Robe de Ciósa

El Forte de San Felisse

El Castelo de la Lupa.

Dopo tanti ani finalmente adesso se scomissia a rivalutare uno de i zogèi più pressiosi de Ciósa che se ciama “Forte de San Felisse”. Adesso ze possìbile fare visite, oviamente guidate, fora e drento el forte e gòdare cossì de ’na vista panoramica su Ciósa e Marina, tra mare e laguna, proprio a l’imbocatura del porto.
Se trata de un complesso architetonico ben visibile sia da chi ariva a Ciósa per via d’aqua sia per chi ve ariva via tera e costegia a pìe dal lato ovest la colossale ultima opera venessiana de i Murassi, costruìi nel 1774 da la Repùblica Veneta “ausu romano aere veneto” (con l’ardire dei romani ma con il denaro veneto – come sta scrito in te ’na lapide). Anticamente esisteva a l’imbocatura del porto, deto Edrone o Evrone, a difesa de la sità e del litorale, ’na tore merlà in legno deta Tore de la Lupa o Luppa o Lova, intorno a la quale ghe gera de le saline arginà. Vissin a ’sta tore sorgeva ’na ceseta. Distrute tute dó da i Genovesi ne la guera de Ciósa nel 1382, el Senato Veneto decretò che la prima fusse sostituìa da una pi pìcola in piera e che fusse anca costruìo intorno a la tore stessa un castelo deto de S. Felisse, sul modelo de quelo de Famagosta in Cipro, afidando la progetassion a l’architeto ciosoto Francesco Marangoni nel 1384. L’òpara ze stà ultimà nel 1395, podestà Simone Dalmarìo.
Per la so ubicassion particolarmente esposta a le maregiàe, el complesso à dovesto subire nel corso del tempo diversi interventi de restauro. El pi grosso ze avegnùo nel 1538 e à portà a la ristruturassion più o meno simile a l’atuale. Altri rifacimenti ze stà fati nel corso de i secoli seguenti. A i primi del 1600 la fortificassion à perso la so antichissima funsion strategica de difesa a l’ingresso al porto e la ze stà in parte lassà in abandono, salvo el raforsamento del muro de cinta, minacià da l’impeto del mare.
El forte à ripreso el so ruolo originario verso la metà del XVII sec. in ocasion de la guera co ’l Turco, essendo el castelo la prima rocaforte de difesa ne l’Alto Adriatico da le navi provenienti da sud. Importanti lavori de restauro ze stà eseguìi soto la diression del famoso architeto venessian Andrea Tirali nel 1702-04.
Arivando a l’Otosento altri lavori de consolidamento del forte ze stà efetuài da i austriaci, creando novi spassi per le guarnigion, posti de guardia, caminamenti. Durante i dó ultimi confliti mondiali el forte ze stà utilisà come centro de difesa afiancà da altre òpare difensive come i cosideti “fortini”. Po’ dopo sul castelo de San Felisse s’à calà un velo de silensio e de oblio fin a ’sti ultimissimi ani, quando, per òpara de un aposito Comitato, s’à sercà de rivalutare el complesso, definìo da qualche “esperto” un “pósso de petrolio” per le future fortune de la sità de Ciósa, a condission de rèndarlo acessibile a i turisti e a i visitatori.
Ma cossa alo ’sto forte de tanto interessante da védare? Storia e vista panoramica insieme. Nel so interno, disseminài tra spassi verdi, se pole prima de tuto amirare i otocenteschi alogiamenti de la trupa, la polveriera, i alogi de i ufisiali, l’ofisina, la falegnameria, le cusine sormontàe da i tipici camini austriaci, E dopo el castelo vero e proprio che dòmine a l’interno co ’l so magnifico portale d’ingresso in marmo d’Istria. E po’ ancora internamente i magnifici archi ricavà da matoni in teracota fabricài sul posto, el magnifico pavimento in pietra a spina de pésse, le porte laterali per la guardia, el pósso profondo dó metri, le cele de i prigionieri (i dise che in una de queste sia stà messo per ’na note el patriota Silvio Pellico, prima de èssare condoto a i “Piombi” de Venessia…). E infine, varcando el grande portale, se apre la vision magnifica su la laguna e ancora più stupenda apare la vista da l’alto de la tore de vedeta, el “maschio”, dal pavimento ricavà in parte dal marmo de lapidi provenienti da cèse de Ciósa, che ze stà ricostruìe. E tuto intorno el muralion de cinta, totalmente circondà da l’aqua, co le canoniere oturàe da matoni e i caminamenti per le ronde…
Insoma el forte de San Felisse, che ze stà definìo dal FAI come “luogo del cuore”, ze un angolo de storia, de serenità, de belessa e de verde. Tuto questo ze possibile visitare meténdose in nota presso l’aposito Comitato, che à in programa visite guidate nei giorni 11 magio, 15 giugno, 6 luglio e 7 e 21 setembre co turni de visita al dopopranzo, formài da 50 persone oniun, previa prenotassion on line al sito www.eventbrite.it digitando Forte San Felice. Informassion e agiornamenti se pole avere visitando le pagine Facebook de Forte San Felice o el sito www.comitatofortesanfelice.it; soto ze riportà el link direto per le iscrission.

FORTE SAN FELISSE
Castelo de la Lupa. San Felisse,
ti me ricordi quando da fiéti
vegnìvimo a serarse el legno dolse
in mezo de l’erbeta tuta verde.
Che festa gera andar per le scalete,
vardare per i busi de i canoni,
mirando a le galere genovesi
co i oci de la nostra fantasia…
L’erbassa adesso no te dà respiro,
el fosso a s’à fato un putridume,
le piere le s’à tute rosegàe
e i àlbori s’à storto mezi sechi…
Ti resti là da solo, vecio forte:
i soli che te fassa compagnia
ze el ruzo de le onde contro i sassi
e ’l sigo dei crocai a torziovia.
Ma quanto vecio zes-tu, caro forte?
Ti vardi el mare fisso giorno e note
e intanto ti n’aspeti che vegnimo
a tiorse ’n’altra volta el legno dolse…
(da “Tramonto – Canzoniere ciosoto” de A. Padoan, 2012)

[torna sopra]