Da la Bassa Veronese

Èrene cussita, na olta…

Questo l’era el WhatsApp de na olta…

Questa l’era la Scavolini de alora.

E d’istà le se portava la carega in strada…

I nostri zughi da butelete.

È ’pena fenìo l’ano bisesto… co tuto el so dissesto! Mi no sò come se la cavaremo. Me par ieri che emo festejà el novo secolo 2000.
E me ven i sgrisoloni a védare quanto el tenpo el core in pressia. Cussì penso con gran dispiasere a me zio Guido e a tanti altri de la so età, nati nel 1920, che l’ano passà i à conpìo 100 ani in cielo.
Poarini lori che, da zóeni, a soli 20 ani i jera in guera sul fronte francese o in Albania, e dopo, par zinque ani, senpre in guera; na tragedia fata de luti e de miserie.
Inveze, quei che ga vint’ani ancó iè zóeni, pinpanti, pieni de vita e, anca se ghè la paura del virus, come noantri, i vive in pace.
Speremo che ne dura on po’ de ben stare e che ’l possa durare par senpre, anca se i venti de guera i va de longo e iè senpre indrìo supiare sul fogo. Ma quanti canbiamenti de vita che à portà sto secolo qua.
Pensemo a le nostre none; quando l’era sera, d’inverno le faséa filò in stala e d’istà le se portava la carega in strada e, laorando senpre a uce o a crossè, le se la contava, ciacolando assè tra de lore. Quelo l’era el WhatsApp de na olta, senpre in movimento de lengoa e de man.
No parlemo del locale de la cusina de chei tenpi: na stua economica, teje tachè a i muri, na tola granda e na cardenzeta, quando la nava ben! E quela l’era la Scavolini del tenpo passà.
Alora se se godéa co gnente, anca par zugare. Me ricordo me nono Santo, quando el me toléa in brazo, che, par farme rìdare, el me diséa:
“Guarda che bel boton” (e mi sbassava i oci su la me camiseta) e intanto lu… “pinpanason!” e el me faséa védare el so dielon tra i altri du dièi, come el m’avesse cavà el naso.
Lu el credéa de farme rìdare, ma mi sto scherzo no ’l m’è mai piasù.
I nostri zughi? I jera la caranpana, disegnà co na scheja de copo par tera, o ciupascondi, na pua de pezza o na bala al posto del balon.
Par béare, se gavéene se’, andàene a la ponpa in strada o in casa bevéene co la cazza dal secio de rame.
No ghera mia COVID e PFAS invelenà come ’desso; l’era tuta aqua bona assè.
Me incorzo purtropo che sto vivendo on momento de ricordi e de nostalgia.
Èlo segno che devento vecia?
Epure go in mente tante robe ancora da fare, tanta oja de laorare, i fiói da badare anca se oramai i ga quasi tuti zinquant’ani.
Me perdo ’ia ancora a guardare i bei tramonti, le panoce sul zélese, la bruma sora le verze, el fosso giazzà drio casa, a rivìvare, dirìa, religiosamente le tradizion, e vao de longo cussì, vivendo i me giorni in serenità, ringraziando senpre el Signor.

[torna sopra]