Da Venezia

Case e paeassi venessiani

Eco come costruire case, paeassi, ponti, cese so l’aqua a Venessia. (foto da venicewiki-Gabriele)

A Venessia no ghe ze stà croi su ste antiche abitassion. (foto Armando Mondin)

No ghe ze gnente che possa somegiarghe a Venessia anca nel so inpagàbie patrimonio ediissio che no el gavarìa senso de èssarghe se no el fusse stà costruìo su na aventura unica al mondo, su un ponte che el va verso ’a Luna e dopo ancora più ’vanti. Domandémose come ga fato a star in pìe case, paeassi, ponti, cese costruìe su l’aqua dove riva anca ’a forsa del mar.
Vegneva selto el perimetro de ’a costrussion, dove qualche metro più in là, par lavorar dopo al suto, se piantava dó fie de pai par formar un “cassero” inpenìo de fango. Messa a suto ’a zona se cominciava a inpiantar a man pai de fondassion che i gera de quercia, larice, pini, uno tacà a st’altro fin a tocar el caranto, argìa dura come ’a piera, a 6-7 e più metri a secondo de ’a zona. Se svodava dal fango el posto definìo da i pai, e el se inpeniva de sassi, rocia, ’egno fin al livèo de ’a testa de i pai.
Qualche volta vegneva inpiantà altri pai come i primi a i àngoi del perimetro par raforzar ’a base de ’a costrussion.
Fato questo se meteva sora i pai un primo strato orizontàe de toe, da pàeo a pàeo, e ’naltro verticàe par crear na base che se ciamava zateron.
Sora de sta sòida base se cominciava a far el muro, partindo da na base in piera d’Istria o matoni par ’e case de ediissia minore. Una de ’e carateristiche de ’a piera d’Istria ’a ze quea de ’ver na forte resistensa al salso.
Tuta ’a cità de San Marco ’a ze stada costruìa cussì, su na foresta de àlbari inpiantài soto aqua.
Nel me lavoro me ze capità de védar el zataron e anca i pai che quando che i gera cavài i gera come novi, conservài da l’argìa, ma ’assài fora prima de portarli in discarica, dopo qualche giorno, a contato co l’aria i se disintegrava in gran parte.
Costruir case e paeassi el gera un lavoro longo e costoso che proprio par questo el ga permesso che ’a cità, anca quando ne i sècoi ze stà rifato o ristruturà case, cese, paeassi i gabia mantegnùo ’e stesse fondassion, creando ancora na volta na magia architetònica parché, par esenpio, na cesa come quea de Santa Maria Formosa, rifata nel Rinassimento ’a ga mantegnùo luce e disposission de ’a prima cesa in stie bizantin, verzendo leture mentài de gran piaser e vaeor.
Nel tenpo case e paeassi i ze stai alzài, ridusendo ’a difarenza de altessa da ’e cese e da i canpanìi sensa che se dovesse rinforsar ’e fondassion originài, segno che i proti de chei tenpi, ma anca i sènplici artigiani i gaveva visto ben più distante del so naso.
Par ’a gran dificoltà e par el gran costo de far rivar i materiài da costrussion ne ’a cità Marciana, se tentava de doparar i materiài demoìi come piere, marmi , tavoeame, travi, coeone e anca sto fato el ga reso sta cità straordinaria parché stii diversi se missiava in maniera talmente bea e funsionàe da crear vision uniche e na architetura che pareva un continuo ripètarse de sène teatrài, casa dopo casa, paeasso dopo paeasso, e cussì par tuta Venessia.
Anca a l’inerno de ’e abitassion de ogni tipo ghe gera particoeari costrutivi unici come par esenpio che i muri portanti interni i gera messi co andamento perpendicoeare a ’e faciate cussì che i soeài no i gravitasse su ’a faciata stessa. Insoma i muri portanti interni i gera indipendenti, permetendo cussì na elasticità necessaria parché i frequenti movimenti del teren no fasesse dani. Tanto ze vera sta storia che a Venessia no ghe ze stà croi su ste antiche abitassion.
Insoma sta fàvoea venessiana ’a se ripete dapartuto, dentro e fora de tuto queo che ancora ’desso podemo védar, magari sensa domandarse tanti parché.
Conóssar calcossa in più del rito de ’a Serenissima el pol èssar un motivo par poder vìvar megio, sentirse fieri de poder vardar, anca se par un sóeo giorno, dentro na cità unica al mondo, par sècoi potente e elegante al tenpo stesso. Fiera fin ’desso nonostante tuto.
Costruir na cità in mezo a eà laguna pareva inpossìbie, costruirla anca bea e iripetìbie pareva gnanca imaginàbie epur ze stà cussì, serchemo de no desmentegarlo mai.
Come i pai tirài fora da eà crea che i pareva novi, come el zataron che el senbrava ’a carena de na nave pena varada, anca nialtri serchemo de mantegner na dignità intanto che parlemo de Venessia, inzenociàndose sensa nissun timor davanti a tanta beessa.

[torna sopra]