|
Editoriale
“Coronavirus”. Na benedizion?
In tenpo de crisi, el teremoto de le nostre abitudini, provocà dal “coronavirus”, el deventa na bona ocasion par canbiare tante robe che le stava deventando pericolose par la vita personale e sociale de ancò. Jera on bel tòco che se diséa che cussì no la pol nare ’vanti. Ben: ’desso xe rivà l’ora de canbiare!
 | | Zento ani fà, durante l’influenza spagnola… se naséa via come ’desso… |
“Te gheto lavà le man, prima de vegnere a tola?” “Sì! A go la pèle tuta rasìa a furia de fregare i déi co ’l saon duro, tipo quelo de na volta, fato in casa!” El xe el minimo de i discorsi, fati a distanza de sicureza, tra marìo e mojere o tra mama e fiòi in sti giorni de “emergenza sanitaria”.
Ormai la xe na guera. E ogni dì che passa la va senpre pezo: non solo pa ’l ris-cio de malatìa o de morte, ma par tuto el resto: l’industria, el laoro, el comercio, el turismo, la cultura, la scola, i raporti tra le persone… Se po’ ghe zontemo el diluvio de brute notizie, de decreti e de boletini de morte e de infezion, che no semo pi boni de starghe drio… alora la xe propio na disfata de Caporeto!
No podemo negare che la question del “coronavirus” la xe seria e la va capìa e spiegà. El problema principale xe el nùmaro de le persone infetà, che le podarìa intasare el nostro Sistena Sanitario Nazionale, spece se se malemo tuti insieme. Stando a le cifre e a l’esperienza de la provincia cinese de Hubei, se noaltri italiani dovéssimo rivare a 70.000 infetà e a circa 10.000 ricòvari in terapia intensiva, co i posti a disposizion, no se sa come la narìa a finire.
Quindi, ogni prudenza e ogni sforzo da parte de tuti par no far circolare el virus, i xe assolutamente necessari. E questo, de conseguenza, canbia e canbiarà el nostro conportamento, tante volte esagerato, fruto de l’economia e del progresso.
Prima de sto ultimo problema, xe on tòco che se parla de alarme par l’anbiente, pa ’l canbiamento del clima e de l’inquinamento de l’aria. Ben, ’desso xe rivà l’ocasion giusta de métare tuti insieme sti problemi drento te ’l paroloto de la lissia e de inpizare el fogo par darghe on bel bojo e desgrezare forà tuta la rufa e la rogna.
E insieme eco l’ocasion par recuperare bona parte de quelo che, anca senza volerlo, ghemo lassà pèrdare fin ’desso: gustare el grande regalo de la vita e vìvarla nel mèjo modo possìbile, convinti che ghe n’avemo una sola. Cussì, restando de pi in casa, come che ne xe stà ordinà de fare, podemo risentire el calore de la fameja, acòrzarse che in casa ghe xe na mojere che sfadiga da matina a sera, che ghe xe i noni, magari avanti co l’età e co la salute cussì e cussì, ma ’ncora tanto utili, e ghè de i fiòi che no ghe pare vèro de védare i genitori insieme, in grado de deventare conpagni de zughi e soratuto conpagni de banco te ’l fare i cònpiti de scola al computer.
Se, par superare sto momento difìcile, dovemo ridure al streto necessario el raporto co i altri, questo farà aumentare el valore de i altri, e tornarà a èssare piassè vèra la solidarietà, come quela de na volta, quando se jera poareti e se gavéa manco zimerie.
A male estremo, estremo rimedio, dise un vecio deto popolare. Quelo che ne vien domandà de fare sta volta, no xe altro che quelo che senpre ga fato la gente in sti casi. Bonsenso e responsabilità i deventa de atualità, se pensemo a la peste nera del XIV secolo, a l’influenza spagnola del 1918-1920, pandemie gravi assè, quando no ghe jera le cure che ghe xe oncò.
Quindi sto virus qua che ’l ne fa paura, no ’l ga da far morire la speranza, parché anca se dovemo rinunciare a tocare, abraciare e stare vizini, ne resta intato el “cuore”. Anzi propio el cuore, insieme a na s-cianta de umiltà e magari on poca de fede, el ne insegnarà a vìnzare la paura, a gestire l’ansia e a progetare tenpi diversi, ma piassè umani.
Insoma, non tuto el male vien par far del male. El stesso Albert Einstein el ga dito: “La crisi è la più grande benedizione per le persone e le nazioni, perché la crisi porta progressi…”
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
“Coronavirus”. Na benedizion?
In tenpo de crisi, el teremoto de le nostre abitudini, provocà dal “coronavirus”, el deventa na bona ocasion par canbiare tante robe che le stava deventando pericolose par la vita personale e sociale de ancò. Jera on bel tòco che se diséa che cussì no la pol nare ’vanti. Ben: ’desso xe rivà l’ora de canbiare!
de Mario Sileno Klein
Ricorense storiche, in visentin
La bataja de Friola
Setantasinque ani fà ’nte i ultimi giorni de aprile 1945 el passajo de le trupe todesche pi sderenàe ga provocà morte e destrussion ’ntel paese in riva al Brenta.
de de Giordano Dellai
|
