|
Tradission
Epifania: tute le feste la porta via
La Befana la xe na figura particolare de le feste del Nadale, la xe na vecia che, svolando su na scóa de sagina, la va a trovare i putèi ne la note tra el 5 e el 6 de zenaro, apunto “la note de la Befana”. La se cala zo par el camin a inpinire de dolseti, le calse picàe via su la napa o vissin a na finestra: de solito i putéi che xe stà bravi, boni e ubidienti i trovarà caramele, bajiji, stracaganasse e magari qualche zugàtolo; invesse quei che xe stà manco boni i trova anca qualche toco de carbon (dolze).
Se pensa che sta festa la fusse stà tramandà za da i ani antichi par ricordare de i riti ligài a i cicli stagionali de l’agricoltura, quando el racolto de l’ano passà jera romài pronto par rinàssare come el novo ano. I antichi Romani i gheva eredità sti riti e, ligandoli al calendario, ricordando la fine de l’ano solare e la ricorensa de la festa al dio Sole, la dodicesima note dopo el solstissio invernale, se festejava la morte e la rinàssita de la natura, ricordando proprio la “Madre Natura”.
I Romani credeva che in te ste dódese note (dove 12 jera i mesi del novo calendario romano) se ricordasse le figure feminili che svolava sora a i canpi za semenà par fecondare le semense che doveva nàssare rigoliose par avere racolti pi abondanti. Eco la figura feminile “volante”, la Befana, che secondo la tradission la ricordarìa la natura invernale rafigurà da na veciassa co na goba granda e grossa, co ’l naso longo e storto, i caveji bianchi e spetinài, vestìa de strasse, le scarpe tute rote, co i déi che vien fora da i busi. Sta veciassa che svola sora i canpi e i tereni de note la promete la fertilità del racolto, e festejà ne i 12 giorni dopo el Nadale che capita proprio co la note de l’Epifania.
Nel IV secolo d.C., la Cesa de Roma ga scuminsià a condanare tuti i riti e le feste pagane, disendo che de drìo ghe jera la figura del diavolo e de le strighe. Invense la “Befana” no la xe na striga, ma na veceta bona e generosa che, svolando su la so scóa la ricorda la purificassion de le case (e de le àneme), par l’arivo de la nova stajon, el novo ano. Demonisà da la Cesa, la vecia figura pagana feminile xe stà acetà pian pianèo nel Catolicésimo, come la figura che la rapresenta el ben e el male; consilià da un gran teologo (Epifanio), la xe stà fata cascare el dodicesimo giorno dopo el Nadale, portando co ela anca tuta la sinbologia numerica pagana.
Nel 1928 el regime fassista se la ga fata sua, ciamàndola proprio “Befana Fassista”, andove vigneva regalà a i putèi puareti zugàtoli e qualche vestitin: me ricordo ne i ultimi ani a la fine de la guera se ’ndava in fàbrica dove lavorava me popà e, dopo na cerimonia, ricevévino i pachi dono. Mi me ricordo solo de i zugàtoi: el primo ano i me ga regalà un carton co i atressi del “piccolo falegname”, naltro ano el traforo, naltro ano ancora “el mecano”, tuti regali che te insegnava a deventare un bravo lavoratore… dopo “ràngiate”.
Passando i ani, ogni paese ga trovà na maniera diversa par ricordare e festejare sta vecia tradission: ghe xe chi la fa vigner zo dal canpanile, ligando un baldo giovanoto vestìo in costume Befanesco; sinò tante vecete vestìe e mascarà da Befane che passando par el paese regala dolseti e zugàtoli a i putéi che le incontra. Ne la Marca Trevisana i tira sù na gran mucia de fassine e có fa scuro i ghe dà fogo: a seconda de dove gira le falive se pronòstrega come sarà el racolto; dopo, vin brulè e cicolata calda a tuti.
La tradission la vole vecia e strassonà, co la so scóa in mezo a le ganbe par ricordare la fine de l’inverno quando i dì torna a slongarse: se passa dal vecio al novo, dal fredo al manco fredo e come diseva la tiritera “Fin Nadale fredo no fa, braghe d’istà; passà Nadale fredo passà, braghe d’istà”, ma alora no ghévino tanto da vestire e, da bon, che jérimo vestìi. Anca in cesa, dal tenpo forte del Nadale se passa a quelo ordinario e proprio par quelo se festeja la Befana e se proclama la famosa sentensa: “L’Epifania tute le feste la porta via!”
Se conta anca che i Re Magi, in viajo verso Betleme, ghesse dimandà a na vecia come che i podeva rivare a la grota del Banbinelo par portare i doni al Salvatore. La vecia però no savendo la strada, squasi secà, la ghe ga dito che no la saveva; dopo, ripensàndoghe, la se ga pentìa. Par rimediare, la se xe preparà un saco pien de regali e, sercando de ciapare i Re Magi, la bateva a ogni porta, lassàndoghe a i putéi un regalo (cussì la sperava de trovare su na casa el Salvatore). La festa de la Befana ricorda anca la tradission de la festa de Santa Lucia, che lassava i doni a i putéi, come San Nicola prima che rivasse Babbo Natale. Par questo che no la xe na bela signora zóvine e delicata ma, al contrario, na vecia goba e storta: cussì la rapresenta l’ano vecio che se lassa a le spale e che se pol brusare parché oramai finìo.
No bisogna confóndare la Befana co le strighe: infati ela la ga in testa un fassoleton e un siarpon de lana ingropà soto la sbèssola. La monta la scóa par roverso e i regali la i tien su un saco de juta sbrindolà (e anca questo el ciapa la forma de un gran calseton). Secondo quel che se dize in serti posti, la Befana la sarìa la mujere de Babo Natale, o na so amica o na so parente; in altre invense se dize che no la esiste par far créssare l’inportanza del vecio barbon che ’l dize in giro che la Befana no la esiste. Ghe xe anca na bela poesia par sta figura de bona dona: «La Befana vien di notte - con le scarpe tutte rotte – co ’l vestito a la romana - viva viva la Befana!»
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
E con questo… i xe 38!
Co l’ano ’pena conpletà, i xe 38 i trimi instradà dal versuro del tenpo, dove Quatro Ciàcoe ga messo zo la mèjo somenza del nostro parlare, par sunar sù la prova che el dialeto veneto (come pure tuti st’altri) no ’l xe na lingua che sa da brusin, ma che anzi la ne permete de rumare, scavare e scalumare memorie, ricordi e atualità.
de Mario Sileno Klein
Tradission
Epifania: tute le feste la porta via
de Luigi Frosi
|
