero venessian co i so segreti che i permeteva na produssion de veri co coeori davero fora del comune e de speci perfeti e bei da morir. Sto periodo de guera comerciàe el ze passà a i posteri co ’l nome de ’a Guera de i Speci.
Questa in curto ’a storia de i speci de Muran.
Par quanto me riguarda, me ricordo de ’ver visto par ’a prima volta sti speci proprio a Muran, quando da pìcoeo i me genitori i me gaveva portà a far un gireto in na fornase piena de speci tacài fin a inpinir i muri de na stansa de vendita.
So’ restà incantà davanti a tuti sti speci che i me rifleteva dentro cornisi de na beessa che me ga fato restar a boca verta.
Nel tenpo go continuà a apressarli, sercando quei più veci che ancora i me incanta e che però no i ga paragon co quei moderni che, sepur bei, vien copiài parché el fàssino del tenpo passà el ze iresistìbie.
Qualche bel specio ’o go anca a casa mia e el me ricorda, come fusse ’desso, chel bel giorno de tanti ani fà ne l’ìsoea del vero dove a me gaeopante imaginassion ’a me gaveva fato védar speci magici che gaveva sostituìo el vardarse ne l’aqua de i canài: sicuramente na magia fata da i maestri del vero che altro no i gera che maghi che supiava dentro na cana par modear el vero informe fin a rèndarlo calcossa de pressioso e indispensàbie come l’aqua de i canài de ’a me cità.
Soeo da più grando go scoperto che i primi speci fati da i antichi egissiani, lucidando de i tòchi de rame, i gera considerài come robe sacre e magiche.
A pensarghe ben anca i speci venessiani i doveva èssar pieni de mistero parché, ben posizionài, e in gran nùmaro su ’e pareti de i paeassi de ’a Serenissima, i moltiplicava ’a luce de ’e candée inpissàe fin a far quasi giorno, e de giorno a serte ore i rifleteva anca el sol e i mandava speciài messagi de luce.
Fazendo na visita in qualche paeasso che ga conservà sti speci, se pol rèndarse conto de ’a beessa e de l’utiità de sti ogeti che ne i primi ani de produssion i costava cifre spropositàe che se pol quotar corispondenti a eà paga de un operaio de tre, quatro ani par avérghene uno. I nòbii che no gaveva de sti problemi i ghe ne ga fato un bon investimento parché i ga reso ’e so case senpre più pressiose fin a i giorni nostri.
Par me fortuna in qualchedun de sti paeassi ghe so’ stà e de giorno, ma ancora de più a eà sera e a eà note, sti speci incornisài co figure de fiori de vero trasparente e coeorà i incanta come un zogo de prestigio che dura ne i sècoi sensa mai pèrdar de intaresse e chi sa se un giorno i ne farà védar tute ’e figure che ghe ze passàe davanti nel tenpo. Forse ste imàgini ’e ze conservàe dentro tuti i speci par senpre e proprio par sta possibiità sto tòco de aqua fato specio de cristaeo no el finirà mai de stupirme e de considerarlo parte stessa de Venessia, ’a cità più bea che l’omo sia mai riussìo a costruir e a disegnar fin ne i minimi particoeari dentro e fora i muri de ’e so case costruìe su l’aqua e mantegnùe in vita da l’aqua. Sta stessa aqua che mantien in vita i fiori veri, anca se vardando quei su i speci me vien da domandar quai che i sia veramente quei veri, e tante volte me confondo, perso dentro un tòco de specio.

[torna sopra]