Da Venezia

I tapéi voeanti

A partir dal ’400 i venessiani abeiva i so paeassi anca ne i pavimenti: cussì nasseva, e se ze mantegnùo fin ’desso, el terasso a eà venessiana, stupendo e ùtie come tante creassion de ogni genere nate qua.
’A creassion de sto terasso ’a vegneva fata co un sistema ben preciso che faseva parte de ’a tradission de ’a cità de San Marco. No ze questo el posto dove spiegarve ben come che el nasse, anca se un pìcoeo aceno ve ’o dago, tanto par dietarve un fià, prima de ’èzerve in qualche libro ’a tecnica conpleta. Se parecia el sotofondo co sabia e calce idraulica e sora de questo se sémena i tocheti de marmo de pìcoea pezatura, che gavemo selto a piaser nostro par ’a stansa; el giorno dopo ’naltro strato fato de sabia, calce spenta, coto e ancora tocheti de marmo. Se bate ben el terasso e se ’ó tira drito. Se ’assa sugar ben e se leviga fin al lucido, finindo co più passàe de ojo.
Queso ze queo che me ricordo in una de ’e volte che go visto far un batùo come ne l’antichià. ’Desso se dòpara anca el cemento e se lucida co màchine elètriche e magari se cura anca de i disegni inpenìi co tocheti de marmi sul stesso terasso.
I terassi antichi i gera fati co ’a calce parché in un teren particoeare come queo venessian i tanti movimenti i gera ben soportài in un soeaio no particoearmente rigido, cussì da farli durar par sècoi. Pensar un terasso cussì gera come farse far un vestito dal sartor par ’a casa che ’a deventava na opera d’arte.
Da pìcoeo me go imaginà, vedendo i pavimenti de casa mia, che i fusse come tapéi orientài voeanti, parché pieni de fantasia scrita co i tòchi coeorài de marmo che co ’l sol i deventava speci che te inorbava i oci, prima de partir par chi sa dove. In na stansa de casa ghe ne gera uno che gaveva anca tòchi de madreperla che me incantava fin a rapirme. A Venessia par che gnente sia stà fato par caso e che ’a beessa ’a fusse in ogni canton possìbie.
Tanto par citar un posto dove sti terassi i ze splendidi, me piase dirve de ’ndar a vardar quei de Paeasso Ducàe, esenpi unici e de grandesse iripetìbii. Ma so’ bastansa sicuro che, ne l’andar in giro par musei, no senpre ’a zente ’a riesse a acòrserse de sta meravegia tra ’e meravege dove artigiani, come maghi, i ze stai boni de far un tapéo de calce e marmo sospeso in aria.
Forse par questo Venessia ’a ze come che ’a ze e ’a me ga conquistà l’anima: parché no ’a ga mai ’vuo uno, dó, sento paeassi bei e ’torno ’a mediocrità. Venessia, ’torno uno, dó, sento posti bei ’a ga ’a continuità de ’a beessa che no finisse mai, e ancora, se no ne basta, verzendo ’e porte de na cesa, na casa, un paeasso, trovemo ancora e ancora beessa fin a inbriagarne tra questa, arte, misteri.
Na cità, un paesagio, un mondo che no finisse mai. In serte case el pavimento no el ze restà propio a livèo e se pol trovar qualche dislivèo e se ti salti a pìe fermi come a spinser zo, el pavimento se “flette”, cussì par chi no sa el ciapa paura parché se prova ’a sensassion che ’a stabiità ’a vègna a mancar e te par de poder sprofondar insieme al soeaio, ma sta carateristica de flessibiità ’a ze ’a salvessa de ’e case.
Spero de èssar riussìo a farve conós­sar anca sta particoearità, che ne l’insieme fonda el mito de ’a Serenissima che ga difuso el sol terasso particoeare fin fora de ’a laguna.
Chi che ga soto i pìe na sémena cussì el ze fortunà parché oltre a poderse imaginar come mi el tapéo voeante, el pol sivoearghe de sora co i calzeti de lana come el fusse sul giasso, se el se dà na forte spinta, senò, sepur lucido come un specio, no ti sbrissi par gnente: probàbie che anca questa sia na magia tuta venessiana.
Penso anca a i lavoratori che na volta i faseva sti pavimenti tuti a man conpresa ’a lucidatura, ma che i se ga reso, come figure, imortài. Come sul selciato fora de ’e case el sartor ga vestìo sta cità co bravura e testa, na brancada de ilusion da farne pèrdar ’a testa parché no ’e finisse mai, nonostante na vita a sercar de védarle tute e de contàrvene qualcheduna. Un posso sensa fondo, un salto in alto e na corsa che me farà deventar mi stesso piera e marmo o pavimento come tapéo intanto che parlo e vardo dentro e fora ’a magnificensa de sta cità Marciana.

[torna sopra]