|
Editoriale
Sarà Nadale anca st’ano!
Tra poco sarà Nadale e de sicuro, anca st’ano, el sarà condizionà da l’epidemia del Covid e el vegnarà festejà a la bona, ma in modo sincero. Gesù Banbin no ’l ghe metarà tante scale par nare a portarghe aiuto a chi ga bisogno de Lu e de tuti. Questa xe anca la nostra speranza.
Covid o no Covid, el conpleano del Putin-Messia no ’l restarà senza festejamenti. Soratuto par i so amici butini che no i s’à mai destacà da la “magia” de sti giorni particolari de l’ano, e che i xe za in arion par savere se ’l rivarà o no ’l rivarà Babbo Natale.
Xe belo acòrzarse propio da questo, che el coronavirus, anca canbiando facia, no ’l ghe la fa a far morire i sogni e le speranze de i putèi, ma anca de i grandi. E xe propio a noantri grandi, putini de ieri, che oncò ne vien domandà de rilanciare l’inportanza del Nadale.
Se se cavemo anca sto pilastro de sostegno, adìo bisi: l’inpalcadura del significato sociale, insieme a quelo religioso, la s’incucia e sarà tante le vìtime finìe soto le macerie de na sconfita umana senza confronti.
E no zerchemo de tirare in balo el canbiamento provocà da l’epidemia, parché propio el Nadale, tanto prima del Covid, domila ani fà el ga portà el canbiamento che ga rivoluzionà el mondo e che ne ga insegnà che, quando tuto pare destinà al disastro, pol nàssare calcossa de straordinario.
Tanto piassè de prima dovemo tornare a crédare, a sperare e a volerse ben, parché no ghe xe gnente de pi belo del stare insieme, del catarse, del confrontare le nostre idèe con quele de i altri, senza bisogno de rivare a la violenza, a l’odio, a la distruzion de la persona e a fare dani. Se ne le manifestazion pùbliche, inveze de infogare i scalmanà, che dopo se sa come la va a finire, vegnesse tirà in balo l’esenpio de Gesù Cristo, rivoluzionario vegnù a parlare de speranza, de fede, de amore e de perdono, quanto mèjo sarìa par tuti. Pecà che questo no ’l càpita mai.
E alora eco on motivo in più par tentare de farlo sucédare a Nadale!
Prima de ’desso, i giorni del Nadale i jera deventà “giorni imposti”: o te li vivevi come comandava le abitudini, el comercio, el consumismo, i regài, le zene, i viaji… senò no ’l sarìa stà Nadale.
Oncò, dopo la paura, el luto, la morte, i nostri desideri i xe piassè orientà al mondo interiore, a quelo de la fameja e de la vita vera.
El Nadale deventa la festa de tuti: de i boni e de i manco boni, de i bei e de i bruti, de i inportanti e de i anonimi, de chi ga el Covid e de chi no lo ga.
El ga da èssare el Nadale de le fameje “normali” e de quele che ghe someja, de chi se xe vacinà e de chi no se la sente de farlo, de chi ga on posto de laoro e de chi tira la sola “indennità di cittadinanza”…
Par tanti la sarà dura reagire, ma xe necessario farlo, magari dàndose, de sfroso, na streta de man e on abracio: pìcole robe, ma de grande valore. Sicome propio a Nadale el desiderio el deventa pi forte, sarà necessario esagerare nel corajo e cussì el Nadale el deventarà on momento de vera rinàssita, fata de vicinanza, de responsabilità e de condivision.
I primi a èssare contenti sarà i nostri putini ch’i se metarà a saltare come i cavareti, vedendo che anca st’ano xe rivà Babbo Natale, essendo pi forte del Covid.
Gnente ne inpedirà de sentirse putini anca noantri grandi e de inbocare la strada de i sogni. Forse, ne vegnarà in mente quelo che ga dito l’angelo ne la Note Santa: “Non temete, perché è nato per voi un Salvatore.”
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Sarà Nadale anca st’ano!
Tra poco sarà Nadale e de sicuro, anca st’ano, el sarà condizionà da l’epidemia del Covid e el vegnarà festejà a la bona, ma in modo sincero. Gesù Banbin no ’l ghe metarà tante scale par nare a portarghe aiuto a chi ga bisogno de Lu e de tuti. Questa xe anca la nostra speranza.
de Mario Sileno Klein
Fresco de stanpa
NOMEN OMEN, un nome un destin
Xe stà presentà a fine novenbre l’ultimo libro de Giordano Dellai
de Giordano Dellai
|
