Da Maran Lagunare (UD)

Grata grata, semo rivài a tocà el fundi

Panoramica de Maran Lagunare.

Sèna de pesca co ’l turbosofiante.

Verso la fine de i ani Sessanta, vevo portò a Maran el turbo sofiante, inventò da l'ingegner Raugna de Grao. Xe stò el primo atresso par ciapà capelonghe messo a bordo de na barca, però no varissi mai credesto che co ’l passà de i ani el varissi cunbinò tanti disastri nte l'anbiente sotomarin; podesto fà sparì i banchi de sabia che nantre maranisi ciamemo scagni e anca el sistema de vita che ’l mar tigniva conto. Parebon ndove che xe stò doperò el turbosofiante xe sparìo squasi duto: capelonghe, dùnduli, fasolari, peveràssole e parfin i vermi de mar.
<> vevo dito a diversi pescauri de Maran, pena inacorto de quante cape che se ciapeva co ’l fero. E gera vero, co ’l turbosofiante se vadagneva tanti schei.
<>, me diseva na vose de untan. E mi sordo fevo finta de no sintila, anca parché el secondo ano co ’l fero, vèvomo ciapò ancora più capelonghe. Almoto, sparnissiando quele che sbrisseva fora del sesto vevo pensò che l’ingrandiva el giogo de pesca.
Parebòn gera stò cussì i primi ani, soraduto nti scagni vissin el faro de Eletrico, là fora de Grao. Tante che ghe ne ciapèvomo con la Verbena.
Vedendo quel che portèvomo in pescarìa, dopo puchi ani le barche che ndeva a cape le gera deventàe na ventina. Peschèvomo sora i scagni e con i geti de aqua che spueva fora el fero, spostèvomo la sabia che la ndeva a torio par duto. Ciapèvomo dó-tre quintài de capelonghe al zorno, fin che ne ga tochesto mete la quota par tignì alto el pressio. Dopo qualchi ano gera nato anca el sesto par ciapà le peveràssole. El modo de pescà gera el stesso: molà el fero par pope, dopo dosento metri calà el sesto davanti la prova e co ’l varicelo recuperà el cavo intanto che ’l sesto, raspando el fondo, l'ingrumeva le cape drento. Ciapèvomo anca trenta quintài de peveràssole al zorno, massima dopo che gera stada eliminada l'ancora, che se tireva a cul indrìo con l'elica.
Go inamente che nte l'Otanta, finìo el mistier par le bande nostre, gero ndò co ’l Doria a pescà in Veneto, a Cavalino de Jesolo, dato che là no i veva el fermo pesca.
Che robe... là, gereva duto nantro mondo; se podeva ciapàghene quante se ne voleva e nissun diseva gnente. Ma no ga durò a longo sta bubana; infati quìndese zurni dopo, se veva presentò a bordo dó de luri con una tànica de benzina in man e i ne veva fato capì che gera mèjo se tornèvomo da ndove che gerèvomo vignùi...
Ma tornemo sul discorso che vevo scuminsiò, de come semo rivài a tocà el fundi. Anca se no volevo sintì la vose che la me riveva de untan, co ’l tenpo, a son de gratà sora i scagni fora Lignan, Sant'Andrea, porto Buso e Grao, el fundi el se ga duto livelò come un canpo sportivo, sensa più i scagni. Le cape longhe e le peveràssole, no vendo più el so abitat, le xe sparìe. Eco parché semo rivài a tocà el fundi, ’desso vedemo le barche co ’l turbosofiante ferme, ligàe al molo.

[torna sopra]