Da Ponzano Veneto (TV)

Bestie in carovana

Me papà cassador, co ’na bona preda.

La Madona de Borbiago.

Finamente, come senpre, rivava la bela stagion, ’na contentessa granda par tuti: òmeni e bestie del mondo de le giostre, che lotava co ’l fredo par mesi, dovendo lavorar de fora; ne la carovana se stava poco, la gera sì calda, ma tanto pìcola e noaltri in tanti, tra òmeni, done, veci, zóvani, putèi e bestie.
El giuchel, che nel nostro parlar sarìa el can, spariva par ’ndar a morose, el tornava tuto infangà, quache volta pien de gioa, overosìa de rogna e pùlesi, ma contento; el viveva proprio da can, no come queli de ’desso che ga paltonsini o inpermeabili co tanto de firma, tanto par dìrghene una.
Gavemo senpre ’vùo giuchel, parché me papà ’ndava a cacia; come tuti i cassadori el partiva co el can de matina bonora, el ’ndava su i boschi del Montelo o nel lagheto, a Quinto de Treviso, dove el gaveva ’na bota par scóndarse; el portava casa osèi o lièvori; da tanti che ghe ne go magnà, no me piase più ’sto genere de piati che sa da salvadeghin, par no parlar del pesse de aqua dolse che el pescava sul Piave, sul Sil, su canali o rii de montagna.
Par le murghe, o mèjo dir le siè gate de me sorele, co ’l caldeto rivava el momento de mòvarse un poco, le gera cussì grasse e sgionfe che le faseva fadiga anca a caminar, le se spostava da i cantoni de la carovana, a la scaleta par vegner drento, dove le se destirava par ciapar el sol.
A ’ste bestie se ghe dava da magnar la coradela, che me mama cusinava su ’na pignata granda, se la ’ndava a cronpar dal becher del posto dove che se gavévimo postà.
Se pol dir che su i balconsini de quasi tuti i carossoni gera picada ’na cheba co el canarin, che vegneva coverta co ’na strassa có no se voleva che el cantasse o có ghe gera massa sol o massa fredo.
Par ’ver i vovi freschi se tegneva dó o tre cahani, che vorìa dir galine da vovo; parché no le scanpasse, có le gera polastre le ligàvimo a le manilie del casson postà soto la carovana, co ’na cordela che se ghe gaveva ingropà ’torno ’na sata, ma có le cresseva le capiva da lore sole dove che le gaveva da star, e no ghe gera più bisogno de tegnerle ligàe; anca se le ’ndava in giro a ruspar o a becolar sasseti, erba e frégole, le se incorseva có se faseva fagoto e se rancurava le strasse par ’ndar verso ’n’altra zona e le tornava da ele sole, le saltava drento el so gnaro parecià proprio drento el casson e le partiva co noaltri: no go recordo che ghe ne sia mai mancada una!
La prima gran sagra che verseva la nova stagion gera a Borbiago, dove el ventisinque de marso se faseva festa a la Madona Mora, la Madona che, secondo la tradission, i gaveva catà nel fondo de un posso pien de aqua, quando sentenere de ani fà ’na toseta sordomuta ga sentìo vegner sù da ’sto posso ’na vose; sul posto xe stà fata ’na bela cesa e ogni ano, in ocasion de la Anunciassion, ghe xe gran festa e se sa ben che no pol mancar le giostre.
’Sta legra, cussì ciamemo noaltri giostrari la fiera, xe conossùa anca come la sagra de i vovi duri, parché vegneva vendùo dapartuto vovi, dato che gera al momento che le galine ne faseva uno al dì; par mandarli zo se li conpagnava a goti de bon keno che no sarìa altro che vin nero: grinton, bacò o fragoin.
’Na volta fenìa ’sta sagra, ’torno i primi de april la nostre cahani, no se moveva più dal casson, parché le se meteva a coar e quasi senpre, verso Pasqua, i vovi se verseva e nasseva i petussi: el pareva un miracolo e tuti se ’ndava a vardar ’ste nove bestiole.
Queste gera le bestie domèsteghe, che viveva co noaltri: le slevàvimo no solo par intaresse, ma più che altro par conpagnìa; diverso xe el discorso de quele che deventava fonte de bon guadagno par i giostrari, parché vere e proprie atrassion; questa, però xe ’n’altra storia.

[torna sopra]