Da Brugine (PD)

’E musiche de Nadàe

Nadàe xe eà festa reigiosa pi sentìa ’ncora ancuò. Scominsià fin da coando xe stà fissà eà data del 25 dissenbre, xe fassilmente capìbie che se sentisse el bisogno de dare sfogo a sta festa intonando canti de gioia, soratuto dopo che San Francesco nel 1223 el ga inventà el presepio, dando el via a Pive e Pastorèe conpagnà da ùmii strumenti come zanpogne, flauti e tanburèi.
Co ’l tenpo sta tradission musicàe ga ciapà anca i autori de ’a musica cussì dita “colta”, e ne ’a epoca del “Barocco”, coando vegniva scrita e eseguìa musica soamente a sfondo reigioso, nel periodo nataissio i dava el via a cantate sacre, oratori, sonate e concerti strumentài. Fra i massimi esponenti de sto tenpo se poe mensionare Monteverdi, Tartini, Corelli, Scarlatti, Purcell, fin a rivare al pi famoso Bach (1685-1750), dedicando al Nadàe diverse cantate e el cèebre “Oratorio di Natale” eseguìo par eà prima volta a Lipsia in ocasion del Nadàe del 1734, dove Bach gera Kantor da pi de diese ani.
Naltro grande xe stà Häendel (1685-1759) co ’l famoso oratorio “Il Messia” scrito in sole tre setimane: dal 22 agosto al 14 setenbre 1741. On oratorio che ciapa tuta eà vita de Gesù, scominsiando da eà nàssita fin a eà morte. Da sto oratorio penso che tuti i conosse el brano orchestràe “Piva” e soratuto el coràe “Alleluia” che ancora ancuò, in serti Paesi, coando i lo sente i se alsa tuti in piè. Par ultimo se poe nominare Vivaldi co’ i so incantévoi Gloria.
Dopo el “Barocco” se passa al periodo dito “Classicismo” che parte da eà morte de Bach (1750) fin al 1830 sirca, dominà da figure che ga fato eà storia de ’a musica e i pi cèebri i xe: Haydn, Beethoven e Mozart, che anca se no i ga scrito musiche propriamente nataissie, ’e so conposission ’e vien eseguìe in sto periodo par el so caràtere seren e meòdico; come esenpio basta sitare l’Ave Verum de Mozart.
Dopo vien el periodo cussì dito “Romantico” incarnà soratuto da Schubert che, par el tenpo nataissio, el ga scrito eà famosa “Ave Maria” e “Mille Cherubini in coro”. Dopo se poe ricordare Liszt “i Pastori”; Gounod “Ave Maria”; Max Reger “Mary’s Cradle”; Adam co’ el beìssimo “Cantico di Natale”; Mendelssohn “Hark! The Herald Angels Sing” (Senti l’angelo), on brano che xe deventà famoso par èssare stà messo come coona sonora ne i film: Via col vento, La vita è meravigliosa, A Christmas Carol e Jumanji; Brahms “Nina nanna”; Grieg “Ave Maris Stella” ideàe par chi voe creare na atmosfera nataissia; Liszt “Weihnachtsbaum” (Albero di Natale) on arangiamento de musiche tradissionài; Čiajkovskij “Lo Schiaccianoci” on baleto che conta eà storia de ’a pìcoa Clara che a la vigilia de Nadàe risseve dal zio on schiacianoci a forma de soldatin e coando la se indormessa, eà sogna on mondo fantastico; Bizet “Agnus Dei”; Franck “Panis Angelicus”; Gustav Holst “Christmas Day”; Max Reger “La culla di Cradle”; Britten “Ceremony of Carols” per coro e arpa del 1942; Schoenberg “Weihnachtsmusik” (Musica di Natale) e cussì via…
No resta che ricordare coée meodìe popoari che no’ sfigura par gnente el confronto co’ i grandi musicisti cità sora, anzi, dirìa che le xe conossùe e amà de pi. Scrite da andamenti meòdici spontanei, da na linea de canto sènplice e armoniosa chel tanto che se pensa che le sia sta fate par i pìcoi, ma a dire el vero, le xe musiche amatissime e scoltàe da persone de tute ’e età, e fra ’e tante se poe sitare coée che, varda caso, le xe stà scrite da persone sconossùe, vegnendo sità come anonimi, e fra na “Pastorela” e “Tu scendi dalle stelle” ricordemo Piva piva on canto che se pensa che ’l vègna da i primi rudimentài canti cristiani; Adeste Fideles scrito nel sècoo XIV; Noel, Noel desunto da veci canti francesi del XVI sècoo, ma pare che el provenisse da eà Scossia; Jingle Bells (Suonate campanelli), on canto nataissio american che voe incitare i viajatori a córare svelti so ’e slite par venerare el Banbin Gesù e el Christmas time (Tempo di Natale) che ’l provien da i spirituals americani.
Tu scendi dalle stelle lo ga scrito Sant’Alfonso Maria de’ Liguori, za autore del famoso “Mira il tuo popolo” che se cantava ne ’e procession fin a i ani ’50. Stille Nacht (Notte tranquilla) de Franz Gruber el xe forse el pi conossùo de tuti, inventà nel 1818 in Austria, coando Gruber, organista e maestro de canto, catando roto l’organo, el ga inprovisà ste dolsi note a vose nuda e tuti i presenti i xe stà cussì entusiasti che da subito el canto ga scuminsià a girare de boca in boca, sconfinando presto in tuta Europa e dopo in tuto el mondo. Bianco Natale la ga scrita el conpositore russo-american Irvin Berlin nel 1942 e el xe on canto fra i pi eseguìi al mondo… ec., ec.
Auguro a tuti Bon Nadàe e Bone Feste, naturalmente in musica!

[torna sopra]