Da la Bassa Padovana

El musso, da bastonà a incensà
San Francesco el lo ga messo in tuti i presepi, però el musso el xe senpre stà on animale da fadiga e bastonà, fin a deventare, sti ultimi ani, on colaboratore de l’omo in casi sociali, dal “Pet-Therapy” a le Fatorìe didàtiche. Xe canbià el musso o semo canbià noantri?

El musso come el vegnéa doparà na volta.

Eco me el vien doparà ’desso el musso, ne la pet-therapy.

In te i giorni de vacanze da scola, passà a casa de me zia, so la strada che porta a le vale de Mejain, a vegnéa svejà da on rugolare de roe de careto che le schiciava i sassi de la strada ingiarà. I jera i careti de i poareti del paese che naséa in vale a zaparse la polenta, nata in te la “parte de vale” (gnanca 1.000 metri coadri) che ghe vegnéa assegnà dal Comune.
Ogni careto el jera tirà da on musso e so ’l careto on omo e so mojere, le zape e la sporta co i botilioni de acoa e vin, sarà co ’l castelon, e coatro fete de polenta brustolà con coalche feta de salado ranzo, rojà so on toajolo, par disnare.
E ’na volta a casa a la sera, el musso el naséa dentro par la stessa porta de i paroni e el se metéa so ’na càmara e i paroni da chel’altra. Par tera el stesso pavimento, in tera batùa! Robe da desmentegare!
Sta pora caseta, el musso, el careto e le zape le jera tuto coelo che i gavéa, assieme a le pagnoche che dovéa créssare ne la “parte de vale” par farse farina par la polenta de tuto l’ano.
E coando el musso el deventava vecio, bisognava canbiarlo, cossì, copàndolo, a se vendéa parte de la carne e la pèle da concia, par ciapare calcossa par conprare el musso novo. La carne restà la vegnéa cota pian pianelo con aromi de l’orto e magnà pociando tanta polenta, esaltando la coalità del musso e ciamàn­dolo oncora ’na volta par nome.
El musso el xe stà on animale bastonà, tanto no ’l se ribelava, ma generoso e con tante funzion. Mèjo del mas-cio. Da pìcolo el faséa conpagnìa a i toseti tanto che el xe stà messo in te ’l presepio vizin a Gesù Banbino, da grande el laorava ne i canpi e a tirare el careto par strada, el concimava la tera co ’l so luame, la mussa la daséa e la dà el ‘’so prezioso late, e da morto el daséa da magnare chi che lo gavéa bastonà.
Ma adesso anca par el musso le robe le xe canbià. Dopo on periodo indove che el ga ris-cià de sparire parché no ’l jera pi necessario in te i canpi, el xe deventà on prezioso colaboratore de l’omo in programi de intaresse sociale e economico, e la so créssita in nùmari de esenplari la xe de + 337 % in Italia in te sti ultimi 10 ani (dati Coldiretti), fin a rivare a ’na stima de 60.000 capi.
E xe nati, anca in Veneto e in tel Padoan alevamenti con produzion del prezioso late d’asina, fatorìe didàtiche con mussi, centri con sti animali amici de i toseti indove che viene aplicà la pet-therapy che la xe entrà tra le nove atività previste da la lege so l’agricoltura sociale, indove che el musso el juta i operatori in te on percorso curativo, deventando amico de i pìicoli malà. A ghin nòmino du de sti centri: “La terra degli Asini” de Mestrino (PD) e “La città degli asini” de Polverara (PD), dove el musso el trova inpiego in ànbito didàtico, ludico, turistico, in colaborazion con ULSS, Associazion, Cooperative Sociali, Grupi Scout, Sezion CAI, ec...
A sto punto bisogna rispóndare a la domanda iniziale: xe canbià el musso o semo canbià noantri?
Mi a non credo che in sti 50-60 ani sia canbià el musso, lu el resta senpre l’amico de l’omo, umile e paziente, e alora semo canbià noantri, con na vita senpre de corsa, tra tràfico, laoro, supermercato, oncora tràfico par nare in ferie, e tuto coelo che ne costrinze el vìvare moderno. E come mai i nostri fiòi o neodi i se cata mèjo con l’amicizia sènplice e paziente del musso, che al supermercato o in coa par ore, in màchina, par nare al mare? Xe da pensarghe e da meditare.

[torna sopra]