Da l’Alta Padovana

I veneti a Alberese

Semo ’ndài al mare so ’a spiaja a Alberese.

Insoma jèrimo schiavi… solo laorare…

Panorama de Alberese (GR).

’Na matina de agosto del ’90 mi e tuta ’a fameja, semo ’ndài al mare so ’a spiaja del Parco de l’Uccellina a Alberese (GR), indove che jèrimo in ferie. Dopo ’ver fato el bagno, l’idea jera de far marenda a l’onbra de i pini drio l’acoa, ma se ghemo acorti suìto che là no se podéa resìstare parché su pa ’e piante ghe sarà stà on milion de zhigàe che fazéa on bordèo da insemenire e, parlando, no se capìimo gnanca. ’Lora, tornài in paese, me mojere ze ’ndà far spese e mi me so’ messo rinfrescare ’e me dó tosete e ’l pi picinin, tuti scaldonài, udàndoghe ’dosso l’acoa de ’a tanicheta indove che i voéa.
Scherzhando, se parlàimo in diaeto, come senpre, senzha acòrdarse che ne jera vegnesta rente na veciota:
“Vèro, sìo da Pàdoa voaltri?”
“Sì, signora – ghe go risposto. – Zéa coà in ferie anca éa?”
“E come nò! Ze dal ’35 che so’ coà in ferie e no so’ pi tornà Galiera!”
’Lora no me ga parso vèro de tacare boton co una che podesse contarme come che jera ’ndàe davero ’e robe so ’e bonifiche fassiste, invezhe de scoltare senpre i documentari Luce de l’epoca, carghi de bae e de omission.
“Caro da dio, cò semo rivài coà no ghìimo l’acoa sorgiva, come casa nostra, ma roba de pozho che ne tocava farla bòjare pa no ciapare el coera. Pa far da magnare ghìimo coatro pignate vece e caini macài, come che te vidi par teevision in Africa (’lora in tv i fazéa védare sti documentari). Jèrimo 14 in fameja e l’Opera Nassionàe Conbatenti ne ghea dato on podere de 60 canpi da riscatare, par contrato, co ’a mezadrìa dopo 10 ani de laoro. I ne ghea dato tanta tera parché no ’a vaéa gnente: torba e crèa rossa senzha sostanzha par formento e forajo. Par ani tuti: òmani e fémene, ghemo laorà el dopio che so ’a tera in Veneto, e toendo-su metà fin che no ghe ghemo fato on strato senpre pi bon co araure e leame. Va ben che i ne ghea anticipà casa e stàea nova in afito, vache da late e boi pa arare, ma jera tuto da riscatare e cussì ogni racolto, tra on conto e chealtro, el jera senpre spartìo a vantajo de l’Opera e se patìa ’a fame. Pudìimo tegnerse de proprietà on poche de gaine e uno o du mas-ci da grassa a seconda de ’e boche in fameja.
L’Opera comandava tuto e tuti. Luri destinava semenzhe e concimi da doparare, i laùri da fare e dove menare el racolto a l’amasso. Dopo na piova jera luri che decidéa cò se podéa ’ndare su i canpi pa no rovinare, pestando, sta tera de crèa rossa, come se noaltri fùssimo vegnisti dal mondo-cuco. Insoma se no jèrimo schiavi, poco ghe mancava. Se podéa mòarse da i canpi sòeo pa ’ndare scòea o ’ndar tore a pìe in paese i puchi generi necessari, ma poche volte ché ghe jera i fiduciari a fare ’a spia. Sòeo de doménega se podéa ’ndar messa e catarse cu i altri. Al sabo rivava a cavàeo el fatore o ’l capo zona che ghea senpre da dire che no ’ndava mai ben gnente e bisognava tasère pa no farse mandar via. Coalche capo fameja però, stufo de sentirse dir-sù dopo tante fadighe, li ga ciapài a sbajàe o a forchetàe co ’l risultato che luri ze ’ndài a l’ospedàe e lu co ’a fameja parà-via in tronco e rispedìo da indove che ’l jera vegnesto. E pensare, tanto pa dìrghine una, che coà sémo stai noaltri veneti a insegnarghe far-sù el mas-cio. Ciamàimo sti toscani “parsuto e cortèo” parché a meodì chi che jera pa’ i canpi, buteri conpresi, se sentava soto na onbrìa co ’l cortèo a tajarse slepe de carne saeà e de pan dessavìo, co na bossa de vin. Ma cò i ga sajà i nostri saeadi, musiti e sopresse, i ga fato presto canbiare sistema. Dopo 10 ani, secondo el contrato, ghìimo da èssare paruni del podere che intanto ghìimo fato deventare on giardin, ma Roma, suìto dopo goera, l’Opera ga tacà dire che ghìimo pagà massa poco e che ’desso i voéa naltro riscato a schei. ’Lora racoante fameje ga rinuncià e i ze ’ndài via, noaltri ghemo voesto restare e cussì ’a ghemo pagà dó volte. Altro che “regaeà” come che dize zherti porzhèi! E se no ’l me crede, el ghe dimande a i veci doménega a ’a Festa de ’a trebia. Là ghe saremo tuti a vardare i dòvani che trebia co ’a Landini e ’a màchina de na volta, a cantare ’e nostre canzhon venete e a parlarse co nostalgia inte ’l nostro diaeto che romai i nostri tosati, ’ndando scòea Grosseto, i ze drio desmentegarse.”

[torna sopra]