Zente de Padova

Don Domenico Barbaran

La Sala Rossa de la Biblioteca del Seminario.

El Seminario Vescovile de Padova.

Go scoperto che sto prete el ga ’vudo de i pastissi par le so idee patriòtiche.
Domenico Barbaran el xe nato a Padova el 2 setenbre 1813. El se ga fato prete e nel 1838 el xe stà ciamà dal Seminario padovan a insegnare “grammatica” ne le classi inferiori e “storia” in quele superiori. Nel 1842 se ga zontà anca l’incarico de bibliotecario del patrimonio librario del Seminario, che gera inponente. Sto incarico xe stà interoto nel 1848 a causa de la so adesion a i moti antiaustriaci e el xe stà licensià. Xe el caso de precisare che in sta ocasion el xe stà ’jutà anca economicamente da mons. Modesto Farina che la pensava come lu.
No la xe finìa qua. Nel majo 1850, in base a na inchiesta de la polissia austriaca, don Domenico el xe stà espulso dal Seminario par i “suoi spiegati uffici politici” e ne i ani che xe vegnù el xe stà costreto a la latitansa par scanpare al controlo de la polissia inperiale. Pararìa, secondo qualche biografo, che el gabia conossùo anca la preson. El tenpo xe passà e, esséndose calmà i animi, nel 1856 el xe stà riamesso in Seminario con un incarico in biblioteca.
Dopo dó ani el xe stà ciamà a dirigere la Tipografia del Seminario che la gera in misere condission. A ciamarlo xe stà mons. Anton Maria Fabris “prefetto degli studi in Seminario”, che politicamente la pensava come lu. Sto incarico xe durà poco tenpo, anca se el xe stà positivo parché el ga risolevà le sorti de sta antica stanperìa. Infati ne l’otobre 1862 don Domenico xe stà ancora, e in modo definitivo, mandà via dal Seminario insieme a altri siè insegnanti e al stesso mons. Fabris par èssarse rifiutài de firmare un manifesto de protesta contro el “libello antitemporalista” scrito dal sacerdote belunese Angelo Volpe.
Rendéndose conto che el raporto co ’l Seminario de Padova gera stà definitivamente sarà, don Domenico el ga verto el colegio “Barbaran” in un primo tenpo a casa sua. Dopo, nel 1870 el conte Luigi Camerini lo ga ciamà a dirigere un colegio-convito qua a Padova, in piasseta S. Girolamo. Sto istituto, che gera frequentà soratuto da tozeti de fameje aristocratiche, el gera fiorente anca parché don Domenico gera stimà in sità. Oltre che a don Domenico insegnava anca don Giovanni Francesco Burlini che gera custode de la Catedrale sitadina e anca lu de idee liberali.
Don Domenico Barbaran nel xe morto qua a Padova el 2 febraro 1894. Sto prete el xe stà tormentà a causa de le so idee patriòtiche e liberali e purtropo le aministrassion comunali che se ga susseguìo fin uncò no ga ritenùo de onorarlo, intestàndoghe na strada o na piasseta.

[torna sopra]