|
Editoriale
La forza de le bone maniere
Dopo tuti sti mesi de alti e bassi – pi bassi che alti – dovemo pur rivare a na coalche conclusion par métare in crivelo “virus e dintorni” e rancurare quelo che de bon ne resta so ’l tamiso, par realizare quela che viene ciamà la “ripartenza”
 | | Eco na orenda abitudine che rende pesante la convivenza e che, a tuti i costi e co le bone maniere, bisognarà torghe olta. |
Na me vecia zia che da tosa la jera stà in colejo, la me contava che tra le materie de studio ghe ne jera una che nissuni, né i insegnanti, né le fameje, considerava de poca inportanza: la jera quela de le bone maniere, cioè de inparare a stare al mondo in un zerto modo.
Con questo, no xe che ghemo da rinpiànzare i secoli del “bon ton”, el ’700 e l’800, ma ghemo da stare ’tenti che le bone maniere no le vègna fate morire, anca senza volerlo, magari solo parché i tenpi i xe canbià o i ritmi de la vita quotidiana i ga altro da badare. Questo lo disemo par stare in guardia e par darghe valore a quelo che ancora de bon ghe xe in sto nostro vìvare.
Nando, sto istà, in vacanza in Vale Aurina, semo vegnù a savere che a Predoi, na zona de antiche miniere de rame, i minatori i faséa passare l’aqua del torente Aurino sora na lastra de fero par far depositare de le pìcole pajuze de oro che la montagna ghe regalava. A dire el vèro, lori i pensava che ’l fusse oro, inveze che rame, ma istesso el jera prezioso.
Cussì ghemo pensà – in vacanza ghe xe piassè tenpo par pensare – che da la miniera de l’esperienza vissùa a causa del coronavirus, podemo rancurare calcossa de prezioso che ne serva par la “ripartenza”.
No se iludemo che l’omo el sia veramente canbià, rinunziando totalmente a l’aroganza e a la strafotenza, ma da quelo che in sti ultimi mesi ghemo visto in giro tra la gente comune, pensemo che calcossa de bon se sia deposità sora la lastra de fero de i raporti umani.
Ghemo visto in coriera zóvani alzarse e cédare el posto a la persona anziana o in dificoltà. Có te incontri le persone par strada – e non solo in montagna – el pi de le volte ghe scapa on saludo o on soriseto. Te le boteghe i comessi i dòpara tanta gentileza e tanta pazienza nel servire el cliente o nel ’jutarlo a sèliare. Dirì che ghe conviene, senò adìo cliente e adìo posto de laoro, ma intanto se torna a doparare le bone maniere.
Questa xe la riprova che tuto el male no ’l vien solo par fare del male: tante volte dal male se inpara a zercare el ben. E xe propio ben che in tel crivelo de le bone abitudini se sia salvà ste vece “usanze”, che jera in parte ’ndà fora de moda, par no dire sparìe, sofegà da la grosta de l’indifarenza o da la pressia del moderno modo de vìvare individuale e egoìstico.
Metémose pure mascarina e goanti, e ossevemo el distanziamento, ma no stemo pèrdare l’ocasion de doparare le bone maniere, che, oltre tuto, le dimostra bona educazion, alto senso civico e nobiltà d’animo.
Pensemo anca che par la “rinascita” podarìa èssarne de aiuto la cultura, l’arte, la poesia. Propio de la poesia, el grande poeta Garçia Lorca el diséa: “La poesia frena la bestia che c’è in noi, prima che l’inciviltà degli altri.”
Ben vègna dunque ste bone usanze, ste bone maniere che, magari da sole, le riussirà a garantirne el ritorno a na “civiltà perduta”.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
La forza de le bone maniere
Dopo tuti sti mesi de alti e bassi – pi bassi che alti – dovemo pur rivare a na coalche conclusion par métare in crivelo “virus e dintorni” e rancurare quelo che de bon ne resta so ’l tamiso, par realizare quela che viene ciamà la “ripartenza”
de Mario Sileno Klein
Da Venezia
Case e paeassi venessiani
de Armando Mondin
Ciàcole visentine
Pelè o Maradona?
In sto mese, i do sportivi, considerài da tuti i mèjo canpioni del balon, conpisse rispetivamente 80 e 60 ani: ma chi xe stà el pi forte?
de Giordano Dellai
|
