| de Vittorio Ingegneri-Dinerio |
|
Le storie de Dinerio
Al stalo de bicecrete
Mestiere orbo de sicuro quelo de tèndare i rùgoli, ma no par vece straloce, mèse orbe e malfidente come l’Ersilia.
– Arè là, Nori, che sanguanelo de neodo ca go! Emilio l’è quelo co’ la bluseta rossa ca pedala cofà un dàreno davanti a tuti, fra chel s-ciapo de tosati montài sul rùgolo co ’l borson a tracola. I xe drio ’nare a ’lenarse, come ogni mèrcore, nel canpeto del prete. Pedalando tre ore gajarde acanà, i sùa e i riva casa sderenà. El siore ca ghe sta drio a quei scavessacoli xe un serto Dario Bastianelo che sta drio l’àrzare de la canaleta, ’n omo sportivo ’passionà de balon che da zóvane el ga zogà co ’l Padova in serie B. In parochia dise tuti che ’l xe na brava persona.
– Mancomale! Penso anca mi che ’l sia un bon pare de fameja co’ dó fiòi grandeti, na putina ’ncora pìcola e so mojere che al sabo insegna dotrina crestiana. Dabon come nona no me despiase che ’l pratica el patronato. Xe un logo san, al seguro da i paricoli de incontrare calche manigoldo che lo faga sbandare malamente. So’ creta che là drento sti fiòi i vègna sù ben, driti pi de ’n àlbeo, arlevài secondo le sacrosante Massime Eterne. No cofà serti panpalughi merdosi e malanosi molài al sbarajo pa ’e strade da la matina a la sera, ch’i cresse sensa el timor de Dio. Vu, Nori, disìme: sio d’acordo co’ mi?
– Anca massa, Milena! La penso propio come vu, siben che me neodi ormai i xe deventà òmani, tuti dó abili da rangiarse par so cunto. Ma da pìcoli me zènaro Ireneo che, come erbarolo ortolan, esperto anca in poadure e incalmi de vegne e frutari, co’ la scusa che ’l so laoro a òpara gera quelo de star drio al brolo de i siori Marchesan, paroni de la corte de là da la stradela nostra, el ga ’bù modo de starghe a i calcagni a sti putèi, fin che i tornava casa da scola a magnare un bocon. Siché me fiola Fabiana, dovendo ’nare laorare a la Viscosa de matina bonora sentà in sela al rùsano rocheton de so nono e mi badanà a far mastèi de bugà in giro pa ’e corte de massarioti là tornovìa, fin che i ga ’bù da vantare le brighe de le ’lementari comunali, età da no pèrdarli de vista, la ga pensà de istradarli anca ela in oratorio tuti i dopodisnà a fare le lession par casa, gnonde i jera seguìi dal capelan. Me pare Flavio l’à ciapà in bona l’idea, infati lu che ’l jera un stròlico de poca istrussion ma de tanta conprension el diséa: “Chi vol cusinare puìto na bina de casada soto el quercio no ga da tèndarla co’ l’ocio sguercio ma co’ giusti giri de velada.” Sacramen, se ’l gavéa rason! El jera ’n omo che no ’ndaséa a s-ciosi co ’l mòcolo e gnanca a rane co ’l fìnfolo. Co’ le so massime raramente el pissava fora dal bocale. Valeva la pena darghe reta.
– Che sinpàtico dialogo, barba! Son restà davero incantà sensa pèrderme na batuta. Ansi me ga fato subito tirare le rece la siora Milena quando, per farghe notare so nevodo a l’amiga la ghe ga dito che ’l xe quelo che pedala davanti da tuti in sela al so rùgolo. Anche se sta parola no la go mai sentìa, me pare de ’ver capìo che se trata de na bicicleta. No xe vero?
– Bravo, fiosso! Ito mò, che sgajo ca te si deventà. “Chi sta co ’l lovo inpara a urlare”, ma te dirò anca che: “El lovo donde che ’l bita no cade che ’l bècola.”
– Come sarìa dire? Spiègate mèjo, barba.
– Caro Lalo, te ga da saére che có jero bocia mi, noantri tosati se movévimo la più parte a fetoni, fasendo anca diesene de chilometri caminando. Quei pi fortunài podéa parmétarse de scorazare in bicecreta, come chel s-ciapo de tosati mensionài prima. Te ga sentìo la siora Fabiana ca naséa a laorare tute le matine co ’l vecio rocheton de so nono, tuto inruzenìo. L’otomòbile jera on lusso solo par pochi. Crédito che in chei ani là ghe fusse tute le màchine che viaja su le strade d’oncò? Anca mi so’ ’nà a scola pedalando fin in tersa ’viamento, cucàndome 14 chilometri al giorno intra ’vanti e indrìo. Portavo la bicecreta al stalo da l’Ersilia, molà soto na tesa drento on cortivo, a pochi passi da le scole. Sta vecia stralocia, bastansa curta de vista, la jera na caìa tacagna, cossì malfidenta da no fidarse che gnissun de noantri tosi pagasse el stalo a fine mese. La pretendéa de incassare da ognun na palanca al dì. Alora noantri sbregamandati la intortàvimo co’ on fraco de despeti. Ghe scondévimo el canpanelo, sgonfiàvimo na roa, desvidàvimo la gema o destacàvimo el fanale a le altre bicecrete in custodia, sensa che la se intajasse de gnente. Siché có rivava el ’ventore stranio, vedendo el malan fato a la so bicecreta, scomissiava rognare. Sicome “grame xe le question dove tuti serca de ’ver rason”, de sti bàgoli ghe ne sucedéa tuti i giorni fin che la vecia pagontà de sta solfa ga tacà sospetare de la nostra marùgola. On bel dì, mi ca jero uno de i pi veci del s-ciapo, so’ saltà fora faséndoghe dare on tajo a le barufe, drio promessa da la parona Ersilia che no sarìa pi sucessi despeti del gènare, però restando de pati intisi che da chel giorno garìssimo podù pagare el stalo na volta al mese. E cussì xe stà, fora che par Danilo. Sto inbrojon ogni fine mese el se faséa dare i schei da i sui e invesse de pagare l’Ersilia el se daséa malà par calche dì fin che la vecia se desmentegava de incassare e lu sti bùboli el naséa zogàrseli al loto sensa mai vìnsare na palanca.
– Furbo e grintoso, barba, ma bastansa disonesto sto tosato!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Inbrojare i anziani
Se sente parlare senpre de pi de le trufe che viene fate a i anziani, ’profitando de l’età, del fato che el pi de le volte i vive da soli e che magari i xe pieni de magagne. Ghe xe in giro na bruta raza de delinquenti che inbroja i veci, travesténdose da agnèi che ghe dà la cacia a i lupi.
de Mario Sileno Klein
Le storie de Dinerio
Al stalo de bicecrete
Mestiere orbo de sicuro quelo de tèndare i rùgoli, ma no par vece straloce, mèse orbe e malfidente come l’Ersilia.
de Vittorio Ingegneri-Dinerio
Da Verona
La dissendensa de Dante
de Mirco Castellani
|
