Da San Stèfano de Zimela (VR)

Naja: la branda

Che ’l fusse stà bersaliere, alpin o sènplice fante, el tronbetiere che sonava la sveja el jera el pi odià de la caserma.

Anca la tera la xe un materasso mòrbio, quando che te si sfinìo da la fadiga…

Fin che nissuni vede, un pisolino, stasendo ’tento a no sassinare el maledeto cubo!

Leti a castelo.

E i tri ultimi che riva… pulizia a i cessi!

Sogni a oci verti: el tenente che te conta le fòle par farte indormezzare…

Ci che ga fato la naja, bela o bruta che la sia stà, el se la ricorda ancora e ancora el la dòpara la parola branda:
“Dài, finimo ’sto giro de brìscola chì e dopo tuti in branda!”
“’Desso a vò in branda a pisocare ’na s-cianta!” “A me ricordo ancora quando che i me veci de note i me sbrandava”, che voléa dire che i anziani i ciapava el leto indóe che dormìa la recluta e i lo roersava par tera, cuerte, omo, foreta e materasso conpresi.
El posto branda el dovéa èssere senpre in ordine, come da regolamento, co ’l materasso ripiegà e co’ dessora le cuerte piegà in modo da formare el mitico cubo, che se passava l’ispezion e no ’l jera mia fato a regola d’arte i te lo desfava e chela sera lì la libera ussita te te la sognavi. In te i leti normali a ghe jera la rete, in te i leti a castelo invezze a ghe jera un telo ben tirà.
El jera utile parché de note a ghe metèino ben distese tra telo e materassin le braghe de la divisa e cussita la matina le catàino abastanza co’ la riga fata. Ci che no nava i libera ussita e el restava in caserma, no xe che ’l podesse ’nare in camerata. Nò, parché la jera sarà a ciave e se podéa entrare solo dopo che la tronba la gavéa sonà la ritirata. E cussita a zercàino tuti i busi possibili par scòndarse e farse ’na dormida. Ma, anca ’na ’olta verta la camerata, bisognava spetare in piè vizin al leto che passasse el contrapelo, par controlare se calchedun el jera restà fora da la caserma, a sbrindolon.
Solo dopo el contrapelo se podéa desfare el maledeto cubo e farse el leto, che dopo a sonava el silenzio e ’lora tuti soto le cuerte e tranquili, senò i jera guai co’ l’ispezion.
Dormire però a jera un po’ fadiga parché ghe jera le luci noturne inpizzà, el viavai de ci che gavéa da nare a i cessi e el ronchezare che ’l vegnéa bruscamente interoto da calche scarpon che ’l volava come un UFO.
Al canpo invernale le robe le canbiava. Co ’l fredo can a se dorméa tuti vestìi, drento a le baite co’ par materasso la paja de le bestie che le gavéa passà lì l’istà, cavàndose solo i scarponi che se tegnèino soto le cuerte senò i se ingiazzava.
De istà invezze in te le tende a se fasèino i materassi co’ le rame de pin, che le gavéa el vantagio de tegnerne un poco alti dal teren che cussita, se piovéa, l’aqua la passava de soto.
Tornando in caserma, la matina l’omo pi odià el jera el tronbetiere che sonava la sveja.
Al so segnale tutti zo da le brande e còrare come mati ci a i bagni, ci a vestirse e ci a fare el maledeto cubo.
El problema l’era che bisognava èssare pronti a precipitarse in cortile al suono de l’adunata parché i ultimi tri che rivava… la sera i jera de pulizia a i cessi!

[torna sopra]