Ciàcole visentine

Pelè o Maradona?
In sto mese, i do sportivi, considerài da tuti i mèjo canpioni del balon, conpisse rispetivamente 80 e 60 ani: ma chi xe stà el pi forte?

El calciatore del Napoli, Diego Armando Maradona insieme a Pelè.

Parigi, 9 giugno 2016: Pelè e Maradona insieme.

La domanda xe senpre quela: chi xe stà el pi forte tra Pelè e Maradona? Provemo a rispòndare in sto mese de otobre 2020, cò se festeja el 23 i otant’ani de O Rei e ’l 30 i sessanta del Pibe de Oro, come i xe stà mensonà co la menda pi ’doparà. Se trata de dò funànboli del balon, persone che podeva dessìdare da soli l’andamento de na partìa, zente par cui i conpagni gera la doverosa e magari anca pressiosa soasa de un quadro a cui solo luri podeva métere el penelo.
Par chi che ghe piase el calcio, Pelè e Maradona xe, se pole dire, el calcio stesso, un smissioto ben conbinà de talento, fìsico, passion, testa e fantasia. Ingredienti, questi qua, che ga prodoto risultati grandi senpre e dopo ’ncora, che ga fato la fortuna sua de lori, de i so alenadori e de i conpagni de le squadre par cui i ga zugà.
Ma partimo co le presentassion. El vero nome de Pelè xe Edison Arantes do Nascimento, nato el 23 otobre 1940 a Três Coraçöes ’ntel stato de Minas Gerais, in Brasile.
Fiolo d’arte rente a na fameja comunque poareta, Pelè a sèdese ani gera za titolare de quela che sarìa senpre stà la so ùnica squadra, el “Santos”, che co lu ga vinto de tuto. Pelè xe stà anca l’ùnico zugadore al mondo a vìnsare tre edission del canpionato mondiale de calcio, na vera inpresa che lu xe riussìo a fare co ’l Brasile ’nte i ani 1958, 1962 e 1970. In sta ùltima edission de sinquant’ani fà, dove, come tanti se ricordarà, el Brasile ga superà in finale par 4-1 propio l’Italia, xe famoso el primo gol da lu realizà de testa, consegnà a la storia parché el so staco sùpera inpietosamente queo del difensore italian Burnich de quasi mezo metro. Pelè ga el record de i gol fati in cariera, 1281 in 1363 partìe, co na media realizativa de 0,92 gol a partìa. Par el so valore i zugadori che ga vinto ’nte i ani el Balon d’Oro ghe ga atribuìo el Balon d’Oro del sècolo.
Parlando invesse de Maradona, anca lu ga avùo na infansia difìssile, rente a la periferìa de Buenos Aires ’ndove che ’l gera nato el 30 otobre 1960, ma la so passion par el calcio lo ga portà a ’vere quelo che la vita altrimenti no ghe garìa dà. Anca lu el ga vinto, come capitan de na Argentina bastansa modesta, l’edission del 1986 del canpionato mondiale de calcio, ’dove se ricorda la partìa de quarto de finale vinta quasi da solo par 2-0 co l’Inghilterra, co i so dò famosi gol, uno de pugno e uno dopo ’ver scartà praticamente tuti i zugadori aversari, po’ definìo el gol del sècolo. De lu i tifosi italiani ricorda soratuto i ani passài al Napoli, dal 1984 al 1991, co la conquista de i dò primi, e fin ’desso ùnici, scudeti partenopei. No se pole scòndare che Maradona el xe stà anca na figura de sportivo un poco particolare, sicuramente el so modo de fare ga diviso i apassionài: chi lo adorava sensa gnanca pensare a la moralità de queo che diseva o faseva; e chi invesse lo detestava, a pressìndare da le so abilità calcìstiche. A sto proposito basta dire che el xe stà sospeso na prima volta ’ntel 1991 par uso de cocaina e pi tardi ’ntel 1994, durante el canpionato del mondo in America, par ’ver mandà zo efedrina par pèrdare peso.
Insoma do gran canpioni, diversi par caràtere e stile de vita, ma ’ntel canpo da zugo altretanto boni de atirar l’atension de tuti, no solo de i sportivi. Chi xe stà el mèjo no se sa, non se pole savere, anca parché i ga zogà in dò èpoche diverse.
No resta ’lora che augurarghe bon conpleano, da vìvare co le persone che ghe vole ben, e de restare qua ancora tanti ani, rapresentando da par suo in tuto el mondo el valore del sport a i màssimi liveli.

[torna sopra]