Da la Bassa Veronese

Onore al “Milite Ignoto”

El Sindaco Corrado Vincenzi, l’Assessore Gianluca Mirandola e i Alpini su i scalini de l’Altare della Patria.

Ne le dó foto, prima vien deposti i mazzi de fiori davanti la Tomba del Milite Ignoto, e dopo ghe vien reso onore.

Foto de grupo de tuti i partecipanti.

A nome de tuta la citadinanza de San Pietro di Morubio, ne la Bassa Veronese, el sindaco Corrado Vincenzi, insieme con na rapresentanza de concitadini e con l’assessore Gianluca Mirandola del Comune de Isola della Scala (VR), i à deposto, el 16 Novenbre passà, on mazzo de fiori su la Tomba del Milite Ignoto, a Roma, in memoria de tuti i Caduti morubiani (che i jè stà tanti), de le dó guere.
On gesto forte, necessario e civile, dopo tuto l’inpegno avùo par onorare, “in loco” e nel Veneto, i soldà de la Prima Guera Mondiale, con la publicazion de TA-PUM – Lettere dal fronte e Adorata Luigia-Mio diletto Antonio, da mi curà nel lontano 2001.
Me pare ieri, chel 27 Magio del 2001, la presentazion del libro, davanti a almanco 500 persone, con la partecipazion de on fraco de autorità pùbliche, militari e civili, oltre a le Associazion de i Combatenti e Reduci, con quel “Presente!” pronuncià a voce alta dal presidente de l’Associazion, Marcello Lampo, dopo ogni nome de i 69 Caduti, pronuncià dal condutore de la manifestazion, Mario Klein.
Quanto dolore, quante làgreme, quanta comozion da parte de i familiari de sti soldè, morti par salvare la Patria, l’onore, el dovere, la fameja. El ricordo de lori, ancó l’è lì so ’l Monumento a i Caduti, al centro del paese: pecato che le ocasion de ricordarli se se ridusa a on par de volte l’ano.
Eco che, nare fin a Roma a portare on fiore so la Tomba del Milite Ignoto, el deventa on gesto che comèmora el sacrificio e l’eroismo de la nostra coletività e ricorda on momento storico cussì inportante par la nostra tera.
Quindi, non solo memoria, ma anca riconossenza verso chi à pagà in anticipo quelo che de bon gavemo a disposizion al dì de ancó.

[torna sopra]